કોરોના વાયરસે તેના રૌદ્ર સ્વરૂપમાં લાખો લોકોને ચેપ લગાવ્યો છે. યુરોપ કોરોના સામે દયનીય પરિસ્થિતિમાં છે અને રોજ કેસ અને મોતના આંકડા વધતા જ જાય છે. એવામાં જર્મનીમાં એક મંત્રીએ કોરોના વાયરસથી કથળતા દેશના આરોગ્ય અને અર્થતંત્રથી તણાવમાં આવીને આપઘાત કરી લેતા ચકચાર મચી ગયો છે.
થોમસ ચિંતિત હતા કે પ્રજાની અપેક્ષા જેટલી મદદ સરકાર કરી શકશે કે કેમ
૧૦ વર્ષથી નાણામંત્રી હતા થોમસ
ચાન્સેલર એન્જેલા મર્કેલના પક્ષના જ સભ્ય હતા
જર્મનીના 'હેઝે' ક્ષેત્ર જ્યાં ફ્રેંકફર્ટ શહેરનો પણ સમાવેશ થાય છે ત્યાંના રાજ્યના નાણામંત્રી થોમસ સ્કેફરની લાશ મળી આવી હતી. સત્તાધીશોએ જણાવ્યા પ્રમાણે તેમણે આત્મહત્યા કરી હોય એમ જણાઈ રહ્યું છે. રાજ્યના ગવર્નરે પણ કહ્યું હતું કે રવિવારથી તેઓ કોરોના સંકટ મુદ્દે ભારે દબાણ અનુભવી રહ્યા હતા.
૫૪ વર્ષીય થોમસ જર્મનીના ચાન્સેલર એન્જેલા મર્કેલ ના ક્રિશ્ચયન ડેમોક્રેટિક યુનિયન પક્ષના સભ્ય હતા. તેમની લાશ શનિવારે ફ્રેંકફર્ટ નજીકના હોકેઈમ શહેર પાસેના રેલ્વેના પાટા પાસે મળી આવી હતી.
પોલીસ અન્ય અન્ય અધિકારીઓએ જણાવ્યું કે ત્યાંના સાક્ષીઓ અને આખી ઘટના વિષે અધ્યયન કરતા એવું જાણવા મળ્યું છે કે થોમસે કંટાળીને પોતે પોતાનો જીવ લઇ લીધો હતો. રાજ્યના ગવર્નર વોલ્કર બુફેરે થોમસના મૃત્યુને કોરોના સંકટ સાથે જોડ્યું હતું.
બુફેરે જણાવ્યું કે થોમસ ખૂબ ચિંતિત હતા કે આખા દેશના તમામ લોકોની આશાઓ ખરી ઉતરી શકે એટલી આરોગ્યપ્રદ અને આર્થિક મદદ સરકાર કરી શકે એવું શક્ય લાગતું નથી.
બુફેરે કહ્યું કે મને લાગે છે કે આ ચિંતાઓ તેમને કોરી ખાતી હતી. તેઓને કોઈ જ બીજો વિકલ્પ ન જડ્યો. તેઓ દયનીય પરિસ્થિતિમાં આવી ગયા અને હવે આપણને સૌને છોડીને ચાલ્યા ગયા છે.
નોંધનીય છે કે જર્મનીના કેન્દ્ર અને રાજ્ય સરકારોએ દેશમાં કોરોના વાયરસને ફેલાતો અટકાવા માટે લાદેલા લોક ડાઉનથી દેશના અર્થતંત્રને પડતા ફટકાની અસરો ઘટાડવા માટે મોટી સંખ્યામાં આર્થિક રાહત પેકેજ જાહેર કરેલા છે. થોમસ પોતે આ ક્ષેત્રમાં પુરા ૧૦ વર્ષથી રાજ્ય નાણામંત્રી તરીકે ફરજ બજાવતા હતા.