રેકેટ / કોખના હત્યારા હવે ચાઈનીઝ ટેબલેટની મદદથી કરી રહ્યા છે ભૃણનું લિંગ પરીક્ષણ

આરોગ્ય વિભાગના ટોચના અધિકારીઓ પણ આ વાત સામે આવ્યા બાદ પરેશાન થઈ ગયા છે. જુલાઈ મહિનાની શરૂઆતથી દેશના સૌથી મોટા રાજ્ય ઉત્તરપ્રદેશ સહિત કેટલાંક રાજ્યોમાં મુખબીર (બાતમીદાર) યોજના હેઠળ સામુહિક દરોડાનો સપાટો બોલાવવામાં આવ્યો હતો. ફક્ત મેરઠમાં જ આરોગ્ય વિભાગે 11 કેન્દ્રો પર લિંગ પરીક્ષણના રેકેટ ઝડપ્યા હતા.

કેન્દ્ર સરકારે તાજેતરમાં જ તમામ રાજ્ય સરકારોને લિંગ પરીક્ષણ વિરોધી કાયદા કડક બનાવવા અને દોષિતો પર કડક કાર્યવાહી કરવાના આદેશો આપ્યા હતા. કાયદા કડક થવાના કારણે લિંગ પરીક્ષણ રેકેટના માફિયાઓએ આ અનોખો રસ્તો શોધી કાઢ્યો હતો. દલાલોએ થાઈલેન્ડ અને ચીનમાં બેઠેલા એજન્ટોનો સંપર્ક કરીને નવા ડિવાઈસ મંગાવી લીધા હતા. આરોગ્ય વિભાગે પાડેલા દરોડામાં આવા અનેક ચાઈનીઝ ટેબલેટ્સ પકડાયા છે. આ ડિવાઈસની મદદથી આસાનીથી ગર્ભવતી સ્ત્રીના ભૃણનું પરીક્ષણ કરવામાં આવતું હતું. 

આ ટેબલેટ હવે ભાડે પણ આપવામાં આવી રહ્યું છે. મહિલાઓએ હોસ્પિટલ સુધી આવવાની જરૂર પણ પડતી નથી. એજન્ટ ગર્ભવતી મહિલાનું બ્લડપ્રેશર (બીપી) માપવાના બહાને ઘરે જઈને લિંગ પરીક્ષણ કરી રહ્યા છે. એક અધિકારીએ જણાવ્યું કે, છેલ્લા એક વર્ષમાં આરોગ્ય વિભાગે નકલી ગ્રાહકોની મદદથી અનેક કેન્દ્રોમાં લિંગ પરીક્ષણ થતું હોવાનો ભાંડો ફોડ્યો છે.