વાપી / ગીતા રબારી અને જીગ્નેશ કવિરાજના ડાયરામાં નોટોનો વરસાદ

ડાયરા પ્રેમી જનતાની સાથે સાથે સાધુ સંતોએ પણ નોટો ઉડાડતા લોકો પણ ચકિત થઇ ગયા હતા. કપિલ સ્વામી દ્વારા નોટો ઉછાળી હતી. જોકે ફરી એકવાર ડાયરાની મોજમાં ઘેલા થયેલ લોકોએ લક્ષ્મીની આમાન્ય રાખવામાં ચૂક કરી હતી. જ્ઞાન માતા ઉદવા સ્કુલ દ્વારા યોજાયેલા આ લોકડાયરામાં ગુજરાતના જાણીતા લોક ગાયિકા ગીતા રબારી સહિત અન્ય કલાકારોએ ઉપસ્થિત ડાયરા રસિકોને મંત્રમુગ્ધ કર્યા હતા.

ગરીબ આદિવાસી પરિવારોની દીકરીઓના લાભાર્થે આયોજિત ડાયરામાં વાપીવાસીઓએ ગીતા રબારી સહિત અન્ય કલાકારો પર રૂપિયાનો વરસાદ કરી યોગદાન આપ્યું હતું. આ ડાયરામાં ગુજરાતના લોક ગાયિકા ગીતા રબારી સહિત જીગ્નેશ કવિરાજ અને ઉમેશ બારોટ પણ ઉપસ્થિત રહ્યા હતા અને તેઓએ પણ ભજન અને લોકગીતોની રમઝટ બોલાવી ઉપસ્થિત લોકોને મંત્રમુગ્ધ કર્યા હતા.

ડાયરામાં રાષ્ટ્રીય રાજપૂત કરણી સેનાના ગુજરાત પ્રમુખ રાજ શેખાવત પણ ઉપસ્થિત રહ્યા હતા. તેઓએ પણ ડાયરાના કલાકારો પર રૂપિયાનો વરસાદ કર્યો હતો. સાથે જ ડાયરામાં વાપી અને આસપાસના વિસ્તારના અગ્રણી સાધુ-સંતો પણ ઉપસ્થિત રહ્યા હતા. તેઓએ પણ ઉપસ્થિત કલાકારો પર રૂપિયાનો વરસાદ વરસાદ ડાયરાની મોજ માણી હતી. વાપીમાં યોજાયેલા લોક ડાયરામાં ગીતા રબારી સહિત અન્ય કલાકારો પર નોટોનો વરસાદ થતાં ગરીબ આદિવાસી પરિવારોની દીકરીઓના શિક્ષણના લાભાર્થે યોજાયેલા ડાયરામાં મોટું આર્થિક ભંડોળ એકઠું થયું હતું અને ડાયરામાં થયેલા ભંડોળને ગરીબ આદિવાસી પરિવારોના દીકરીઓના શિક્ષણ પાછળ વાપરવામાં આવનાર છે.