WC 2019 / ક્રિસ ગેલને આઉટ આપવા અમ્પાયર ઉતાવળા કેમ બન્યા હતા?

ક્રિસ ગેલ જે બોલ પર આઉટ આપવામાં આવ્યો હતો તે ખરેખર ફ્રી-હિટ બોલ હતો, કારણ કે તેની આગળનો સ્ટાર્ક દ્વારા ફેંકાયેલો મસમોટો નો-બોલ હતો, પરંતુ અમ્પાયરે તેને નો-બોલ જાહેર કર્યો નહોતો. ગઈ કાલે ઓસ્ટ્રેલિયા-વિન્ડીઝ વચ્ચે રમાયેલી મેચમાં અમ્પાયરો ક્રિસ ગાફની અને રુચિકા પાલિયાગુરગેના નિર્ણયો સવાલોના ઘેરામાં રહ્યા. 

ઓસ્ટ્રેલિયાના નાથમ કૂલ્ટર નાઇલ અને સ્ટીવ સ્મિથની  બેટિંગના કારણે 288 રન થયા, જ્યારે ટાર્ગેટ પૂરો કરવા માટે આવેલી વેસ્ટ ઇન્ડિઝની ટીમ 50 ઑવરમા 9 વિકેટ ગુમાવીને 273 કરી શકી. 

ક્રિસ ગેલે 17 બોલમાં 21 રન બનાવ્યા. તેણે મિશેલ સ્ટાર્કની બોલિંગમાં એલબી આઉટ જાહેર કરાયો. સ્ટાર્કનો યોર્કર ચૂકી જતાં બોલ ક્રિસ ગેલના પેડ સાથે અથડાયો. ક્રિસ ગોલે પોતાની એ નાનકડી ઇનિંગ્સમાં ત્રીજી વાર રિવ્યૂ લીધો, પરંતુ રિપ્લેમાં સ્પષ્ટ થયું કે બોલ સ્ટમ્પ સાથે અથડાઈ રહ્યો હતો અને ત્રીજા અમ્પાયર દ્વાર 'અમ્પાયર્સ કોલ'ના નિર્ણયને કારણે ક્રિસ ગેલ પેવેલિયન પરત ફર્યો. 

આ બધા વચ્ચે એક ટીવી રિપ્લેમાં સ્પષ્ટપણે જોવા મળ્યું કે, સ્ટાર્કે ગેલને આઉટ કર્યો એ પહેલાંના બોલ પર ઓવરસ્ટેપ કર્યું હતું. એટલે કે સ્ટાર્કે મસમોટો નો-બોલ ફેંક્યો હતો, પરંતુ અમ્પાયરે તેને નો-બોલ જાહેર કર્યો નહોતો. જો અમ્પાયરે ભૂલ ના કરી હોત અને તેને નો-બોલ જાહેર કર્યો હોત તો ગેલ જે બોલ પર આઉટ થયો હતો એ ફ્રી-હિટ હોત.

ક્રિસ ગેલે પ્રથમ રિવ્યૂ ત્રીજી ઓવરમાં લીધો હતો, જ્યારે તેણે સ્ટાર્કના બોલિંગમાં ડ્રાઇવ રમવાનો પ્રયાસ કર્યો. કેચઆઉટની અપીલ થઈ અને અમ્પાયર ગાફિનીએ તેને આઉટ જાહેર કરી દીધો. ડીઆરએસને કારણે મેદાન પરના અમ્પાયરે નિર્ણય બદલવો પડ્યો.

બે બોલ બાદ સ્ટાર્કની ઓવરમાં અપીલ થતાં ક્રિસ ગેલનો એલબી આઉટ આપી દેવાયો, પરંતુ ગેલે રિવ્યૂ માગતાં રિપ્લેમાં સ્પષ્ટપણે જોવા મળ્યું કે બોલ સ્ટમ્પની લાઇનથી બહાર જઈ રહ્યો હતો. ફરી અમ્પાયરે પોતાનો નિર્ણય બદલવો પડ્યો. ત્યાર પછીની સ્ટાર્કની ઓવરમાં ગેલે ત્રીજો રિવ્યૂ લીધો, પરંતુ આ વખતે તે સફળ થઈ શક્યો નહીં અને ત્રીજા અમ્પાયરે 'અમ્પાયર્સ કોલ'નો નિર્ણય આપ્યો હતો. જોકે હકીકતમાં એ ફ્રી-હિટ બોલ હતો.

ગઈ કાલની મેચમાં બીજા અમ્પાયર પાલિયગુરગેના બે નિર્ણય પણ બદલવામાં આવ્યા હતા. પહેલી વાર મેક્સવેલની બોલિંગમાં જેસન હોલ્ડરને એલબી આઉટ અપાયો હતો, પરંતુ રિવ્યૂને કારણે અમ્પાયરે નિર્ણય બદલવો પડ્યો હતો. ત્યાર સ્પિનર ઝમ્પાની બોલિંગમાં પણ આવું જ બન્યું હતું.

અમ્પાયરની આ ભૂલ જોયા બાદ કોમેન્ટ્રી કરી રહેલા સુનીલ ગાવસ્કર ગિન્નાયો હતો. તેણે કહ્યું, ''આ ભૂલ માફીને લાયક નથી.'' તેણે સલાહ આપી કે, ''ત્રીજા અમ્પાયરે દરેક બોલ ચેક કરવો જોઇએ. આવું કરવાથી મેદાનમાં ઊભેલા અમ્પાયર પર બોજ હળવો થશે અને તે એલબી, વાઇડ અને કેચ આઉટ જેવા નિર્ણય પર વધુ ધ્યાન આપી શકશે.''