ક્રિકેટ / ગવાસ્કરે કહ્યું રોહિત શર્માએ આ શોટ રમવાની જરૂર ન હતી, હિટમેન બોલ્યો હું તો રમીશ અને...

• બ્રિસ્બેન ટેસ્ટમાં રોહિત 44 રને આઉટ થઈ ગયો હતો 
• નાથન લિયોનની ઓવરમાં મિશેલ સ્ટાર્કના હાથે કેચ થઈ ગુમાવી વિકેટ 
• સુનિલ ગવાસ્કર સહિતના ઘણા વિવેચકોએ કરી શૉટ સિલેક્શનની ટીકા 

જો કે આ શોટ સિલેક્શન માટે તેની ખૂબ જ આલોચના થઇ રહી છે, આ શોટ રમવાના મુદ્દે ઘણા ક્રિકેટ વિવેચકોએ રોહિત શર્માની ટીકા પણ કરી હતી. કેમ કે જયારે રોહિત શર્મા આઉટ થયો ત્યારે ભારતનો સ્કોર 62 રને 2 વિકેટ પર થઇ ગયો હતો, જો રોહિત શર્મા આઉટ ન થયો હોત તો તે વધુ સારી રીતે ભારતના સ્કોરને આગળ ધપાવી શકેત કેમ કે તે ચેતેશ્વર પૂજારા સાથે સેટ થઇ ગયો હતો. 

સુનિલ ગવાસ્કરે દર્શાવી નારાજગી 

ભારતના પૂર્વ ક્રિકેટર સુનિલ ગાવસ્કરે પણ રોહિતના આ શોટની ટીકા કરી હતી અને કહ્યું હતું કે શું કામ ? શું કામ? શું કામ? આ એક અનબિલીવેબલ શોટ હતો, એક બિનજવાબદાર શોટ હતો, ત્યાં કોંગ ઓન પર એક ફિલ્ડર હતો , ત્યાં સ્કવેર લેગ પર એક ફિલ્ડર હતો, અને હજુ થોડા સમય પહેલા જ તમે એક બાઉન્ડ્રિ ફટકારી હતી, તો તમે આ શોટ શું કામ રમ્યા? તમે એક સિનિયર પ્લેયર છો, અને આનો કોઈ જ એક્સક્યુઝ નહિ આપી શકો, આ માટે કોઈ પણ બહાનું નહિ ચાલે."

મહત્વનું છે કે સુનિલ ગાવસ્કરે આ સાથે જ લખ્યું હતું કે સાવ જ બિનજરૂરી રીતે રોહિત શર્માએ તેની વિકેટ ઓસ્ટ્રેલિયાને ભેટ આપી દીધી, મહત્વનું છે કે આ મેચમાં ઓસ્ટ્રેલિયાએ 369નો વિશાળ સ્કોર નોંધાવ્યો હતો અને થોડા જ સમય પહેલા શુભમન ગિલ 7ના સ્કોર પર આઉટ થયો હતો, ત્યારે રોહિત શર્મા જેવા સિનિયર ખેલાડીને તેની 100મી મેચમાં આવો શોટ રમતો જોઈને ગાવસ્કર નિરાશ થઇ ગયા હતા. મહત્વનું છે કે આ મેચમાં રોહિત 74 બોલ રમીને 44ના સ્કોર પર આઉટ થઈ ગયો હતો અને આ તેની 100મી ટેસ્ટ મેચ હતી. 

હું પરવા નથી કરતો : રોહિત શર્મા 

આની સાથે જ ક્રિકેટના અન્ય વિવેચકોએ પણ આ મુદ્દે રોહિત શર્માના શોટ સિલેક્શનની આલોચના કરી હતી જો કે રોહિત શર્માએ જણાવ્યું હતું કે હું આ બાબતની પરવા કરતો નથી કે કોણ શું કહે છે અને આગળ પણ આ રીતે જ આ શોટને રમવાનું ચાલુ રાખીશ, કારણ કે આ શોટ હું ખૂબ જ સારી રીતે રમતો આવ્યો છું  અને આગળ પણ રમતો રહીશ.

રોહિત શર્માએ વધુમાં કહ્યું હતું કે કેમ કે હું જ્યારે ક્રિઝ પર આવું તો મારું ધ્યાન તે તરફ હોય છે કે હું કઈ રીતે વધુ ઉપયોગી પુરવાર થઇ શકું, હું જયારે પણ આ શોટ રમું છું તો ક્યારેક તેમાં આઉટ થવાની સંભાવના હોય છે અને ક્યારેક આ બાઉન્ડ્રીમાં બદલાઈ જાય છે, જો કે લિયોન માટે કહું તો તે ચતુર નીકળ્યો, પરંતુ મારું આઉટ થવું તે ટિમ માટે ખરાબ રહ્યું અને આ દુર્ભાગ્યપૂર્ણ છે, પરંતુ મેં આગળ જેમ કહ્યું તેમ આ મારો શોટ છે અને હું તેને રમવાનું ચાલુ રાખીશ.