ભાજપ સાંસદ ગૌતમ ગંભીરના ફાઉન્ડેશને મંજૂરી વગર બારોબાર કોરોનાની દવાની ખરીદી અને વિતરણ કર્યું હોવાનું ડ્રગ કન્ટ્રોલરે દિલ્હી હાઈકોર્ટમાં જણાવ્યું છે.
ગંભીર ફાઉન્ડેશને ડ્રગ એન્ડ કોસ્મેટિક્સ એક્ટના નિયમોનું ઉલ્લંઘન કર્યું
નવા રિપોર્ટમાં ડ્રગ કન્ટ્રોલરે દિલ્હી હાઈકોર્ટમાં દાવો કર્યો
ગૌતમ ગંભીરે ભગતસિંહનું ઉદાહરણ ટાંકીને પોતાનો બચાવ કર્યો
કોરોના કાળમાં બિનઅધિકૃત રીતે કોરોનાની સારવારમાં વપરાતી દવાઓના મોટા જથ્થાની ખરીદી કેસમાં દિલ્હી હાઈકોર્ટે ફરી એક વાર ડ્રગ કન્ટ્રોલની કાર્યવાહી પર સવાલ ઉઠાવ્યો છે. સુનાવણી દરમિયાન ડ્રગ કન્ટ્રોલરે જણાવ્યું કે ગૌતમ ગંભીરના ફાઉન્ડેશને ડ્રગ એન્ડ કોસ્મેટિક્સ એક્ટની જોગવાઈઓનો ભંગ કર્યો છે.
ગૌતમ ગંભીરના ફાઉન્ડેશને મંજૂરી વગર મોટાપાયે કોરોનાની દવાની ખરીદી કરી
સુનાવણી દરમિયાન હાઈકોર્ટે ડ્રગ કન્ટ્રોલરને સવાલ કર્યો કે તમે કેટલાક ડીલર્સ અને લાઈસન્સ ધારકોને કારણ દર્શક નોટીસ જારી કરી દીધી પરંતુ ગૌતમ ગંભીર ફાઉન્ડેશનની સામે કેમ કાર્યવાહી ન કરી. ડ્રગ કન્ટ્રોલરે કોર્ટને આ કેસમાં કાર્યવાહી કરવાની ખાતરી આપી છે. દિલ્હી હાઈકોર્ટે જણાવ્યું કે અમે જોયું છે કે ગંભીરે આ દવાઓની ખરીદી માટે ઘણા પૈસાનો ખર્ચ કર્યો પરંતુ અનધિકૃત રીતે ખરીદાયેલી આવેલી આટલી મોટી માત્રાઓની દવાઓને કારણે જેને જરુર હતી તેને દવાઓ મળી શકી નથી.
I am a man and all that affects mankind concerns me - Sardar Bhagat Singh!
ગૌતમ ગંભીરે ભગતસિંહ દ્વારા પોતાની જાતનો બચાવ કર્યો
આ આખઆ કેસમાં ભાજપ સાંસદ ગૌતમ ગંભીરે ટ્વિટ કરીને પોતાનો પક્ષ રજૂ કર્યો. ગંભીરે સરદાર ભગતસિંહનું ઉદાહરણ આપીને પોતાના કામને વ્યાજબી ઠેરવવાની કોશિશ કરી. ગંભીરે ભગતસિંહના એ નિવેદનને ઉલ્લેખ કર્યો જેમાં તેમણે કહ્યું હતું કે હું એક વ્યક્તિ છું અને જે કંઈ પણ માનવજાતિને પ્રભાવિત કરે છે તે મને પણ ચિંતિત કરે છે.