અદાણી વિશ્વનાં 11માં નંબરના અને ભારત અને એશિયાના બીજા નંબરના સૌથી ધનિક વ્યક્તિ છે. ત્યારે આ વર્ષે તેમની સંપત્તિમાં જાન્યુઆરીથી માર્ચ સુધીમાં 21.1 અબજ ડોલરનો વધારો થયો છે.
કમાણીમાં બધાં જ ધનકુબેર અદાણીથી પાછળ
અદાણી ભારત અને એશિયાના બીજા નંબરના ધનિક વ્યક્તિ છે
સતત વધી રહ્યાં છે અદાણીની કંપનીઓના શેર
ભારતીય ધનકુબેર ગૌતમ અદાણીએ છેલ્લાં કેટલાંક સમયમાં જેટલી તેજીથી ધન જમા કરી છે તે કોઇ પણને હેરાન કરી મૂકે તેવી છે. ધન જમા કરવામાં અદાણીની સામે ન તો માત્ર ભારત અને એશિયાના સૌથી અમીર વ્યક્તિ મુકેશ અંબાણી પાછળ રહી ગયા છે. પરંતુ વિશ્વનાં ટોપ 10 ધનિકોને પણ અદાણી ગ્રુપના ચેરમેને પાછળ છોડી દીધા છે. વિશ્વના અવ્વલ ધનકુબેરોની સંપત્તિમાં વધારાનો આ ટ્રેન્ડ આ વર્ષે પણ યથાવત રહ્યો છે. વર્ષના પ્રથમ ત્રણ મહિના દરમ્યાન માત્ર ગૌતમ અદાણીની સંપત્તિ જેટલી વધી છે તેટલું તો માત્ર વિશ્વનાં ટોપ 10 ધનિક પણ નથી કમાઇ શક્યાં.
3 મહિનામાં આટલી ગણી વધી ગઇ અદાણીની સંપત્તિ
બ્લૂમબર્ગ બિલિયોનેર્સ ઈન્ડેક્સ અનુસાર, ગૌતમ અદાણીની સંપત્તિમાં આ વર્ષે જાન્યુઆરીથી માર્ચ સુધીમાં 21.1 અબજ ડોલરનો વધારો થયો છે. આ સાથે જ અદાણીની કુલ નેટવર્થ 97.6 બિલિયન ડૉલર પર પહોંચી ગઈ છે. આ સાથે અદાણી વિશ્વનાં 11માં નંબરના અને ભારત અને એશિયાના બીજા નંબરના સૌથી ધનિક વ્યક્તિ છે. છેલ્લાં કેટલાંક મહિનામાં અદાણીએ મુકેશ અંબાણીને પણ અનેક વખત પાછળ છોડી દીધા છે. બે ટોચના ભારતીય ધનિકો વચ્ચે હજુ પણ સામાન્ય અંતર છે.
મુકેશ અંબાણીથી થોડાં જ ડગલાં દૂર છે અદાણી
આ ત્રણ મહિનામાં અંબાણીની સંપત્તિમાં 8.24 બિલિયન ડૉલરનો વધારો થયો છે. હાલમાં રિલાયન્સ ઈન્ડસ્ટ્રીઝનાં ચેરમેન મુકેશ અંબાણીની કુલ સંપત્તિ 98.2 બિલિયન ડૉલર છે. 31 માર્ચ, 2022 સુધીમાં અંબાણી પાસે અદાણીની તુલનામાં હાલમાં માત્ર 6 મિલિયન ડૉલર જ વધુ સંપત્તિ છે. અદાણી ગ્રુપની અનેક કંપનીઓ જે રીતે શેરબજારમાં સતત નવા રેકોર્ડ બનાવી રહી છે તે મુજબ આ ગેપ લાંબો સમય ચાલે તેવું લાગતું નથી. જો કે, અંબાણી હજુ પણ વિશ્વના 10માં સૌથી ધનિક વ્યક્તિ છે અને ભારત અને એશિયાના ટોચના સૌથી ધનિક વ્યક્તિ છે.
વોરેન બફેટ અને એલોન મસ્કની સંપત્તિમાં થયો આટલો વધારો
ટોપ 10માં સામેલ અન્ય ધનકુબેરોની વાત કરીએ તો આ ત્રણ મહિનામાં ધન એકત્ર કરવામાં બર્કશાયર હાથવેના વોરેન બફેટ (Warren Buffet) ની સંપત્તિ બીજા નંબરે છે. આ ત્રણ મહિનામાં તેઓએ 18.7 બિલિયન ડૉલરની સંપત્તિ એકઠી કરી છે. એ જ રીતે અનુભવી રોકાણકાર બફેટ હાલમાં 128 બિલિયન ડૉલરની કુલ નેટવર્થ સાથે વિશ્વના પાંચમા નંબરના સૌથી ધનિક વ્યક્તિ બની ગયા છે. ટોપ 10 ધનિકોમાં બફેટ અને અંબાણી સહિત માત્ર ચાર ધનકુબેર જ સંપત્તિ વધારવામાં સફળ થયા છે. 271 અબજ ડોલરની નેટવર્થ સાથે વિશ્વનાં સૌથી ધનિક વ્યક્તિ એલન મસ્કની સંપત્તિમાં હાલમાં 1.14 અબજ ડોલરનો વધારો થયો છે. એ જ રીતે આઠમા ક્રમના કાબિજ સ્ટીવ બાલ્મરની 108 અબજ ડોલરની સંપત્તિમાં આ ત્રણ મહિનામાં 2.14 અબજ ડોલરનો વધારો થયો છે.
અર્નાલ્ટને સૌથી વધુ નુકસાન, બિલ ગેટ્સ પાસે પણ ઓછી સંપત્તિ
અન્ય ટોચના અમીરોએ વર્ષના પ્રથમ ત્રિમાસિક ગાળામાં સંપત્તિમાં મોટા નુકસાનનો સામનો કરવો પડ્યો છે. વિશ્વના સૌથી બીજા નંબરની અમીર વ્યક્તિ જેફ બેઝોસની સંપત્તિ આ સમયગાળા દરમિયાન 4.30 અબજ ડોલર ઘટીને 188 અબજ ડોલર થઈ ગઈ છે. 149 બિલિયન ડૉલર નેટવર્થ સાથે વિશ્વના ત્રીજા નંબરના સૌથી ધનિક વ્યક્તિ બર્નાર્ડ અર્નાલ્ટને આ ત્રણ મહિનામાં સૌથી વધારે 29.4 બિલિયન ડૉલર ગુમાવ્યાં છે. માઈક્રોસોફ્ટના બિલ ગેટ્સની સંપત્તિ 4.48 બિલિયન ડૉલર ઘટીને 134 બિલિયન ડૉલર થઈ ગઈ છે. બિલ ગેટ્સ હાલમાં અમીરોની યાદીમાં ચોથા સ્થાને છે.
ગૂગલના કો-ફાઉન્ડર્સને થયું આટલું નુકસાન
Google ના સહ-સ્થાપક લેરી પેજ અને સર્જેઇ બ્રિન બંનેએ આ સમયગાળા દરમિયાન અનુક્રમે 4.62 બિલિયન ડૉલર અને 4.88 બિલિયન ડૉલર ગુમાવ્યા છે. લેરી પેજ 124 બિલિયન ડૉલર સાથે છઠ્ઠા સ્થાને છે અને સર્જેઇ બ્રિન 119 બિલિયન ડૉલર સાથે 7માં ક્રમાંકે છે. વિશ્વના નવમાં સૌથી અમીર વ્યક્તિ લેરી એલિસનની સંપત્તિ આ સમયગાળા દરમિયાન 3.07 બિલિયન ડૉલર ઘટીને 104 બિલિયન ડૉલર થઈ ગઇ છે.