ધનકુબેર / ગૌતમ અદાણી વિશ્વના ટોપ-5 અમીરોની યાદીમાં સામેલ, વૉરેન બફેટને પણ પાછળ છોડ્યા

• વિશ્વના સૌથી અમીર લોકોની યાદીમાં ગૌતમ અદાણી પાંચમા સ્થાને
• વિશ્વના 10 સૌથી ધનિકોમાં બે ભારતીય
• અંબાણી યાદીમાં 8માં ક્રમાંક પર

અદાણી ગ્રુપના ચેરમેન ગૌતમ અદાણી વિશ્વના સૌથી અમીર લોકોની ફોર્બ્સની યાદીમાં પાંચમા ક્રમાંકે આવી ગયા છે. અદાણીની કુલ નેટવર્થ 123.1 અરબ ડૉલર હોવાનો અંદાજ આંકવામાં આવ્યો છે. તેઓએ Berkshire Hathaway ના વૉરેન બફેટને પણ પાછળ છોડીને આ સ્થાન હાંસલ કર્યું છે. એટલે કે, વૉરેન બફેટ 121.7 અરબ ડૉલરની કુલ અંદાજિત નેટવર્થ સાથે હવે છઠ્ઠા સ્થાને આવી ગયા છે.

ટોપ 10માં બે ભારતીય, મુકેશ અંબાણી 8માં ક્રમાંકે

રિલાયન્સ ઈન્ડસ્ટ્રીઝના ચેરમેન મુકેશ અંબાણી ફોર્બ્સની દુનિયાના સૌથી ધનિક લોકોની યાદીમાં આઠમા ક્રમાંકે છે. આ રીતે, વિશ્વના 10 સૌથી અમીર લોકોમાં બે ભારતીયોનો સમાવેશ થાય છે. અંબાણીની કુલ નેટ વર્થ (મુકેશ અંબાણી નેટવર્થ) 103.70 અરબ ડૉલર આંકવામાં આવી.

એલન મસ્ક (Elon Musk) ટોપ પર યથાવત

ટેસ્લા (Tesla) અને સ્પેસએક્સ (SpaceX) ના પ્રમુખ એલન મસ્ક આ યાદીમાં પ્રથમ સ્થાને છે. તેઓની કુલ નેટવર્થ 269.70 અરબ ડૉલર હોવાનો અંદાજ છે. જેફ બેઝોસ 170.2 અરબ ડૉલરની કુલ સંપત્તિ સાથે બીજા ક્રમાંકે છે. ફ્રાન્સના બર્નાર્ડ આર્નોલ્ટ અને તેમના પરિવારની કુલ સંપત્તિ અંદાજે 166.8 અરબ ડૉલર આંકવામાં આવી છે અને તેઓ આ યાદીમાં ત્રીજા સ્થાને છે.

બિલ ગેટ્સનું સ્થાન ચોથા ક્રમાંકે

દુનિયાના સૌથી અમીર લોકોની ફોર્બ્સની યાદીમાં બિલ ગેટ્સ ચોથા નંબર પર છે. તેઓની કુલ સંપત્તિ 130.2 અરબ ડૉલર હોવાનો અંદાજ છે. આ યાદીમાં લેરી એલિસન સાતમા સ્થાને છે. તેમની કુલ નેટવર્થ 107.6 અરબ ડૉલર હોવાનો અંદાજ છે. લેરી પેજની કુલ સંપત્તિ 102.4 બિલિયન ડોલર અંદાજવામાં આવી છે અને તેઓ આ યાદીમાં નવમાં સ્થાને છે. આ સાથે જ સર્ગેઈ બ્રિન 98.5 અરબ ડૉલરની કુલ સંપત્તિ સાથે 10માં ક્રમાંકે છે.