ગુજરાતના આઇએએસ અધિકારી ગૌરવ દહિયાએ તેના પર છેતરપિંડી અને શારીરિક શોષણની ફરિયાદ કરનાર દિલ્હીની પીડિતા પર ર૦ કરોડ રૂપિયાની માગણી કરવાનો આરોપ મૂક્યા બાદ વિવાદનો મધપૂડો વધુ છેડાયો છે.
ગૌરવ દહિયાના આરોપ પર આજે પીડિતાએ એક પત્રકાર પરિષદ યોજી હતી, જેમાં તેણે ખુલાસો કર્યો હતો કે મેં ગૌરવ દહિયા પાસે ર૦ કરોડ માગ્યા નથી જો તેની પાસે આટલી મોટી સંપત્તિ હોય તો હું તેનાથી વધુ માગું. ત્યારે પીડિતાએ વધુ આક્ષેપ કરતાં જણાવ્યું છે કે ગૌરવ દહિયાને અન્ય મહિલા સાથે પણ અનૈતિક સંબંધ છે.
ગૌરવ દહિયાના આરોપ પર આજે પીડિત મહિલાએ પત્રકાર પરિષદ યોજતાં જણાવ્યું હતું કે જો ગૌરવ દહિયા પાસે ર૦ કરોડ રૂપિયા હોય તો સરકારે તેની તપાસ કરવી જોઇએ. સાત વર્ષની નોકરીમાં એવા તો કેવા ગોટાળા કર્યા કે તેની પાસે આટલા બધા રૂપિયા મને આપવા માટે આવ્યા તેની તપાસ થવી જોઇએ.
પીડિતાએ વધુમાં જણાવ્યું હતું કે મેં ર૦ કરોડ રૂપિયા માગ્યા જ નથી. ગૌરવ દહિયાએ જે મેસેજ મીડિયાને બતાવ્યા છે તે પુરેપુરા બતાવ્યા નથી. પીડિતાએ વધુમાં જણાવ્યું છે કે તે જ્યારે નેપાળની કોલેજમાં અભ્યાસ કરતી હતી ત્યારે ગૌરવ દહિયા તેને મેસેજ કરતો હતો.
આ સિવાય ગૌરવે તેની સાથે લગ્ન કરી લીધાં તેની જાણ પણ તેનાં માતા-પિતાને નથી. પીડિતાનો આક્ષેપ છે કે મેં પોલીસને ગૌરવ દહિયા વિરુદ્ધમાં ૧૦ ટકા પણ પુરાવા નથી આપ્યા. આ સિવાય ગૌરવ દહિયાને કોઇ અન્ય એક મહિલા સાથે પણ અનૈતિક સંબંધ હોવાનો ચોંકાવનારો ખુલાસો કર્યો છે.
આઇએએસ અધિકારી ગૌરવ દહિયા વિરુદ્ધમાં દિલ્હીની પીડિતાએ શારીરિક શોષણ અને છેતરિપંડીની ફરિયાદ ગાંધીનગર સેક્ટર-૭ પોલીસમાં કરી હતી. પોલીસ ફરિયાદના આધારે ગાંઘીનગર પોલીસે તપાસ શરૂ કરી છે અને પીડિતાનું નિવેદન લેવા માટે દિલ્હી પહોંચી હતી.
પીડિતાએ ગૌરવ દહિયા પર કરેલા આક્ષેપો અંગે પુરાવા રજૂ કર્યા હતા અને પોતાની દીકરીના બર્થ સર્ટિફિકેટ સહિતના દસ્તાવેજો સોંપ્યા હતા. આ ચકચારી કેસમાં તપાસ સમિતિના રિપોર્ટ બાદ આઇએએસ ગૌરવ દહિયાને સસ્પેન્ડ કરવામાં આવ્યા છે.