મોઘવારીનો માર / ફેબ્રુઆરી મહિનામાં 3જી વખત વધ્યા ગેસ સિલિન્ડરના ભાવ, 3 મહિનામાં 200 રૂપિયા મોંઘો થયો સિલિન્ડર

• LPGના ભાવમાં 1 મહિનામાં ત્રીજી વખત થયો ભાવ વધારો
• સબ્સિડી વિનાના LPG સિલિન્ડરમાં રૂ.25નો વધારો
• 3 મહિનામાં LPG સિલિન્ડરના ભાવમાં રૂ.200નો વધારો

સરકારી તેલ અને ગેસ કંપનીઓએ ફેબ્રુઆરી મહિનામાં 3જી વખત ઘરેલૂ ગેસ સિલિન્ડરની કિંમતોને લઈને ગ્રાહકોને ઝટકો આપ્યો છે. 14.2 કિલોના સબ્સિડી વિનાના સિલિન્ડરના ભાવમાં ફરીથી 25 રૂપિયાનો ભાવ વધારો કરાયો છે. જ્યારે 19 કિલોના કર્મશિયલ સિલિન્ડર પર થોડી એટલેકે 4 રૂપિયાની રાહત આપવામાં આવી છે. 

14.2 કિલોના સિલિન્ડરની કિંમત થશે 892.50 રૂપિયા થશે

હવે ગ્રાહકોએ 14.2 કિલોના ગેસ સિલિન્ડર માટે 892.50 રૂપિયા ચૂકવવાના રહેશે. પહેલાં 15 ફેબ્રુઆરીએ આ કિંમત 867.50 રૂપિયા હતી. તેમાં 25 રૂપિયાનો વધારો કરાયો છે. ઉલ્લેખનીય છે કે એક મહિનામાં 3જી વખત સિલિન્ડરના ભાવ વધ્યા છે. 3 ફેબ્રુઆરીની સરખામણીએ કિંમત 75 રૂપિયા વધી ચૂકી છે. 

આ મહિને ત્રીજી વખત ભાવ વધારીને ગ્રાહકોને આપ્યો મોટો ઝટકો

સામાન્ય રીતે મહિનાના અંતિમ દિવસે રસોઈ ગેસની સમીક્ષા કરાય છે અને કિંમતોમાં વધધટ નવા મહિનાથી લાગૂ કરાય છે. પરંતુ આ મહિને 3 વખત ભાવવધારો કરીને 75 રૂપિયા વધારી દેવાતા ગ્રાહકોની મુશ્કેલીઓ વધી છે.

19 કિલોના કર્મશિયલ ગેસ સિલિન્ડર પર મળી રાહત

ઘરેલૂ રસોઈ ગેસ સિલિન્ડરની કિંમતમાં વધારો થયો છે અને સાથે જ 19 કિલોના કર્મશિયલ સિલિન્ડરની કિંમતમાં સામાન્ય એટલે કે 4 રૂપિયાની રાહત આપી છે. 15 ફએબ્રુઆરીએ આ સિલિન્ડરની કિંમત 1717.50 રૂપિયા હતી જે આજે ઘટીને 1713.50 રૂપિયા થઈ છે.