કચ્છ: કંડલામાં ફરી ગેસ ગળતરની ઘટના સામે આવી છે. મળતી માહિતી પ્રમાણે ખાનગી કંપનીની ગેસ લાઈનમાં લીકેજ થતા ભાગદોડ મચી ગઈ હતી. જોકે ઘટના અંગે જાણ થતા જ કંડલા પોર્ટનું ફાયર ફાઈટર ઘટના સ્થળે પહોંચી ગયું હતું અને ગેસ લીકેજને ડામવા પ્રયાસો હાથ ધરવામાં આવ્યા છે. જોકે ગેસની લાઈનમાં લીકેજ ક્યાં કારણોસર થયું તે હજુ સુધી જાણી શકાયું નથી.
જિલ્લામાં અતિ સંવેદનશીલ અને વિસ્ફોટક તથા ઘાત કેમિકલ વાળા વિસ્તારમાં આવેલા કંડલામાં દર અઠવાડિયે ગેસ ગળતરના બનાવો બની રહ્યા છે. જેના કારણે લોકોને શ્વાસ લેવામાં તકલીફ આંખોમાં બળતરા આંસુ નીકળવા જેવી સમસ્યાનો ભોગ બનવું પડે છે. ત્યારે આજરોજ ફરી એકવાર એક ખાનગી કંપની ગેસ લાઈન લીકેજ થતાં અફરાતફરીનો માહોલ સર્જાયો હતો.
જો કે આ ઘટના અંગેની જાણ નજીકના ફાયર સ્ટેશનને કરવામાં આવતા ફાયર ફાયટરો તાત્કાલિક અસરથી ઘટના સ્થળે દોડી આવ્યા હતા અને પાઇપ લીકેજને ડામવાના પ્રયાસો હાથ ધર્યા હતા. જો કે આ બનાવમાં અન્ય કોઇપણ પ્રકારના ગંભીર દુર્ઘટના નહીં બનતા તંત્રએ રાહતનો શ્વાસ લીધો હતો.
આપને જણાવી દઇએ કે આ પહેલા પણ વારંવાર ગેસ ગળતરના ઘટનાઓ પ્રકાશમાં આવી છે તેમછતાં આ મામલો સ્થાનિક તંત્ર દ્વારા કોઇપણ પ્રકારના શિક્ષાત્મક પગલાં નહીં લેવામાં આવતા લોકોમાં રોષ જોવા મળ્યો હતો અને આ મામલાની ગંભીરતાથી નોંધ લઇને કેટલાક નિયમો કડક બનાવવામાં આવે તેવી લોકમાંગ ઉઠવા પામી હતી.