મોટો નિર્ણય  / ગેસ સિલિન્ડર થયું સસ્તું અને બાઇક મોંઘી: 1 જુલાઇથી દેશમાં થયા 7 મોટા બદલાવ, આવક પર પડશે અસર 

• 1 જુલાઈ એટલે કે આજથી દેશભરમાં અનેક ફેરફારો થયા
• આધાર-PAN લિંક કરવા માટે 1000 રૂપિયાનો ચાર્જ ચૂકવવો પડશે
• કોમર્શિયલ ગેસ સિલિન્ડર સસ્તું, મોટરસાઇકલ ખરીદવી મોંઘી  

આજે 1 જુલાઈથી દેશભરમાં અનેક ફેરફારો થયા છે. આની સીધી અસર તમારા ખિસ્સા અને જીવન પર પડશે. એટલા માટે એ મહત્વનું છે કે, તમે પહેલાથી જ નિયમો જાણો. સરકાર દ્વારા કોમર્શિયલ ગેસ સિલિન્ડર આજથી સસ્તા થયા છે. બીજી તરફ, આધાર-PAN લિંક કરવા માટે, 1000 રૂપિયાનો ચાર્જ ચૂકવવો પડશે. તો મોટરસાઇકલ ખરીદવી મોંઘી બની અને સાથે સાથે 
KYC વગરના ડીમેટ ખાતા નિષ્ક્રિય કરવાનો નિર્ણય કરવામાં આવશે. 

કોમર્શિયલ ગેસ સિલિન્ડર સસ્તું

• કોમર્શિયલ ગેસ સિલિન્ડરના ભાવમાં ઘટાડો કરવામાં આવ્યો છે. દિલ્હીમાં 19 કિલોના કોમર્શિયલ સિલિન્ડરની કિંમત 2219 રૂપિયાથી ઘટીને 2021 રૂપિયા થઈ ગઈ છે. તેવી જ રીતે, કોલકાતામાં 2322 રૂપિયાની સામે હવે આ સિલિન્ડર 2140 રૂપિયામાં મળશે. મુંબઈમાં કિંમત 2171.50 રૂપિયાથી ઘટીને 1981 રૂપિયા અને ચેન્નાઈમાં 2373 રૂપિયાથી ઘટીને 2186 રૂપિયા થઈ ગઈ છે.
• દિલ્હીમાં ગેસ સિલિન્ડરના ભાવમાં 198 રૂપિયા, કોલકાતામાં 182 રૂપિયા, મુંબઈમાં 190.50 રૂપિયા અને ચેન્નાઈમાં 187 રૂપિયાનો ઘટાડો થયો છે. ગયા મહિને જૂનમાં કોમર્શિયલ સિલિન્ડરના ભાવમાં 135 રૂપિયાનો ઘ ટાડો કરવામાં આવ્યો હતો. જોકે, તેલ કંપનીઓ દ્વારા ઘરેલુ ગેસ સિલિન્ડરમાં કોઈ રાહત આપવામાં આવી નથી. દિલ્હીમાં 14.2 કિલોના ગેસ સિલિન્ડરની કિંમત 1003 રૂપિયા છે.

મોટરસાઇકલ ખરીદવી મોંઘી  

• 1 જુલાઈથી ટુ વ્હીલર મોંઘા થશે. હીરો મોટોકોર્પે તેની બ્રાન્ડ્સની કિંમતોમાં રૂ. સુધીનો વધારો કરવાનો નિર્ણય લીધો છે. Hero MotoCorp એ વધતી જતી મોંઘવારી અને કાચા માલના ભાવમાં વધારાને કારણે કિંમતોમાં વધારો કર્યો છે.

ક્રિપ્ટોકરન્સી માટે કરવામાં આવેલા વ્યવહારો પર TDS

• હવેથી, જો ક્રિપ્ટોકરન્સી માટે કરવામાં આવેલ ટ્રાન્ઝેક્શન વર્ષમાં રૂ. 10,000થી વધુ થાય છે, તો તેના પર 1% ચાર્જ લાગશે. આવકવેરા વિભાગે વર્ચ્યુઅલ ડિજિટલ એસેટ્સ (વીડીએ) માટે ટીડીએસના જાહેર કરવાના ધોરણોને સૂચિત કર્યા છે. તમામ NFT અથવા ડિજિટલ કરન્સી તેના દાયરામાં આવશે.

હવે આધાર-PAN લિંક કરવા માટે 1000 રૂપિયા ચાર્જ લાગશે

• આજથી એટલે કે 1 જુલાઈથી PAN ને આધાર સાથે લિંક કરવા માટે તમારે 1,000 રૂપિયા ચૂકવવા પડશે. 30 જૂન સુધી આ કામ 500 રૂપિયામાં થતું હતું. હવે તમારે 500 રૂપિયા વધુ ચૂકવવા પડશે.

KYC વગરના ડીમેટ ખાતા નિષ્ક્રિય કરવામાં આવશે

• ડીમેટ અને ટ્રેડિંગ એકાઉન્ટ્સ માટે KYC કરવાની છેલ્લી તારીખ 30 જૂન 2022 હતી. આવી સ્થિતિમાં, જો તમે એકાઉન્ટનું KYC કર્યું નથી, તો તે નિષ્ક્રિય થઈ જશે. આ સાથે તમે શેરબજારમાં વેપાર કરી શકશો નહીં. જો કોઈ વ્યક્તિ કંપનીના શેર ખરીદે છે, તો પણ આ શેર ખાતામાં ટ્રાન્સફર કરી શકશે નહીં.

ભેટ પર 10% TDS ચૂકવવો પડશે

• વ્યવસાયો પાસેથી મળેલી ભેટો પર 10% ના દરે સ્ત્રોત (TDS) પર કર કપાત કરવી પડશે. આ ટેક્સ ડોક્ટરો અને સોશિયલ મીડિયા પ્રભાવકો પર લાગશે. જો કે, સોશિયલ મીડિયા પ્રભાવકો માત્ર ત્યારે જ ટેક્સ વસૂલવામાં આવશે જો તેઓ કંપનીની માર્કેટિંગ સામગ્રી રાખે. જો તેઓ તેને પરત કરશે તો TDS વસૂલવામાં આવશે નહીં.

વધુ ટોલ ચૂકવવો પડશે

• દિલ્હી-દેહરાદૂન હાઈવે (NH 58) પર 1 જુલાઈ (ગુરુવારે બપોરે 12 વાગ્યાથી) ટોલ દરમાં વધારો કરવામાં આવ્યો છે. લોકડાઉનમાં ટોલના દરમાં વધારો કરવામાં આવ્યો નથી. 1 જુલાઈથી અહીંથી પસાર થનારાઓએ 5 રૂપિયાથી લઈને 80 રૂપિયા સુધીનો વધારાનો ખર્ચ ઉઠાવવો પડશે.