ગણપત યુનિવર્સિટીમાં ભાડે લીધેલી હોસ્ટેલમાં તોડફોડ થઇ હોવાનું સામે આવ્યું છે. વિદ્યાર્થીઓ અને રેક્ટર વચ્ચે તકરાર બાદ તોડફોડ કરવામાં આવી હતી. એક વિદ્યાર્થી ઇજાગ્રસ્ત થતા સારવાર અર્થે લઇ જવાયો હતો. જો કે સમગ્ર મામલે હજુ સુધી કોઇ પોલીસ ફરિયાદ કરવામાં આવી નથી.
વિદ્યાર્થી-રેક્ટર વચ્ચે વિવાદ
વાત જાણે એમ છે કે ગણપત યુનિવર્સિટીની નજીકમાં ભાડે રાખેલી હોસ્ટેલમાં રેક્ટર અને વિદ્યાર્થીઓ વચ્ચે વિવાદ થયો હતો. હોસ્ટેલના સંચાલકે વિદ્યાર્થીને સળિયાથી માર મારતા મામલો ઉગ્ર બન્યો હતો. વિદ્યાર્થીને બંને હાથમાં ગંભીર ઇજા પહોંચતા સારવાર અર્થે હોસ્પિટલમાં લઇ જવાયો હતો. મહત્વનું છે કે યુનિવર્સિટીએ રણેલા ગામ નજીક એક હોસ્ટેલ ભાડે રાખી છે. જ્યાં ડિપ્લોમામાં અભ્યાસ કરતા વિદ્યાર્થીઓ રહે છે. ગણપત યુનિવર્સિટી અને હોસ્ટેલ વચ્ચે 30 કિમીથી વધુનું અંતર છે.
ભીનું સંકેલાયુ
ગણપત યુનિવર્સિટી દ્વારા શિષ્યવૃત્તિમાં અભ્યાસ કરતા વિદ્યાર્થીઓને હોસ્ટેલમાં રાખવામાં આવ્યા છે. ભાડાની હોસ્પિટલ રાખવા મુદ્દે પણ સવાલો ઉભા થયા હતા, જો કે સમગ્ર મામલે ગણપત યુનિવર્સિટી કોઇ સ્પષ્ટતા કરવા તૈયાર નથી. જો કે સમગ્ર મામલે ભીનું સંકેલવાનો પ્રયાસ થયો હતો. હોસ્ટેલમાં મોટા પ્રમાણમાં તોડફોડ થઇ હતી વિદ્યાર્થી પણ ગંભીર રીતે ઇજાગ્રસ્ત થયો હતો. આ મામલે સંચાલકો અને વિદ્યાર્થીઓ દ્વારા કોઇ પોલીસ ફરિયાદ કરવામાં આવી નથી. ગણપત યુનિવર્સિટીના સંચાલકોએ મામલો થાળે પાડ્યો હતો.