‘તમારી કારમાં આગ લાગી છે’ કહી વેપારીનું ધ્યાન ભટકાવી કારમાંથી રૂપિયા ભરેલું પર્સ લઈ ગઠિયા રફુચક્કર થઈ ગયા
ગુજરાતીઓ રસ્તા પર ચેતજો
રસ્તા પર ગાડી રોકાવી બહાન બતાવી ચૂનો ચોપતા ગઠિયા
અમદાવાદ શહેરમાં આવી જ એક ગેંગ હાલ સક્રિય
જો કોઇ તમને કહે છે કે તમારી કારમાંથી ઓઇલ લીકેજ થાય છે અથવા પછી ટાયરની હવા નીકળી ગઇ છે, તમારી કારમાં આગ લાગી છે કે તમારા રૂપિયા પડી ગયા છે તો પહેલાં જ સાવધાન થઇ જજો. ક્યાંક એવું ન થાય કે અજાણ્યાની વાતમાં આવીને તમે તમારો કીમતી સામાન ગુમાવી ન દો, કેમ કે અમદાવાદ શહેરમાં આવી જ એક ગેંગ હાલ સક્રિય થઈ છે, જે કારચાલકોને મૂર્ખ બનાવી ગાડીમાં રાખેલા લેપટોપ, બેગ અને મોબાઇલ પર હાથ સાફ કરી જાય છે.
‘તમારી કારમાં આગ લાગી છે’ કહી 36 હજાર રોકડા લઈ ગઠિયા ફરાર
ચાંદખેડામાં આવેલ સ્વાગત બઁગલોઝમાં રહેતા દેવેન્દ્રિસંગ ભક્તાનાએ ગઠિયા વિરુદ્ધ ફરિયાદ નોંધાવી છે. દેવેન્દ્ર અસારવા ખાતે લાઇન્સ નામથી ટ્રાન્સપોર્ટનો વ્યવસાય કરે છે. દેવેન્દ્ર ગઈ કાલે નરોડા ખાતે આવેલ મેવાડ પાર્ટી પ્લોટમાં જવા માથે ઠક્કરનગરથી કૃષ્ણનગર તરફ જવાના રસ્તાથી પસાર થઈ રહ્યા હતા. આ દરમિયાન બે ગઠિયા તેમને ઇશારો કરતા હતા. તેમ છતાં દેવેન્દ્રએ તેમના તરફ કોઈ ધ્યાન આપ્યું ન હતું. ગઠિયાઓએ સતત તેમને ઈશારો કરતાં તેમણે રસ્તામાં કાર ઊભી રાખી હતી. દેવેન્દ્રએ કારનો કાચ ખોલ્યો ત્યારે ગઠિયાઓએ કહ્યું કે તમારી કારમાં આગ લાગેલી છે. આમ કહેતાં દેવેન્દ્ર કંઇક વિચારે તે પહેલાં જ તેઑ કારમાંથી ઊતરી ગયા અને કાર જોવા લાગ્યા, પરંતુ ક્યાંય પણ આગ લાગી ન હતી, પરંતુ કારનું બોનેટ ખોલીને જોતાં ઓઇલ ટપકતું હતું.
દેવેન્દ્ર કારમાં ચેક કરતા હતા તે દરમિયાન એક ગઠિયો કારમાં મૂકેલ બેગ લઇને ફરાર થઇ ગયો હતો. દેવેન્દ્રની બેગમાં 36 હજાર રોકડા અને તેની સાથે તેમના અન્ય દસ્તાવેજ પણ ચોરી ગયા, જેથી દેવેન્દ્રએ કૃષ્ણનગર પોલીસ સ્ટેશનમાં ગઠિયા વિરુદ્ધ ફરિયાદ નોંધાવી હતી.
જો કોઈ ઇશારો કરીને કહે કે ઓઇલ ટપકે છે તો કાર રોકતા નહીં
ગઠિયા તમને કારમાંથી ઓઇલ ટપકે છે તેવો ઇશારો કરે કે કોઈ પણ રાહદારી અથવા વાહનચાલક આમ કહે તો ચેતી જજો, કારણ કે તમારી નજર ચૂકવીને તેઓ કારમાં પડેલી કીમતી ચીજવસ્તુઓની ચોરી કરી લે છે. ઓઇલ ટપકે છે તેવો ઇશારો થાય તે પહેલાં કારના કાચ બંધ કરી દેજો. ત્યાર બાદ કારમાંથી નીચે ઊતરજો.
અકસ્માત કરીને આવ્યા છો તેમ કોઈ કહે તો પણ ચેતી જજો
આંગડિયા પેઢીની ઓફિસ કે પછી બેન્કથી રૂપિયા લઇને કારમાં જતા હો તો સીધા જ્યાં પહોંચવાનું છે ત્યાં પહોંચી જજો. જો કોઇ યુવકો કારને રોકી તમારી સાથે બબાલ કરવાની કોશિશ કરે તો કારના કાચ બંધ કરીને નીચે ઊતરજો અને કારને સેન્ટ્રલ લોક કરી દેજો. આગળ કાર અથડાવીને આવ્યા છો તેમ કહીને કેટલાક યુવકો તમારી સાથે બબાલ કરશે અને ત્યાર બાદ તેમની ગેંગની વ્યકિત નજર ચૂકવીને કારમાં પડેલી ચીજવસ્તુઓને ચોરીને નાસી જશે. કારમાં ચોરી થઇ ગયા બાદ બબાલ કરનાર યુવકો સમાધાન કરશે અને ફરી ધ્યાન આપીને કાર ચલાવવી તેવી સલાહ આપીને નાસી જશે.
કારચાલક અને રાહદારીઓએ સાવધ રહેવાની જરૂર
શહેરમાં આ ગેંગે તરખાટ મચાવ્યો છે, જોકે આ બનાવની ગંભીરતા સમજી કારચાલક-નાગરિકોએ સાવધ રહેવાની જરૂર છે અને તમારી કારમાં રોકડ રકમ, કીમતી સામાન જેવા કે સોના-ચાંદીના દાગીના, લેપટોપ, રિવોલ્વર જેવી વસ્તુ મૂકીને કાર રેઢી મૂકીને બહાર નીકળતાં પહેલાં સાવધાની રાખજો, નહિતર તમારે નુકસાન વેઠવાનો વારો આવી શકે છે