બ્રાઝિલની એક જેલમાં કેદીઓ વચ્ચે થયેલી ભયાનક ગેંગવોર અને હિંસક અથડામણમાં ઓછામાં ઓછા પ૭ કેદીઓનાં મોત થયાં છે. રિપોર્ટ અનુસાર ઉત્તર બ્રાઝિલમાં આવેલ પારા પ્રાંતની એક જેલમાં હરીફ ગેંગનાં જૂથો વચ્ચે થયેલી અથડામણમાં પ૭ કેદીઓનાં મોત થયાં છે.
જેલ વિભાગના એક અધિકારીના જણાવ્યા અનુસાર કેદીઓ વચ્ચે આ અથડામણ કેટલાય કલાક ચાલી હતી. આ અથડામણની ભયાનકતા એ હતી કે ૧૬ કેદીઓનાં માથા ઉડાવી દેવાયાં હતાં અને તેમનાં માથાં ધડથી અલગ થઇ ગયાં હતાં.
અહેવાલો અનુસાર પારા પ્રાંતની અલ્ટામિરા જેલમાં આ ભયાનક ઘટના ઘટી હતી. હુમલાનું કારણ બંને હરીફ ગેંગની જૂની અદાવત હોવાનું કહેવાય છે. બ્રાઝિલના એમેઝોન વિસ્તારમાં ડ્રગ્સની સ્મગલિંગને લઇને હરીફ જૂથોમાં અવારનવાર અથડામણ થતી રહે છે.
આ અથડામણ દરમિયાન જેલમાં આગ લગાવી દેવામાં આવી હતી અને ત્યાર બાદ કેટલાય કેદીઓના ગૂંગળામણને કારણે મોત થયાં હતાં. રિપોર્ટ અનુસાર અલ્ટામિરાની આ જેલમાં ક્ષમતા કરતાં બમણી સંખ્યામા્ં કેદીઓ બંધ છે. આ અથડામણ સ્થાનિક કમાન્ડો કલાસ-એ ગેંગ અને કમાન્ડો વર્મેલ્હો ગેંગ વચ્ચે થઇ હતી.
કમાન્ડો કલાસ-એ ગેંગના કેદીઓ પોતાના હરીફ જૂથ પર તૂટી પડયા હતા અને હાથમાં જે કાંઇ મળ્યું તેનાથી હરીફ ગેંગના કેદીઓને મોતને ઘાટ ઉતારી દીધા હતા. સુરક્ષા કર્મીઓએ પાછળથી સ્થિતિ પર કાબૂ મેળવી લીધો હતો અને ઘાયલોને હોસ્પિટલમાં દાખલ કરી દીધા હતા.