કચ્છ / ભુજમાં પરિણીતા સાથે ગેંગરેપ, પીડિતાને સારવાર માટે હોસ્પિટલ ખસેડાઇ, ગુજરાતમાં મહિલાઓ કેટલી સુરક્ષિત?

• ભૂજમાં પરિણીતા સાથે ગેંગરેપ
• 4 શખ્સોએ છરીની અણીએ દુષ્કર્મ આચર્યુ
• પીડિતાને સારવાર અર્થે ખસેડાઈ

ગુજરાતમાં રોજબરોજ દુષ્કર્મની ઘટનાઓમાં વધારો થઇ રહ્યો છે. સામુહિક દુષ્કર્મ અને વારંવાર દુષ્કર્મની ઘટનાઓ પણ વધી છે. કચ્છના ભુજમાં 4 શખ્સોએ છરીની અણીએ દુષ્કર્મ આચર્યું હતું. હાલ પીડિતાને સારવાર માટે હોસ્પિટલ ખસેડાઇ છે. ભુજ એ ડિવિઝન પોલીસ સ્ટેશનમાં આ મામલે ફરિયાદ નોંધાઇ છે.

ગુજરાતમાં છેલ્લા 5 વર્ષમાં દુષ્કર્મની 6000થી વધુ ઘટનાઓ

ગુજરાતમાં મહિલાઓ સુરક્ષિત છે એવી ગુલબાંગો ફૂંકવામાં આવે છે. પરંતુ ગત અઠવાડિયે વિધાનસભાના સત્રમાં સરકાર દ્વારા કહેવાતી શાંતિ અને સલામતિ મુદ્દે મોટો ઘટસ્ફોટ થયો હતો. છેલ્લાં પાંચ વર્ષમાં 6316 દુષ્કર્મની ઘટનાઓ અને સામૂહિક દુષ્કર્મની 72 ઘટનાઓ બની છે. આ આંકડાઓ રાજ્યના ગૃહ વિભાગે તાજેતરમાં વિધાનસભામાં રજુ કર્યાં હતાં. આ ઉપરાંત બળાત્કાર-સામૂહિક બળાત્કાર કેસના 209 આરોપીઓને પોલીસ હજુ સુધી પકડી શકી નથી.

(19 માર્ચે ફરિયાદ) અમદાવાદના પૂર્વ વિસ્તારમાં યુવતિ પર આધેડે બળાત્કાર કર્યો

અમદાવાદના રામોલ વિસ્તારમાં કિર્તી મોદી નામના આધેડે એક યુવતિ સાથે બળજબરી પૂર્ણ બળાત્કાર કર્યો છે. યુવતિએ ફરિયાદમાં લખાવ્યું છે કે, યુવતિ થોડા સમય પહેલા મોદી દંપતીના સંપર્કમાં આવી હતી. સંપર્કમાં આવ્યા બાદ યુવતિને પાડોશમાં રહેતા યુવક સાથે લગ્નની વાત ચલાવવાનું કહ્યું હતું અને તે દરમિયાન કિર્તી મોદીની તબિયત લથડી હતી અને આ યુવતિ તેમની મદદ કરવા આવી હતી. આ યુવતિ રાત્રે એકલી હતી ત્યારે 16 તારીખે કિર્તીભાઈએ તેને ધમકી આપીને બળાત્કાર કર્યો હતો અને આ મામલે કોઈને કહેશે તો તેની ચાર વર્ષની દીકરી સાથે પણ આ પ્રકારે વ્યવહાર કરશે તેવી ધમકી આપી હતી.

(18 માર્ચે ફરિયાદ) સુરતના કીમ વિસ્તારમાં 9 વર્ષની બાળકી સાથે દુષ્કર્મ 

સુરતના કીમ વિસ્તારમાં બાળકી સાથે દુષ્કર્મ થયાની ઘટના સામે આવી હતી. 9 વર્ષની બાળકી સાથે પાડોશમાં રહેતા શખ્સ દ્વારા દુષ્કર્મ આચરવામાં આવ્યું હતું. દુષ્કર્મ આચરનાર શખ્સે બાળકીને 50 રૂપિયા આપી મોઢું બંધ રાખવા જણાવ્યુ હતું તથા જો કોઈને જાણ કરશે તો તેને મારી નાખવાની ધમકી પણ શખ્સ દ્વારા આપવામાં આવી હતી. બાદમાં દુષ્કર્મ આચરનાર શખ્સ ફરાર થઈ ગયો હતો. કોસંબા પોલીસે આ અંગે ફરિયાદ નોંધીને વધુ તપાસ હાથ ધરી હતી.

(13 માર્ચે ફરિયાદ) વડોદરામાં સગીરાનું અપહરણ કરીને આચર્યુ દુષ્કર્મ

વડોદરામાં ધોરણ 12 માં અભ્યાસ કરતી સગીરાનું અપહરણ કરીને દુષ્કર્મ આચરવામાં આવ્યું હોવાની ઘટના સામે આવી હતી. વિશાલ પરમાર નામના શખ્સે સગીરાનું અપહરણ કરી મિત્રના ઘરે લઇ જઇને બે વખત દુષ્કર્મ આચર્યુ હોવાની ફરિયાદ ગોત્રી પોલીસ સ્ટેશનમાં નોંધાઈ હતી. સગીરાની માતાને શંકા જતાં સગીરાના મોબાઈલ ફોનમાં મેસેજ ચેક કરતા સમગ્ર મામલો સામે આવ્યો હતો. સગીરાની માતાની ફરિયાદના આધારે ગોત્રી પોલીસે પોસ્કોનો ગુનો નોંધીને આરોપી વિશાલ પરમારની અટકાયત કરી છે. સાથે જ વિશાલ સગીરાને જે બાઇક પર અપહરણ કરીને લઇ ગયો હતો તે બાઇક પણ પોલીસે કબજે કરીને કાયદેસરની કાર્યવાહી હાથ ધરી હતી.

(13 માર્ચે ફરિયાદ) રાજકોટમાં 13 વર્ષીય કિશોરી પર 2 કિશોર દ્વારા દુષ્કર્મ

રાજકોટમાં એક ચોંકાવનારી ઘટના સામે આવી હતી. 13 વર્ષીય કિશોરી પર 2 કિશોર દ્વારા દુષ્કર્મ આચર્યાની ઘટના સામે આવી હતી. 12 વર્ષના 2 કિશોરે કિશોરી પર દુષ્કર્મ આચર્યું હતું. કાલાવડ રોડ પરના એપાર્ટમેન્ટમાં રહેતા 2 કિશોરે શ્વાન રમાડવાના બહાને અગાસી પર દુષ્કર્મ આચર્યું હતું. 13 વર્ષીય કિશોરીએ ઘટનાની જાણ માતાને કરી હતી. આ મામલે પોલીસે ગુનો નોંધયો હતો.

(4 માર્ચે ફરિયાદ) ખેડામાં બાળકી સાથે 45 વર્ષના શખ્સે આચર્યું દુષ્કર્મ

ખેડાના લસુન્દ્રા વાજપેયી નગર નજીક બાળકી સાથે દુષ્કર્મની ઘટના બની હતી. જેમાં નર્મદા નેહેર નજીક ઘરમાં બાળકી સાથે દુષ્કર્મ આચર્યું હતું. બાળકીની માતાને શંકા જતા સમગ્ર મામલો સામે આવ્યો છે. 45 વર્ષના શખ્સ પર દુષ્કર્મનો આરોપ લગાવાયો હતો. ત્યારબાદ કઠલાલ પોલીસે સમગ્ર મામલે કાર્યવાહી હાથધરી હતી.