કુખ્યાત બસ્તીખાનની ગેંગ વર્ષો પછી ગાંધીનગરમાં આવતાની સાથે જ પોલીસે ધાડ પાડીને 6 શખ્સને ઝડપી લીધા, બસ્તીખાનની ગેંગ કોઈ ગુનાને અંજામ આપે તે પહેલા જ પોલીસે કરી ધરપકડ
ધાડ પાડે તે પહેલા જ ઝડપી લીધા
6 શખ્સની ધરપકડ કરી
એક મુખ્ય શખ્સ નાસી જવામાં સફળ
ઘણી વખત ક્રાઈમ થતા પહેલા જ તેને રોકી શકાય છે. અને આવું ગાંધીનગર પોલીસે સાબિત કરી દીધું છે. ગાંધીનગર ક્રાઈમ બ્રાન્ચે એક ગેંગ ઝડપી પાડી છે. આ ગેંગ લૂંટ, હત્યા, ખંડણી અને મારા મારી માટે કુખ્યાત છે. આ ગેંગના છ સભ્ય ગઈકાલે ગાંધીનગરમાં આવ્યા હતા. અને કોઈ મોટી ક્રાઈમની ઘટનાને અંજામ આપે તે પહેલા ગાંધીનગર ક્રાઈમ બ્રાન્ચે 6 શખ્સની ધરપકડ કરી લીધી છે. વર્ષો પછી ગાંધીનગરમાં ધાડનાં ગુનાને અંજામ આપવા ફરીવાર આવ્યો હતો. કોઈ ગુનાને અંજામ આપે તે પહેલા પોલીસને જાણ થઈ ગઈ. પોલીસે આ ગેંગના છ સભ્યની ધરપકડ કરી છે. જોકે કુખ્યાત ગેંગસ્ટર બસ્તી ખાન ભાગી જવામાં સફળ રહ્યો હતો.
થોડા વર્ષ પહેલાની વાત છે. ગાંધીનગરમાં દેવજી અને સલીમની હત્યા થઈ હતી. આ ડબલ મર્ડરમાં કુડાસણના જશુ પટેલનું નામ સામે આવ્યુ હતું. જશું પટેલે સલીમ અને દેવજીને જીવતા ભૂંજી નાખી હત્યા કરી દીધી હતી. બાદમાં બસ્તીખાને સોપારી લઈને જશું પટેલનું ઢીમ ઢાળી દેતા ગાંધીનગરમાં ચકચાર મચી જવા પામી હતી. બસ્તીખાનની આખી ગેંગ છે. આ ગેંગ હત્યા લૂંટ અને મારમારી જેવી ઘટનાને અંજામ આપે છે. ગઈકાલે ગાંધીનગરમાં બસ્તીખાનની એન્ટ્રી થતા કંઈક નવા જૂનીના એંધાણ હતા. જો કે ઘટના પહેલા પોલીસને જાણ થતા આ ગેંગના 6 શખ્સને પોલીસે ઝડપી લીધા છે.
પૈસાની લેતી દેતી મામલે લૂંટના ઇરાદે આવ્યા હોવાનું બહાર આવ્યું
ધરપકડ બાદ ક્રાઇમ બ્રાંચે કડકાઈથી પૂછતાછ કરી હતી. જેમાં આરોપીઓએ ગાંધીનગરના દર્શનસિંહ ઉર્ફે ગોપી ચાવડા નામના વ્યક્તિ પાસેથી પૈસાની લેતી દેતી મામલે લૂંટના ઇરાદે આવેલા હોવાનું જણાવ્યુ હતું. આરોપીઓએ પોતાના નામ ફિરદોશ ઈસ્માઈલ ખીલજી, ગૌતમ મકવાણા, ધર્મેશ પાટડીયા, અલ્પેશ કતપરા, કમલ ઉર્ફે કમલેશ વસાવા, નીકીન પટેલ જણાવ્યા છે. આ તમામ આરોપીઓ પાસેથી ઘાતક હથિયાર પણ મળી આવ્યા હતા.
કુખ્યાત ગેંગનો લીડર બસ્તીખાન પોલીસ પકડમાંથી નાશી છૂટવામાં સફળ રહ્યો છે. પોલીસે તેણે પકડવા નાકાબંધી કરી સૂચના જાહેર કરી દીધી છે. ત્યારે ઝડપાયેલા તમામ શખ્સના રીમાન્ડ મેળવી આજે પૂછપરછ કરાશે.