ગાંધીનગર મહાનગરપાલિકાની ચૂંટણીના પરિણામ આજે જાહેર થઇ રહ્યા છે. ત્યારે શરૂઆતી વલણમાં ભાજપ આગળ દેખાઇ રહ્યું છે. કોંગ્રેસ અને આપ પાછળ જણાઇ રહ્યા છે.
ગાંધીનગર મનપાની ચૂંટણીનું પરિણામ
ગાંધીનગર કોંગ્રેસનો ગઢ છે અને રહેશેઃ ઉત્પલ જોશી
વોર્ડ નંબર નવમા ભાજપની આખી પેનલ જીતી
ગાંધીનગરના વોર્ડ નંબર-9ના કોંગ્રેસના ઉમેદવાર ઉત્પલ જોશીએ દાવો કર્યો હતો કે ગાંધીનગર કોંગ્રેસનો ગઢ છે અને રહેશે. અમે પ્રજા વચ્ચે કપરા કાળમાં કામ કર્યા છે. પ્રજાનો વિશ્વાસ અમારી સાથે છે. હિનાબેન પટેલે કહ્યું કે, 32 સીટો પર કોંગ્રેસનો ભવ્ય વિજય થશે. જોકે તેમનો આ દાવો ઉંધો પડ્યો છે. વોર્ડ નંબર-9ની આખી પેનલ ભાજપે જીતી લીધી છે.
મહત્વનું છે કે, 3 ઓક્ટોબરે ગાંધીનગર મનપાનું મતદાન યોજાયું હતું. જેમાં સરેરાશ 56 ટકા જેટલું મતદાન નોંધાયું હતું. 11 વોર્ડની 44 બેઠકો માટે ચૂંટણી યોજાઈ હતી. ત્યારે આજે ગાંધીનગરના 5 સ્થળો પર મતગણતરી ચાલી રહી છે. કુલ 162 ઉમેદવારોનું ભાવિ નક્કી થશે. ભાજપ, કોંગ્રેસ અને AAPના ઉમેદવારો મેદાને છે. તો BSPના 6 અને NCPના 1 ઉમેદવાર ચૂંટણી લડ્યા હતા. 10 અપક્ષ ઉમેદવારો પણ ચૂંટણી લડ્યા હતા. તમામ રાજકીય પક્ષો જીત માટે દાવો કરી રહ્યા છે.