જય હો! / VIDEO: નાસિક ઢોલ, ફૂલવર્ષા વચ્ચે PM મોદીની ગ્રાન્ડ એન્ટ્રી, કમલમનો વીડિયો થયો વાયરલ

• વતનમાં વડાપ્રધાનનું ભવ્ય સ્વાગત
• કમલમમાં વૈદિક મંત્રોચ્ચાર સાથે એન્ટ્રી
• પીએમ મોદીના આગમનમાં દિગ્ગજોએ પહેરી લાલ ટોપી  

વતનમાં બે વર્ષ બાદ પીએમ મોદી પરત ફરતા કાર્યકરો અને જનતાનો હરખ સમાતો નથી.  એરપોર્ટથી કમલમ સુધીના રોડ શોમાં તો પીએમ મોદી જનતાનો પ્રેમ જોઇને ગદ ગદ થઇ ગયા.તેઓના ચહેરા પર જીતની ખુશી અને લોકો તરફથી મળતો પ્રેમ સ્પષ્ટ જોવા મળી રહ્યો હતો.  ત્યારે જેવા પીએમ મોદી ગાંધીનગર કમલમ કાર્યાલયમાં એન્ટર થયા ત્યારે  રાજા મહારાજાને છાજે તેવુ ભવ્યાતિભવ્ય સ્વાગત કરવામાં આવ્યું,

નાસિક ઢોલથી થઇ શરુઆત

પીએમ મોદી કમલમની નજીક પહોંચવા આવ્યા ત્યારે બંને બાજુ નાસિક ઢોલ વાગી રહ્યા હતા. ઢોલ નગારાના નાદની વચ્ચે પીએમ મોદીની ભવ્ય એન્ટ્રી થઇ. આ દરમિયાન પીએમ મોદી બંને હાથે વિક્ટરી સાઇન દર્શાવતા જોવા મળ્યા હતા.ગુજરાત વિધાનસભાની ચૂંટણી આવતી હોવાથી જન્મ ભૂમિમાં બે વર્ષની બાદનું આ આગમન જોરોશોરોથી કરવામાં આવ્યુ હતું.  ગુજરાત વિધાનસભાની ચૂંટણીનું તો હજી રણશિંગુ ફુંકાયુ છે પરંતુ ચાર રાજ્યોમાં જીતની ખુશી પીએમ મોદીના ચહેરા પર સ્પષ્ટ જોવા મળી.

પરંપરાગત પોશાકમાં ગરબાની રમઝટ

પીએમ મોદી જેવા કમલમના ગેટ તરફ પહોંચવા આવ્યા ત્યાં જ સફેદ કેડિયુ, ધોતી અને માથે સાફો પહેરીને યુવાનોએ ગરબા રમીને પીએમ મોદીનું સ્વાગત કર્યું,, હાથમાં છત્રી અને પરંપરાગત વેશભૂષામાં સજજ યુવાનોએ ઢોલના તાલે ગરબે રમતા જોવા મળ્યા અને આ પ્રકારે પીએમ મોદીનું અનોખુ સ્વાગત કર્યું.

વૈદિક મંત્રોચ્ચાર સાથે સ્વાગત

પીએમ મોદી જ્યારે કમલમ તરફ જવા રવાના થયા ત્યારે ચોમેરથી પુષ્પ વર્ષા કરવામાં આવી હતી. પીએમ મોદી હાથ જોડીને કાર્યકરોનું અભિવાદન કરી રહ્યા  હતા. તે સમયે બંને બાજુએથી પુષ્પ વર્ષા થતા નયનરમ્ય નજારો જોવા મળ્યો હતો. વળી આટલુ ઓછુ હોય તેમ બ્રાહ્મણો દ્વારા વૈદિક મંત્રોચ્ચાર પણ કરવામાં આવી રહ્યા હતા. એટલે જ્યારે રાજા પ્રજાની ખબર પૂછવા આવે ત્યારે જે માહોલ હોય, જે આગતા સ્વાગતા હોય તેવી આગતા સ્વાગતા પીએમ મોદીના આગમન સમયે જોવા મળી. એક ભગવાધારી એટલે કે કેસરિયાને છાજે તેવી  વૈદિક મંત્રોચ્ચાર સાથે ગ્રાન્ડ એન્ટ્રી કરવામાં આવી હતી.

દિગ્ગજોએ કર્યુ પીએમ મોદીનું સ્વાગત

કમલમમાં એન્ટર થતા જ નીતિન પટેલ, રુપાણી સહિતના દિગ્ગજો દ્વારા પુષ્પ આપીને પીએમ મોદીનું સ્વાગત કર્યુ. કાર્યકરો પીએમ મોદીને પગે લાગતા જોવા મળ્યા હતા. આ દરમિયાન સ્વાગતમાં ઉપસ્થિત સૌ કોઇએ પીએમ મોદી જેવી જ લાલ ટોપી પહેરી હતી. પીએમ મોદીની મુલાકાતમાં લાલ ટોપી એક આકર્ષણનું કેન્દ્ર બની હતી.