ગાંધીનગર મનપાની સામાન્યસભા મેયર પદ માટે ભાજપ-કોંગ્રેસ આમને-સામને

આજે ગાંધીનગર મહાનગરપાલિકાની સામાન્ય સભા યોજાશે જેમાં મેયર પદ માટે ચૂંટણી કરવામાં આવશે.મહત્વનું છે કે મુખ્ય ચૂંટણીમાં  ભાજપ કોંગ્રેસ પાસે 16-16 સીટ હતી પરંતુ જે તે સમયે કોંગ્રેસના પ્રવિણ પટેલ મેયર પદ માટે ભાજપમાં જોડાયા હતા. 

તેઓ ભાજપમાં જોડાઈને મેયર બનતા કોંગ્રેસે પક્ષાંતર ધારા હેઠળ કેસ કર્યો હતો.કેસની વચ્ચે પણ પ્રવિણ પટેલે પોતાની મેયર પદની ટર્મ પુરી કરી. જોકે 2.5 વર્ષની ટર્મ પુરી થતા ફરીથી ચૂંટણી યોજાવા જઈ રહી છે અને આ વખતે મેયરની બેઠક મહિલા માટે અનામત છે. હાલ તો ભાજપ પાસે પ્રવિણ પટેલ સહિત 17 સભ્યોનું સંખ્યા બળ છે અને કોંગ્રેસ પાસે 15 સભ્યોનુ સંખ્યાબળ છે.

આપને જણાવી દઇએ કે ગાંધીનગર મનપાની 32 બેઠકોમાંથી 17 બેઠક ભાજપ પાસે અને 15 બેઠક કોંગ્રેસ પાસે છે. જેની એક સામાન્ય સભા આગામી 5 નવેમ્બરના રોજ મળવાની છે.

મહાનગરપાલિકાના વર્તમાન હોદ્દેદારોની અઢી વર્ષની ટર્મ આ સપ્તાહે પૂર્ણ થતાં આ સામાન્ય સભાનું આયોજન કરવામાં આવેલ છે. આ સાથે જ ચૂંટણીમાં ક્રોસ વોટિંગ ન થાય તે પહેલા ભાજપ અને કોંગ્રેસના સભ્યોને અજ્ઞાત સ્થળે લઈ જવામાં આવ્યા છે. ત્યારે હવે જોવું જ રહ્યું કે મેયર પદનો તાજ કોના શિરે જાય છે.