ગાંધીનગરમાં આજથી ટ્રાફિક નિયમનમાં ચલણ પ્રથા શરૂ થઈ ગઈ છે. હવેથી ગાંધીનગરમાં જો તમે ટ્રાફિક નિયમોનો ભંગ કર્યો તો દંડ ભરવાનો વારો આવશે. ટ્રાફિક નિયમોનું ભંગ કરનાર વાહન ચાલકને ઈ-ચલણ ફટકારાશે. જેમાં રાજ્યના કોઈપણ શહેરના વાહન ચાલકને દંડ ફટકારવામાં આવશે.
ઉલ્લેખનીય છે કે અગાઉ આરટીઓ સાથે રાજ્યવ્યાપી ઓનલાઈન જોડાણની સુવિધા નહીં હોવાથી ગાંધીનગર-જીજે-૧૮ પાસીંગ સિવાયના વાહનચાલકો બચી જઈ બિનદાસ્ત રહેતા હતા. પરંતુ હવે આ સમગ્ર સિસ્ટમ રાજ્યવ્યાપી જોડાણ ધરાવતી થઇ જતાં બહારના વાહન ચાલકોને પણ ટ્રાફિકના ભંગ બદલ દંડ ફટકારવામાં આવશે.
આપને જણાવી દઇએ કે રાજ્યના પાટનગર ગાંધીનગરમાં પણ ટ્રાફિક નિયમો તોડનારને ત્યાં ઇ-મેમો મોકલવામાં આવતો હતો. જો કે ચૂંટણી સમયે અચાનક આ કાર્યવાહી બંધ કરવામાં આવી હતી.
જો કે આજથી ગાંધીનગરમાં ટ્રાફિક નિયમોનો ભંગ કરનાર સામે કડક કાર્યવાહી હાથ ધરવામાં આવશે. શહેરમાં 232 કેમેરા દ્વારા બાજ નજર રાખવામાં આવશે અને ટ્રાફિકના નિયમોનું ઉલ્લંઘન કરનારને મેમો ફટકારવામાં આવશે.