ભાજપ પ્રદેશ પાર્લામેન્ટરી બોર્ડની બેઠકનો અંતિમ દિવસ, આ બેઠકો માટેના ઉમેદવારો....

ગાંધીનગર: ભાજપ પ્રદેશ પાર્લામેન્ટરી બોર્ડની ચાલી રહેલી બેઠકનો આજે અંતિમ દિવસ છે. આજની બેઠકમાં લોકસભાની ચાર બેઠકો રાજકોટ,કચ્છ, પોરબંદર અને જૂનાગઢ માટે સંભવિત ઉમેદવારોના નામ પર ચર્ચા થશે.

આજે બપોરે એક વાગ્યા સુધી પ્રદેશ ચૂંટણી સમિતિની બેઠક મળશે બેઠકમાં સંભવિત ઉમેદવારોની યાદી તૈયાર કરવામાં આવશે અને બાદમાં પ્રદેશ હાઈકમાન્ડ સંભવિત ઉમેદવારોના નામની યાદી લઈને દિલ્હી જશે.



ગઇકાલે ઉત્તર ગુજરાતની કેટલીક બેઠકો બાબતે થઇ ચર્ચા
આપને જણાવી દઇએ કે, ભાજપ પાર્લામેન્ટ્રી બોર્ડ બેઠકનો બીજા દિવસે પાટણ બેઠક માટે ચર્ચા પૂર્ણ થઈ છે. પાટણ બેઠક માટે ચાર દાવેદારોની પેનલ બનાવાઈ છે. જેમાં પૂર્વ સાંસદ નટુજી ઠાકોર, ધારાસભ્ય ભરતસિંહ ડાભી, પૂર્વ ધારાસભ્ય ભાવસિંહ રાઠોડ અને જુગલ ઠાકોરના નામ સામેલ છે.



અત્રે જણાવવાનું કે, પાટણ બેઠક પરથી વર્તમાન સાંસદ લીલાધર વાઘેલાએ નાદુરસ્ત તબિયતના કારણે દાવેદારી ન કરતા નવા ચહેરાને તક મળશે. જો કે, એ નવો ચહેરો કોણ હોઈ શકે તે આગામી સમયમાં ખબર પડશે.

રાજકોટ બેઠક પરથી આ નેતા થઇ શકે રિપીટ
આગામી લોકસભાની ચૂંટણીને લઈને ભાજપ અને કોંગ્રેસ દ્વારા બેઠકો કરવામાં આવી રહી છે. ત્યારે ગાંધીનગરમાં ભાજપની પાર્લામેન્ટરી બોર્ડની બેઠક યોજાઈ. આ બેઠકમાં રાજકોટ લોકસભાની ચૂંટણીને લઈને ચર્ચા કરવામાં આવશે.


સૂત્રો પાસેથી મળતી માહિતી મુજબ ભાજપ દ્વારા રાજકોટ બેઠક મોહન કુંડારિયાને રિપીટ કરવામાં આવશે. મહત્વનુ છે કે, મોહન કુંડારિયા ટંકારાના 4 વખત ધારાસભ્ય પણ રહેલા છે અને તેઓ નરેન્દ્ર મોદીની સરકારમાં રાજ્યકક્ષાના મંત્રી પણ રહી ચૂક્યા છે. ત્યારે હવે ભાજપ દ્વારા તેમને ફરીથી ટિકિટ આપવામાં આવે તેવી ચર્ચાઓ ચાલી રહી છે.