ગાંધીનગર: મુખ્યમંત્રી વિજય રૂપાણીની અધ્યક્ષતા હેઠળ બુધવારે કેબિનેટ બેઠક યોજાશે. આ બેઠકમાં રાજ્યના વર્તમાન મુદ્દાઓ પર ખાસ ચર્ચા વિચારણા કરવામાં આવશે. ખાસ કરીને વરસાદ ખેંચાતા ઉભી થયેલી સ્થિતિ અંગે પણ આ બેઠકમાં સમીક્ષા કરવામાં આવશે.
ઉલ્લેખનીય છે કે સિંચાઈ અને પીવાના પાણીના સ્ત્રોતોની સ્થિતિ અંગે પણ આ બેઠકમાં ચર્ચા વિચારણા કરવામાં આવશે. ખેડૂતોને સિંચાઈનું પાણી પુરૂ પાડવા બાબત સહિત વાઇબ્રન્ટ ગુજરાતની તૈયારીઓ અંગે પણ ચર્ચા કરવામાં આવશે. સરકારની નીતિ વિષયક બાબતો અને આગામી આયોજનો અંગે પણ ચર્ચા કરવામાં આવનારી છે.
આપને જણાવી દઇએ કે આગામી સમયમાં ગુજરાતની ઓળખ સમાન વાઇબ્રન્ટ ગુજરાત સમિટનું આયોજન કરવામાં આવનાર છે ત્યારે આ મુદ્દે સરકારે અત્યારથી જ કામગીરી શરૂ કરી છે. જેને અનુસંધાને આવતીકાલે યોજાનારી કેબિનેટ બેઠકમાં ચર્ચા કરવામાં આવશે.
મહિનાના દર બુધવારના રોજ રાજ્યકક્ષાએ અને કેન્દ્રીય કક્ષાએ કેબિનેટ બેઠકનું આયોજન કરવામાં આવે છે. આ બેઠકમાં રાષ્ટ્રીય લેવલે દેશના વડાપ્રધાનના અધ્યક્ષ સ્થાને અને રાજ્ય કક્ષાએ રાજ્યના મુખ્યમંત્રીના અધ્યક્ષસ્થાને આ બેઠકનું આયોજન કરવામાં આવે છે. જેમાં સમગ્ર અઠવાડિયા દરમિયાન રાજ્યમાં બનેલ ઘટનાઓનો તાગ મેળવવામાં આવે છે અને ત્યારબાદ પ્રશ્નોનો ઉકેલ લાવવા ચર્ચા પણ કરવામાં આવતી હોય છે.