વલસાડ જિલ્લામાં છેલ્લા કેટલાક દિવસથી તોફાની વરસાદ ત્રાટકી રહ્યો છે. વલસાડમાં અનરાધાર વરસાદને લઇને જિલ્લાભરમાં જળપ્રલય જેવી સ્થિતિ છે. બીજી બાજુ તંત્ર પણ શક્ય તેટલા પ્રયાસો કરી રહ્યું છે. પરંતુ અવકાશી આફત વચ્ચે તંત્રનો પનો ટૂંકો પડતો હોય તેવું લાગી રહ્યું છે આ દરમિયાન વલસાડ અને આણંદ જિલ્લામાં યુવકની કાબિલેદાદ કામગીરી સામે આવી છે. જેમાં વલસાડમાં પૂરમાં ફસાયેલા 4 લોકોને યુવકે જીવના જોખમે બચાવી લીધા હતા. જ્યારે આણંદ જિલ્લામના સારોલ પંથકમાં શાળાના બાળકોને દોરડું બાંધી રેસ્ક્યુ કરી બહાર લાવવામાં આવ્યા હતા.
વલસાડમાં પૂરમાં ફસાયેલા 4 લોકોને યુવકે બચાવ્યા
વલસાડ અને આણંદ સહિત ગુજરાતના અનેક જિલ્લામાં સાંબેલાધાર વરસાદને લઇને તારાજી અને હેરાનગતિના દ્રશ્યો સર્જાયા છે. વલસાડમાં ભારે વરસાદને લીધે નવા નીરની આવક થતાં ધરમપુરની માન નદી અને ઔરંગા નદીમા ઘોડાપૂર આવ્યા હતા. આ દરમિયાન વલસાડમાં પૂરમાં ફસાયેલા 4 લોકોને યુવકે પોતાના જીવની પરવાહ કર્યા વગર બચાવી લીધા હતા. ઔરંગા નદીમાં આવેલા પૂરમાં 4 લોકો ફસાયા હતા. કાશ્મીરાનગર-બરૂડિયાવાડ વિસ્તારમાં અચાનક પાણી આવતા સ્થાનિકો ફસાયા હતા. જે અંગે જાણ થતાં યુવકે પોતાના જીવના જોખમે 4 લોકોને સુરક્ષિત બહાર કાઢ્યા હતા. જે યુવાનની કામગીરીને સ્થાનિક લોકો બિરદાવી રહ્યા છે.
આણંદના સારોલમાં વિદ્યાર્થીઓનું રેસ્ક્યૂ
બીજી તરફ આણંદ જિલ્લાના બોરસદ પંથકમાં પણ મુશળધાર મેઘો વરસતા પાણી... પાણી...ના દ્રશ્યો સર્જાયા હતા. આ દરમિયાન ધોધમાર વરસાદને લઈને સારોલ ગામમાં માર્ગો પર નદીના વહેણ જેટલું પાણી જેવા મળ્યું હતુ. જાણે માર્ગો પર નદીઓ વહી હોય તેવી સ્થિતિ જન્મી હતી. જેમાં શાળામાં અભ્યાસ અર્થે ગયેલા બાળકો અટવાયા હતા. જે બાળકોને દોરડા વડે રેસ્ક્યુ કરી બહાર લાવવામાં આવ્યા હતા. નોંધનિય છે કે, ગાજણા ગામના તળાવમાં નવા નીરની આવક થતાં તાળાવ છલકાયું હતું જેને લઈને નીચાણવાળા વિસ્તારોમાં લોકોના ઘરોમાં પાણી ઘુસ્યા હતા. ત્યારબાદ વરસાદે વિરામ લેતા પાણી ઓસર્યા હતા જેને લઇને લોકોએ રાહતનો શ્વાસ લીધો હતો.
વડોદરામાં વન વિભાગ દ્વારા મગરનું રેસ્કયુ
વધુમાં વડોદરામાં વરસાદના કારણે પાણી ભરાયા હતા આ દરમિયાન પાણી ભરાતાં મગર નીકળવાનો સિલસિલો શરુ થયો હોય તેમ વાઘોડિયા પૂજા પાર્ક ગાર્ડન પાસે ગઈકાલે મગર આવ્યો હતો. મગર આવતા લોકોમાં ફફડાટ ફેલાયો હતો. તો બીજી તરફ મગરને જોવા લોકોના ટોળા જામ્યા હતા. જેમાં લોકોએ વનવિભાગની ટીમને જાણ કરતા વન વિભાગની ટીમે દોડી જઈ સાડા ચાર ફૂટ મગરનું રેસ્કયુ કર્યું હતું.