નિવેદન / ગુજરાતમાં બે મહત્વપૂર્ણ હાઇવેને લઈને ગડકરીનો વાયદો: એક માર્ચ તો બીજો જૂનમાં થઈ જશે તૈયાર, જાણો વિગત

• કેન્દ્રીયમંત્રી નીતિન ગડકરી ગુજરાતની મુલાકાતે 
• નીતિન ગડકરીએ અમદાવાદ-ધોલેરા એક્સપ્રેસ-વેની કરી સમીક્ષા
• ચિલોડા-હિંમતનગર હાઇવે માર્ચ મહિનામાં થશે પૂર્ણઃ નીતિન ગડકરી

કેન્દ્રીય સડક પરિવહન મંત્રી નીતિન ગડકરી ગુજરાતની મુલાકાતે આવ્યા છે. ગતરોજ ગાંધીનગર ખાતે ઉચ્ચ સ્તરીય બેઠક યોજ્યા બાદ આજે નીતિન ગડકરીએ અમદાવાદ ધોલેરા એક્સપ્રેસ-વેની સમીક્ષા કરી હતી. આ દરમિયાન તેમણે ચિલોડા-હિંમતનગર હાઇવે અને સોમનાથ-ભાવનગર હાઇવેને લઈને મહત્વનું નિવેદન આપ્યું હતું.

ચિલોડા-હિંમતનગર હાઈવેનું 95 ટકા કામ પૂર્ણઃ નીતિન ગડકરી
નીતિન ગડકરીએ જણાવ્યું હતું કે, ચિલોડા-હિંમતનગર હાઈવેનું 95 ટકા કામ પૂર્ણ થઈ ગયું છે. હવે ઇલેક્ટ્રિક હાઇવે તરફ વિચારી રહ્યાં છીએ. આ હાઈવેનું કામ ઝડપી થઈ રહ્યું છે. ચિલોડા-હિંમતનગર હાઈવેનું કામ માર્ચ મહિના સુધીમાં પૂર્ણ થઈ જશે.

જૂન મહિના સુધીમાં પૂર્ણ થઈ જશે સોમનાથ-ભાવનગર હાઈવેનું કામઃ ગડકરી
સોમનાથ-ભાવનગર હાઈવેને લઈને નીતિન ગડકરીએ જણાવ્યું કે, સોમનાથ-ભાવનગર હાઈવેનું કામ કરી રહેલા કોન્ટ્રાક્ટરને ટરમિનેટેડ કરીને બીજા કોન્ટ્રાક્ટરને કામ સોંપ્યું છે.  આ કામ જૂન મહિના સુધીમાં પૂર્ણ થઈ જશે. 

ટોલ વસૂલવા નવી સિસ્ટમ લાગુ કરાશે
FASTag વિશે જણાવતા તેમણે કહ્યું કે, માર્ગ પરિવહન અને ધોરીમાર્ગ મંત્રાલય હાઈવે પર ટોલ વસૂલાતની એક નવી પ્રણાલી સ્થાપિત કરવા માટે તૈયાર છે, જે ટોલ પ્લાઝા અને FASTagsનું સ્થાન લેશે. ઓટોમેટિક નંબર પ્લેટ રીડર (ANPR) તરીકે ઓળખાતી આ સિસ્ટમ વાહનની નંબર પ્લેટ સ્કેન કરીને ટોલ કાપશે. આ નવી સિસ્ટમ સમગ્ર દેશમાં ટોલ પ્લાઝા પર લાગુ કરવામાં આવશે. આ સિસ્ટમ દ્વારા વાહનોની નંબર પ્લેટ સ્કેન કરવામાં આવશે અને તે પછી સીધા બેંક ખાતામાંથી ટોલ ટેક્સ કપાશે. આ માટે વાહનોની નંબર પ્લેટમાં પણ ફેરફાર કરવામાં આવશે.

નીતિન ગડકરીની અધ્યક્ષતામાં યોજાઈ હતી ઉચ્ચ સ્તરીય બેઠક
અત્રે ઉલ્લેખનીય છે કે, ગતરોજ ગાંધીનગર ખાતે કેન્દ્રીય સડક પરિવહન મંત્રી નીતિન ગડકરીની અધ્યક્ષતામાં તથા મુખ્યમંત્રી ભૂપેન્દ્ર પટેલ, સાંસદ સી.આર.પાટીલ તથા સંબંધિત ઉચ્ચાધિકારીઓની ઉપસ્થિતિમાં રાજ્યમાં કાર્યરત વિવિધ મહત્વાકાંક્ષી નેશનલ હાઇવે પ્રોજેક્ટ્સ બાબતે એક ઉચ્ચ સ્તરીય સમીક્ષા બેઠક યોજાઈ હતી. ઉચ્ચ સ્તરીય બેઠકમાં રાજ્યના વિવિધ હાઈવે પ્રોજેક્ટ્સ પર ચર્ચા કરવામાં આવી હતી. આ ઉપરાંત આ બેઠકમાં અમદાવાદ ધોલેરા એક્સપ્રેસ-વે, દિલ્હી-મુંબઈ એક્સપ્રેસ-વેની સમીક્ષા કરવામાં આવી હતી. તો રાજ્યના અન્ય ફોરલેન હાઈવેની કામગીરીનો ચિતાર મેળવવામાં આવ્યો હતો.

મહત્વકાંક્ષી પ્રોજેક્ટનો મેળવ્યો હતો ચિતાર
નીતિન ગડકરીની અધ્યક્ષતામાં યોજાયેલી બેઠકમાં અમૃતસર-જામનગર એક્સપ્રેસ વે અને થરાદ-અમદાવાદ એક્સપ્રેસ વે, અમદાવાદ-શામળાજી સિક્સ લેન, ભાવનગર-સોમનાથ ફોરલેન, પાલનપુર-સામખીયાળી, મોરબી-સામખીયાળી ફોરલેન, ધરોઈ-અંબાજી ફોરલેનની કાર્ય પ્રગતિ ચિતાર મેળવ્યો હતો. 

નેશનલ હાઈવેના બાંધકામ અને સુધારણા માટે આટલા રૂપિયાનો થશે ખર્ચ
નેશનલ હાઈવેના વિકાસ અને સુધારણા માટે 81 કામો માટે ગુજરાતમાં છેલ્લા 8 વર્ષમાં વિવિધ હાઈવે પ્રોજેક્ટ માટે 52 હજાર 775 કરોડ રૂપિયા મંજૂર કરવામાં આવ્યા છે.  30 હજાર 908 કરોડ રૂપિયાના 1 હજાર 366 કિમીના 22 કામો આયોજનના તબક્કામાં છે. આમ ગુજરાતમાં નેશનલ હાઈવેના બાંધકામ અને સુધારણા માટે કુલ 1 લાખ 8 હજાર 690 કરોડ રૂપિયાનો ખર્ચ થશે.