દેશની સીમાઓની રક્ષા કરનાર તાલાલાના સિદી બાદશાહ ફોજી જવાન ઇમરાનભાઇ કાળુભાઇ સાયલી(ઉં.30)નો મૃતદેહ અરુણાચલથી માદરે વતન તાલાલા લવાયો હતો. રાષ્ટ્રીય સન્માન સાથે શહીદને અંતિમ વિદાય અપાય હતી. અહીં મોટી સંખ્યામાં લોકો જોડાયા હતા. મહત્વનું છે કે, તા. 29 નવેમ્બરે અરુણાચલ પ્રદેશની સરહદ પર પેટ્રોલીંગ કરી રહ્યા હતા ત્યારે સરહદ પાસેની 10 કિ.મી. ઉંડી ખીણમાં ટ્રક અકસ્માતે પડી જતાં ઇમરાનભાઈ સાયલી (ઉ.30) ઘટનાસ્થળે જ શહીદ થયા હતા.
શહીદ જવાનની અંતિમયાત્રામાં મોટી સંખ્યામાં લોકો જોડાયા હતા
રાષ્ટ્રીય સન્માનની સાથે દફનવિધિ કરવામાં આવી હતી
તાલાલા શહેરમાં રહેતા અને અરુણાચલ પ્રદેશ ખાતે આર્મીમાં ફરજ બજાવતા શહીદ વીર ઇમરાન ભાઈ કાળુભાઇ સાયલી નામના ફોજીની બોલેરો કાર અરુણાચલ પ્રદેશમાં ખાઈમાં પડવાના કારણે ફોજી જવાન શહીદ થયા હતા. તેઓ 13 વર્ષથી આર્મીમાં સેવા આપતા હતા. જેમનો મૃતદેહ હેલિકોપ્ટર મારફતે પ્રથમ જૂનાગઢ અને ત્યારબાદ બાય રોડ માદરે વતન તાલાલા લાવવામાં આવ્યો હતો. શહીદ ઇમરાન સાયલીને તાલાલાવાસીઓએ ભવ્ય રીતે સન્માન આપ્યું અને બાદમાં તેમના ઘરે મૃતદેહને લઇ જવામાં આવ્યો હતો. આ ઘટનાથી સમગ્ર તાલાલા પંથકમાં ગમગીની છવાઈ જવા પામી છે. રાષ્ટ્રીય સન્માનની સાથે દફનવિધિ કરવામાં આવી હતી.
શહીદ ઇમરાન સાયલીને તાલાલાવાસીઓએ ભવ્ય રીતે સન્માન આપ્યું
તાલાલા શહેરમાં યુવાનો અને સંસ્થાઓ દ્વારા મુખ્ય માર્ગો પર બેનરો લગાવવામાં આવ્યાં હતાં. તાલાલાના વેપારીઓએ આજે સજ્જડ બંધ પાળી જવાનને શ્રદ્ધાંજલિ પાઠવી હતી. શહીદ જવાનની અંતિમયાત્રામાં મોટી સંખ્યામાં લોકો જોડાયા હતા.
મારો દીકરો દેશની રક્ષા કરતો હતો અને હજુ પણ દેશ માટે મરી મિટવા મારા દીકરાઓ છેઃ શહીદ જવાનના પિતા
શહીદ વીર ઇમરાન સાયલીના પિતા કાળુભાઇ સાયલીએ મીડિયામાં પ્રતિક્રિયા આપતા કહ્યું હતું કે મારો દીકરો દેશની સુરક્ષા કરતો હતો અને તે શહીદ થયો છે. હજુ પણ દેશ માટે મરી મિટવા મારા દીકરાઓ છે. તાલાલા ખાતે શહીદ ફોજીનો જનાજો નીકળ્યો હતો. જેમાં મોટી સંખ્યામાં લોકો જોડાયા અને વંદે માતરમ્ તેમજ ભારત માતા કી જયના નારાથી તાલાલા ગુંજી ઉઠ્યું હતું.