એકશન / ફૂલ સ્પીડમાં ચલાવતા વાહનચાલકો ચેતી જજો, પોલીસ પાસે આવી ગઈ છે આ 'સુવિધા'

હાલમાં  અમદાવાદ, વડોદરા, સુરત સહિતનાં શહેરોમાં ટ્રાફિક પોલીસ દ્વારા સ્પીડ ગન થકી ઓવર સ્પીડ વાહનચાલકો સામે કાર્યવાહી ચાલુ છે, જોકે હાઇટેક સ્પીડ ગનના ઉપયોગ અંગે પોલીસ અધિકારીઓ-કર્મચારીઓમાં જાણકારીનો અભાવ હોઈ સ્પીડ ગનનો અસરકારક રીતે ઉપયોગ થતો ન હતો, જેથી તાજેતરમાં ગાંધીનગર (Gandhinagar) સ્થિત કરાઇ પોલીસ એકેડેમીમાં અમદાવાદ સહિત રાજ્યભરના ૨૦૦થી વધુ પોલીસ અધિકારીઓ-કર્મચારીઓને સ્પીડ ગનના ઓપરેટિંગ અંગે ટ્રેનિંગ આપવામાં આવી છે.

સરકારે હાલમાં ૩૯ સ્પીડ ગનની ખરીદી કરી છે. હવે  તબક્કાવાર અલગ અલગ શહેરની ટ્રાફિક પોલીસને જરૂરિયાત પ્રમાણે સ્પીડ ગનની ફાળવણી કરવામાં આવશે. શહેર પોલીસની ટ્રાફિક બ્રાંચના ડીસીપી (DCP) તેજસ પટેલે  જણાવ્યું હતું કે કરાઇ પોલીસ એકેડેમી ખાતે સ્પીડ ગનની યોજાયેલી ટ્રેનિંગમાં શહેરમાંથી ૩ પીઆઇ, પ પીએસઆઇ અને ૧૦  પોલીસ કર્મચારીઓએ ભાગ લીધો હતો.

તેઓએ સ્પીડ ગનના યુઝ અંગે ટ્રેનિંગ મેળવી છે. હાલ ટ્રાફિક પોલીસ પાસે ત્રણ  સ્પીડ ગન છે અને હજુ વધુ સ્પીડ ગનની ફાળવણી કરાશે.  શહેરના જે વિસ્તારોમાં ઓવર સ્પીડ વાહનોનું ન્યૂસન્સ છે તે વિસ્તારોમાં સ્પીડ ગન થકી વાહનચાલકો સામે કાર્યવાહી કરાશે.

સ્પીડ ગન એક કિલોમીટર દૂરથી જ એકસાથે ૩ વાહનને ટ્રેક કરી શકે છે. ગણતરીની સેકન્ડોમાં જ વાહનની સ્પીડ માપી લેશે અને સ્પીડનો ડેટા ગનમાં સ્ટોરેજ પણ થઇ જશે.  આ સ્પીડ ગનની રેન્જ ૧ર૦૦ મીટર છે અને ૧૦૦ મીટર સુધી તે વાહનનો ફોટો પાડી શકે છે. ઓવર સ્પીડ વાહનચાલકોને ફોટોગ્રાફ્સ સાથે ઇ-મેમો પણ મોકલી શકાશે, સાથોસાથ સ્પીડગનમાં વીડિયો રેકો‌િર્ડંગ પણ થઇ શકશે. છેલ્લા એક મહિનામાં ૧૩૦૦ ઈ-મેમો અપાયા છે.