ગુજરાતની કંપની સ્ટર્લિંગ બાયોટેકમાં ચાર મુખ્ય પ્રમોટર્સ સંડોવાયેલા છે. નીતિન સાંડેસરા, ચેતનકુમાર સાંડેસરા, દીપ્તિ ચેતન સાંડેસરા અને હિતેશકુમાર પટેલ. 15,600 કરોડની બેડ લોન્સની સાથે ભારતથી નાસી છૂટેલ સાંડેસરા ભાઈઓ આજની તારીખે બેંકો સાથે મીલીભગત કરીને જ્યુડિશ્યલ સિસ્ટમને મૂર્ખ બનાવવાની કોશિશ કરી રહ્યા છે તેવો સનસનીખેજ દાવો moneylife.in નામના મેગેઝિને કર્યો છે. આવામાં પૂરી રકમ તો નહીં પરંતુ તેમના વન ટાઈમ સેટલમેન્ટ (OTS)ના રૂપિયા 2638 કરોડના પેમેન્ટ માટે પણ તારીખ લંબાવવા માટે હવાતિયા મારી રહ્યાં છે.
સાંડેસરા 31 માર્ચ 2020ની OTS પેમેન્ટની તારીખને લંબાવવા માંગે છે
નોંધનીય છે કે નેશનલ કંપની લો એપેલેટ ટ્રીબ્યુનલ (NCLAT)એ આ પેમેન્ટ 31 માર્ચ 2020 સુધીમાં કરી દેવાનો આદેશ આપ્યો હતો. જેમાં હવે સાંડેસરા ગ્રુપ આ તારીખને લંબાવવા માંગે છે. Moneylife મેગેઝિનને સાંડેસરાનો યુનિયન બેન્કને લખેલો 16 જુલાઈ 2020નો એક પત્ર મળી આવ્યો હતો જેમાં આ બાબતનો ઉલ્લેખ છે. આવામાં ચર્ચા એ પણ થઈ રહી છે કે જો વિજય માલ્યા જેવા ભાગેડુઓ તેમની લોન્સ ભરપાઈ કરવાની તૈયારી બતાવી રહ્યો છે અને તેમ છતાં તેની સામે કડક વલણ રાખવામાં આવી રહ્યું છે. ત્યારે ગુજરાતના સાંડેસરા બ્રધર્સ સામે શું કામ રહેમ નજર રાખવામાં આવે અને તેમને તારીખ લંબાવવાની સુવિધા આપવામાં રસ હોય? શું આ પ્રકારની સુવિધા કોવિડ 19ના લોકડાઉનને કારણે ખોટમાં ગયેલી નાની-મોટી કંપનીઓને પણ મળશે તેવી ચર્ચા પણ ઉઠી રહી છે.
બેન્કર્સે 3 જુલાઈ 2020ના રોજ નીતિન સાંડેસરા સાથે ઓનલાઇન મિટિંગ રાખી હતી
વેબસાઈટના દાવા અનુસાર વિજય માલ્યા સાથે કોઈ પણ પ્રકારનું સમાધાન કરવા તૈયાર ન થઇ રહેલા બેન્કર્સ 3 જુલાઈ 2020ના રોજ નીતિન સાંડેસરા સાથે ઓનલાઇન મિટિંગ કરવા તૈયાર થઇ ગયા જ્યાં તેણે OTSની તારીખ એક વર્ષ માટે લંબાવવાની વાત રાખી હતી. આ માટે સાંડેસરાએ કોરોનાને લીધે બિઝનેસમાં થયેલા નુકશાનને કારણભૂત બતાવ્યું હતું.
આ પત્રમાં એવો પણ ઉલ્લેખ છે સ્ટર્લિંગ ગ્રુપે સુપ્રીમ કોર્ટમાં પણ પેમેન્ટની તારીખ પાછી ઠેલવવાની વાત કરી છે. તેણે કહ્યું છે કે તેઓ ડિસેમ્બર 2021માં OTSના 90% જેટલી ચુકવણી કરી શકશે. વળી, આ ચૂકવણી માટે તેમની પાસે પૈસા ક્યાંથી આવશે તેનો કોઈ પણ જાતનો ઉલ્લેખ નથી.
દર મહિને 40 કરોડનું કેશ સરપ્લસ મળે તેવી રીતે વ્યાપાર કરી શકે છે : સાંડેસરાનો દાવો
સાંડેસરાએ ખાતરી આપી છે કે તે દર મહિને 40 કરોડનું કેશ સરપ્લસ મળે તેવી રીતે વ્યાપાર કરી શકે છે જેનાથી તેને 480 કરોડનું વાર્ષિક કેશ સરપ્લસ મળશે. ત્યારે બીજી બાજુ ઉલ્લેખ કરતા કહ્યું છે કે તેના મિલકતની કુલ લીકવીડિટી ફક્ત 300 કરોડ જ થાય છે. જો આ વાત સાચી હોય તો 300 કરોડના એસેટ ધરાવતી કંપની કેવી રીતે વાર્ષિક 480 કરોડની કેશ સરપ્લસ કરે તેના પર પણ વેબસાઈટે શંકા વ્યક્ત કરી હતી.
આ તમામ સુવિધાઓ માંગ્યા બાદ સાંડેસરા બેન્કર્સ પાસેથી તેનું નામ કાઢી નાખવાની અને તેણે આ ચુકવણી બાદ ફૂલ પેમેન્ટ કરી દીધું છે તેવી ક્લીન ચિટ આપવાની વાત કરી રહ્યો છે.
સાંડેસરાના નાઇજીરીયા અને અમેરિકામાં ઓઈલના વ્યાપાર ધમધમે છે
moneylifeનો દાવો છે આ સાથે સાંડેસરા એવી ધમકી આપી રહ્યો છે કે જો બેંકો આ ઓફર નહીં સ્વીકારે તો તેમને 15% રૂપિયાની રિકવરી પણ નહીં મળે. વેબસાઈટ પ્રમાણે એક ખોટી ધમકી છે કારણ કે સાંડેસરાના નાઇજીરીયા અને અમેરિકામાં ઓઈલના વ્યાપાર ધમધમે છે અને બેંકો તેમના આ ધંધાઓ ઉપર રિકવરી માટે તવાઈ ફેરવી શકે છે. CBI, ED, SFIO જેવી તપાસ સંસ્થાઓ પણ moneylifeએ આ અગાઉ પ્રકાશિત કરેલા અહેવાલોને નજરઅંદાજ કરીને સાંડેસરા ગ્રુપને રહેમનજરમાં રાખે છે તેવો તેમનો આક્ષેપ છે.
શું છે સાંડેસરા કેસ?
ગુજરાતના એક કોર્પોરેટ જૂથ સાંડેસરા ગ્રુપ સામે આંધ્ર બેંકની આગેવાની વાળા બેન્કિંગ કોન્સરટીયમે CBIમાં એક ફરિયાદ નોંધાવી હતી, જે આ બેન્કો - જેમાં આંધ્ર બેન્ક, યુકો બેન્ક, બેન્ક ઓફ ઈન્ડિયા, સ્ટેટ બેન્ક ઓફ ઈન્ડિયા ને અલ્હાબાદ બેન્ક સામેલ હતી - પાસેથી લગભગ 5000 કરોડની બેન્ક લોન ફ્રોડ કેસ મામલે હતી. આ ફરિયાદ CBIએ નોંધતા તેના આધારે EDએ સ્ટર્લિંગ બાયોટેક/ સાંડેસરા ગ્રુપ સામે મની લોન્ડરિંગનો કેસ નોંધ્યો હતો.
EDને જાણવા મળ્યું હતું કે સ્ટર્લિંગ બાયોટેક લિ. (SBL) / સાંડેસરા ગ્રૂપ અને તેના મુખ્ય પ્રમોટર્સ, નીતિન સંડેસરા, ચેતન સાંડેસરા અને દીપ્તિ સંડેસરાએ આ બેન્ક કન્સોર્ટિયમ સાથે કરેલી છેતરપિંડીની કુલ રકમ 14500 કરોડથી વધુની છે.
2011 માં આ કેસની તપાસ કરતાં આવકવેરા વિભાગને એક ડાયરી મળી હતી જેમાં વિવિધ પાર્ટીઓને અલગ અલગ કેશ ટ્રાનજેક્શનની વિગતો હતી જેમાં 2008 -09 માં તે સમયના આંધ્ર બેન્કના ડાયરેક્ટર અનુજ પ્રકાશ ગર્ગને 1.59 કરોડ આપ્યાની એન્ટ્રી પણ હતી, જેના આધારે તેની પણ ધરપકડ કરવાં આવી હતી, જેની પર આરોપ હતો કે રકમના બદલામાં તેને સાંડેસરા બંધુઓની મદદ કરી હતી અને તે પૈસા કોલકાતા સ્થિત અનેક શેલ કંપનીઓની હેલ્પ વડે અલગ અલગ જગ્યાએ રોક્યા હતા. આ સિવાય દિલ્હી સ્થિત એક અન્ય વેપારી ગગન ધવન ની પણ ધરપકડ કરી હતી.