ભાવનગર: પેટ્રોલ ડીઝલના ભાવમાં આજે પણ વધારો ઝીંકાયો. પેટ્રોલના ભાવમાં 26 પૈસાનો વધારો થયો છે અને ડીઝલના ભાવમાં 19 પૈસાનો વધારો થયો છે. અમદાવાદમાં પેટ્રોલનો ભાવ રૂ. 81 પ્રતિ લીટરે પહોંચ્યો છે. ડીઝલનો ભાવ રૂ. 79 પ્રતિ લીટરે પહોંચતા સામાન્ય નાગરિકોમાં રોષ વ્યાપ્યો છે.
તો આ તરફ ગુજરાતમાં સૌથી વધારે ભાવ ભાવનગરમાં જોવા મળ્યો હતો. ભાવનગરમાં પેટ્રોલનો ભાવ રૂ. 80.29ને પાર પહોંચ્યો છે. છેલ્લાં પંદર દિવસમાં પેટ્રોલના ભાવમાં રૂ. 3.39નો વધારો થયો છે અને ડીઝલમાં રૂ. 3.94નો વધારો થયો છે. ત્યારે આ ભાવવધારા સામે દેશભરમાં વિરોધ જોવા મળ્યો છે. પણ હજુ સરકાર દ્વારા ભાવ વધારા સામે કોઈ કાર્યવાહી કરવામાં આવી નથી.
ઉલ્લેખનીય છે કે છેલ્લા કેટલાક દિવસથી સતત વધી રહેલા ઇંધણના ભાવને કારણે આમ જનતામાં રોષ ફેલાયો હતો. તો આ તરફ વિપક્ષ દ્વારા 10 તારીખના રોજ ભારત બંધનું એલાન પણ આપવામાં આવ્યું હતું તેમ છતાં સતત વધી રહેલા પેટ્રોલ-ડીઝલના ભાવ સામે સરકાર કોઇ જ અસરકારક પગલા નહીં લેતા પ્રજા ત્રાહિમામ પોકારી ઉઠી છે.
એક તરફ લોકસભાની ચૂંટણી પણ નજીક આવી રહી છે. ત્યારે લોકોને એવી આશા છે કે ચૂંટણી પહેલા સરકાર પેટ્રોલ-ડીઝલ પર કોઈ રાહત આપી શકે છે.
એવી પણ માગ થઈ રહી છે કે પેટ્રોલ-ડીઝલને GSTમાં સમાવવામાં આવે તો નાગરિકોને રાહત મળી શકે છે. પરંતુ કેન્દ્ર સરકાર તેને GSTમાં લાવવા માગતી નથી. ત્યારે પેટ્રોલ-ડીઝલના ભાવ લોકોને કેવા દિવસો દેખાડે છે તે આગામી દિવસોમાં જોવા મળી શકે છે.