ક્યારે અટકશે ભાવ વધારો..? આજે ફરી એકવાર વધ્યા પેટ્રોલ-ડીઝલના ભાવ

દિલ્હી: દેશની જનતા મોંઘવારીના મારનો સામનો કરી રહી છે. તેવામાં જનતાને વધુ એક ફટકો પડયો છે. ફરી પેટ્રોલ-ડિઝલના ભાવમાં વધારો થયો છે અને મોદી સરકાર મોંઘવારીના માર વચ્ચે ફરી પેટ્રોલ-ડિઝલના ભાવ પર કાબૂ મેળવવામાં નિષ્ફળ નિવડી છે.

પેટ્રોલમાં આજે 38 પૈસાનો વધારો થયો છે. જ્યારે ડિઝલમાં 47 પૈસાનો વધારો ઝિંકી દેવામાં આવ્યો છે. આ ભાવ વધારો વૈશ્વિક બજારમાં ક્રુડ ઓઈલના વધેલા ભાવના કારણે થયો છે.

મહત્વનું છે કે છેલ્લા 14 દિવસમાં પેટ્રોલના ભાવમાં 2.63 અને ડિઝલના ભાવમાં 3.40 રૂપિયાનો ભાવ વધારો કરાયો છે. આ ભાવ વધારા સાથે જ અમદાવાદવાસીઓએ આજથી પ્રતિ લિટર પેટ્રોલ માટે 79.50 રૂપિયા અને ડિઝલ માટે પ્રતિ લિટર 77.76 રૂપિયા ચૂકવવા પડશે.
 

Petrol & Diesel prices in #Delhi are Rs.80.38 per litre & Rs.72.51 per litre respectively. Petrol & Diesel prices in #Mumbai are Rs.87.77 per litre & Rs.76.98 per litre respectively. pic.twitter.com/WjRGRg3c4W

— ANI (@ANI) September 8 2018

આપને જણાવી દઇએ કે દેશમાં દિન પ્રતિદિન વધી રહેલા પેટ્રોલ અને ડીઝલના ભાવે સમામાન્ય વ્યક્તિનું બજેટ ખોરવી નાંખ્યુ છે. ત્યારે પેટ્રોલ અને ડીઝલના ભાવ વધારા સામે કોંગ્રેસ હવે રહી રહીને જાગી છે. હવે કોંગ્રેસ દ્વારા આ ભાવ વધારા સામે વિરોધ કરવામાં આવશે. જેના પગલે કોંગ્રેસ દ્વારા આગામી 10 સપ્ટેમ્બરના રોજ ભારત બંધનું એલાન કરવામાં આવ્યું છે.

આ ઉપરાંત તમામ પક્ષો નાગરીકો અને સમાજને આ બંધમાં જોડાવા માટે કોંગ્રેસે અપીલ પણ કરી છે. ત્યારે શું આ વિરોધ અને બંધ બાદ પેટ્રોલ ડીઝલના ભાવમાં ઘટાડો થશે કે પછી પરિસ્થિતિ જેવી છે તેવી જ રહેશે એ તો આવનારો સમય જ બતાવશે.