બજેટ / કાલથી ગુજરાત વિધાનસભાનું બજેટ સત્ર, નમસ્તે ટ્રમ્પ અને અનામત જેવા મુદ્દાઓ ગાજશે 

• વિધાનસભાના સત્રનો કાલથી પ્રારંભઃ બજેટ રજૂ કરાશે
• 26 ફેબ્રુઆરીથી શરૂ કરી 2 એપ્રિલ, બજેટસત્ર 40 દિવસ ચાલશે 
• વિવિધ મુદ્દાઓ પર સરકારને ભીંસમાં લેવા કોંગ્રેસની વ્યૂહરચના

બજેટસત્ર દરમિયાન વિપક્ષ કોંગ્રેસ આક્રમક બનશે 

ચાલીસ દિવસ સુધી ચાલનારા વિધાનસભા બજેટસત્રમાં અલગ-અલગ માંગણી ઉપર ચર્ચા-સુધારા વિધેયક અને પૂરક માંગણી તથા નવા કાયદા ઉપર બંને પક્ષે મંથન કરવામાં આવશે, જોકે બજેટસત્ર દરમિયાન વિપક્ષ કોંગ્રેસ પણ આક્રમક બનશે અને પાક વીમા, બેરોજગારી, દલિત અત્યાચાર તેમજ વિદ્યાર્થીઓના મુદ્દે સરકારને ઘેરવાનો પ્રયત્ન કરશે. 

સત્રમાં ત્રણ બેઠક તબક્કાવાર મળશે

આ સત્રમાં અલગ-અલગ ત્રણ બેઠક તબક્કાવાર મળશે. જ્યારે ચર્ચા માટે ચાર બેઠક, માંગણીઓ પરની ચર્ચા માટે બાર બેઠક, સરકારી વિધેયક માટે ચાર બેઠક મળશે. દરમિયાન પ્રદેશ કોંગ્રેસના પ્રવક્તા ડો. મનીષ દોશી કહે છે કે, આવતી કાલથી  શરૂઆત થનારી બજેટ બેઠક માટે કોંગ્રેસ શિક્ષણ, રોજગાર, ખેડૂત, મહિલા સુરક્ષા અને બાળકોના વધતા જતા મૃત્યુદર વગેરે મામલે શાસક પક્ષને વિધાનસભામાં ઘેરશે.

આજે સાંજે પરેશ ધાનાણીના નેતૃત્વ હેઠળ ગાંધીનગરમાં બેઠક

વિપક્ષના નેતા પરેશ ધાનાણીના નેતૃત્વ હેઠળ આજે સાંજે ગાંધીનગરમાં ધારાસભ્યોની બેઠક બોલાવાઇ છે. વિધાનસભાની બજેટ બેઠકમાં વિવિધ વિભાગને લગતા આશરે 5000 પ્રશ્ન કોંગ્રેસ દ્વારા પૂછવામાં આવ્યા છે. નેતાની ઓફિસ દ્વારા તમામ પ્રશ્ન લગતી માહિતી અલગ-અલગ તારવાઇ છે.