કડી / EVM ફેક્ટરીમાંથી ગુજરાતમાં બુથ સુધી આવે ત્યાં સુધી ચોકી મૂકી છે: ગુજરાતમાં ચૂંટણી અગાઉ કોંગ્રેસે ઉછાળ્યો મુદ્દો

• વિધાનસભા અગાઉ કોંગ્રેસે ફરી ઉઠાવ્યો EVMનો મુદ્દો
• પ્રદેશ કોંગ્રેસ અધ્યક્ષ જગદીશ ઠાકોરનું કડીના મેઢામાં નિવેદન 
• EVM કલેકટર માંથી મામલતદારમા આવે ત્યાં સુધી ચોકી મૂકી છે 

ચૂંટણી અગાઉ અને પરિણામ વેળાએ અનેક વખત EVMનો મુદ્દો ઉછળતો હોય છે. હારજીતને લઇને કોંગ્રેસે અનેક વખત ભૂતકાળમાં EVM પર ઠીકરુ ફોડ્યું છે. તેવામાં વિધાનસભા અગાઉ કોંગ્રેસે ફરી EVMનો મુદ્દો ઉઠાવ્યો છે. કડી તાલુકાના મેઢા ખાતે એક કાર્યક્રમમાં EVM મુદ્દે કોંગ્રેસ પ્રદેશ અધ્યક્ષ જગદીશ ઠાકોરએ નિવેદન આપ્યું હતું.

અમે શું નહી થવા દઈએ ? એની તૈયારી કરી દીધી છે : જગદીશ ઠાકોર 
જગદીશ ઠાકોરએ જણાવ્યું કે આજુ વખતે ભાજપ જેટલા અને જેવા મશીનો લાવવા હોય એ લાવે પરતું અમે એવા કોમ્પ્યુટર એન્જિનિયરો મુક્યા છે જે એમનું ગજ વાગવા નહી દે. વધુમાં EVM જ્યાં બને છે તે ફેક્ટરીમાંથી ગુજરાતમાં આવે ત્યાં સુધી ચોકી મૂકી છે. જ્યારે ચુંટણી બુથથી કલેકટરમા આવે ત્યાં સુધી અને EVM કલેકટર માંથી મામલતદારમા આવે ત્યાં સુધી ચોકી ગોઠવી દેવામાં આવી છે. વધુમાં તેમણે ઉમેર્યું કે ભાજપવાળા શું કરી શકે તેમ છે અને અમે શું નહી થવા દઈએ ? એની તમારા વતીની તમામ તૈયારી કરી દીધી છે.

અગાઉ શિવા ભુરીયાએ EVM મામલે નિવેદન આપ્યું હતું
એક બાજુ કોંગ્રેસ EVM માં સેટિંગ થતાં હોવાના આરોપો લગાવી રહી છે તો બીજી બાજુ તાજેતરમાં જ દિયોદરના કોંગ્રેસના ધારાસભ્ય શિવા ભુરીયાએ EVM મામલે નિવેદન આપ્યું હતું. જેમાં તેમણે જણાવ્યું કે EVM ખોટા નથી હોતા પણ ચૂંટણી ટાણે કેટલાક લોકો ફુટી જાય છે અને કમળના નિશાન પર વોટ આપતા હોવાથી ભાજપ જીતે છે. ઉલ્લેખનિય છે કે EVM ખોટા ન હોવા અંગે કોંગ્રેસી ધારાસભ્ય શિવા ભુરીયાએ લગભગ ચાર માસ પહેલા પણ નિવેદન આપ્યું હતું. જેને લઇને પણ તે ચર્ચામાં આવ્યા હતા.