મનાલીમાં ભારે હિમવર્ષા બાદ જનજીવન અને વાહન વ્યવહાર ઠપ

ઠંડી ધીમા પગલે પાછી ફરી રહી છે ત્યારે ફરી એક વાર ઉત્તર ભારતના હિમાચલ પ્રદેશમાં ભારે હિમવર્ષા થઈ છે. હિમાચલ પ્રદેશમાં હિમવર્ષા થતા મેદાની વિસ્તારમાં ઠંડીનો ચમકારો આંશિક વધ્યો છે. મેદાની વિસ્તારમાં પણ ઠંડીનો ચમકારો જોવા મળ્યો.

જેના કારણે એવું લાગી રહ્યુ છે કે વળી પાછી ઠંડી જાણે ફરી આવી ગઈ. ઉત્તર ભારતના હિમાચલ પ્રદેશના મનાલીમાં ભારે હિમવર્ષા થતા જન જીવન ઠપ થયુ છે. મનાલીમાં ઠેર-ઠેર બરફના સ્તર જામતા વાહન વ્યવહાર પણ ઠપ થયો છે.

ભારે હિમવર્ષા બાદ અનેક જગ્યાએ વાહન વ્યવહાર ખોરવાયો છે. કેટલાક સ્થળોએ મુસાફરો સહિત વાહન ચાલકો પણ ફસાયા છે. શહેરના અનેક વિસ્તારમાં માત્ર બરફ જ નજરે પડી રહ્યો છે.  જ્યારે રસ્તા પર બરફના સ્તર જામતા તંત્ર દ્વારા પણ બરફ હટાવવા માટે કાર્યવાહી હાથ ધરવામાં આવી છે.

કુદરતની આ કમાલ જોઈને એવું લાગે છે કે આ કોણ ચિત્રકાર છે......ખાસ કરીને હિમવર્ષા બાદ જે દ્રશ્યો સર્જાયા છે તે ખરેખર નયનરમ્ય લાગી રહ્યા છે. ઝાડ, પાન, ફળ, ફૂલ, મકાનની છત હોય કે પછી વાહનો કે પછી પાણી...બસ બરફથી છવાયેલા જ જોવા મળી રહ્યા છે.

ઉલ્લેખનીય છે કે ફેબ્રુઆરીના પ્રારંભમાં પણ  ઉત્તર ભારતમાં બદલાયેલા મોસમા મિજાજ બાદ પહાડી વિસ્તારમાં ભારે હિમવર્ષા જોવા મળી હતી.  જેના કારણે મેદાની વિસ્તારમાં પણ ઠંડીનો ચમકારો જોવા મળ્યો હતો.