Coronavirus / ફ્રાન્સ કંપનીનો ઘટસ્ફોટઃ કોરોનાની વેક્સીન સૌથી પહેલા અમેરિકાને મળશે કેમ કે...

• ફાન્સની કંપનીમાં ડોનાલ્ડ ટ્રમ્પના શેર છે
• ડોનાલ્ડ ટ્રમ્પે કંપની સાથે ગાઢ અને વ્યક્તિગત સંબંધ છે
• મેલેરિયાની દવાનો વધુ ઉપયોગ થાય તો ટ્રમ્પને આ ફાયદો હતો

સનોફી કંપનીના સીઈઓ પોલ હડસને બ્લૂમબર્ગ ન્યૂઝને આપેલા ઇન્ટરવ્યુમાં આ વાત કરી હતી. પોલ હડસને કહ્યું કે અમેરિકાએ કંપનીમાં ઘણું રોકાણ કર્યુ છે. તેથી તેમની પાસે અમારી કંપની દ્વારા બનાવવામાં આવેલી કોરોનાની રસી સૌથી પહેલા લેવાનો અધિકાર છે.

પોલ હડસને વધુ ચેતવણી પણ આપી હતી કે આ મામલે પાછળ ચાલી રહેલા યુરોપમાં હાલત ખૂબ ખરાબ છે. યુ.એસ.એ ફેબ્રુઆરીમાં જ સનોફીમાં વધુ રોકાણ કર્યું હતું. તેમજ કંપનીની રસી માટે પ્રી-ઓર્ડર પણ અપાયો હતો.

સનોફી એ વિશ્વની સૌથી મોટી કંપનીઓમાંની એક છે જે હાલમાં કોરોના રસી માટે કામ કરે છે. સનોફીએ અમેરિકાના કહેવા પર તેની હરીફ ગ્લેક્સોસ્મિથક્લાઇન સાથે ડીલ કરી છે. જેથી બંને કંપની મળીને એક વર્ષમાં 600 મિલિયન રસી બનાવી શકે.

યુએસ રાષ્ટ્રપતિ ડોનાલ્ડ ટ્રમ્પની સરકાર આ સમયે ઓપરેશન વાર્પ સ્પીડ ચલાવી રહી છે. જે અંતર્ગત યુ.એસ. કોરોના રસીના સંશોધન માટે અનેક ફાર્માસ્યુટિકલ કંપનીઓને ફંડ આપી રહી છે. દરેક રીતે સહાય આપી રહી છે.

અમેરિકાના બાયોમેડિકલ એડવાન્સ્ડ રિસર્ચ એન્ડ ડેવલપમેન્ટ ઓથોરિટી એટલે કે બાર્ડા (BARDA)એ સનોફીને કોરોના રસી પર કામ કરવા માટે 30 મિલિયન ડૉલર અથવા રૂ. 226 કરોડથી વધુ આપી ચૂક્યા છે.

બાર્ડાનો સનોફી સાથે બહુ જુનો સંબંધ છે. ગયા વર્ષે ડિસેમ્બરમાં યુ.એસ.એ સાનોફી ઈન્ફલ્યુએન્ઝાની રસી વિકસાવવા માટે 226 મિલિયન ડૉલર અથવા રૂ. 1705 કરોડથી વધુ આપ્યા હતા. 

થોડા દિવસો પહેલા યુ.એસ. અખબાર ન્યુ યોર્ક ટાઇમ્સની વેબસાઇટ પર એ વાતનો ખુલાસો કરવામાં આવ્યો છે કે ડોનાલ્ડ ટ્રમ્પ કેમ  મેલેરિયા ડ્રગ હાઈડ્રોક્સિક્લોરોક્વીન પાછળ પડ્યા હતા. મીડિયા સંસ્થાઓએ કહ્યું છે કે આમાં ડોનાલ્ડ ટ્રમ્પનો વ્યક્તિગત ફાયદો છે.

ન્યુ યોર્ક ટાઇમ્સ અનુસાર જો હાઇડ્રોક્સિક્લોરોક્વિનને વિશ્વભરમાં કોરોનાની સારવાર કરવાની મંજૂરી આપવામાં આવે તો, આ દવાઓ બનાવતી કંપનીઓને તેનો મોટો ફાયદો થશે. ડોનાલ્ડ ટ્રમ્પ આવી જ એક કંપનીમાં શેરના માલિક છે. ઉપરાંત ડોનાલ્ડ ટ્રમ્પની તે કંપનીના ઉચ્ચ અધિકારીઓ સાથે  ગાઢ સંબંધ છે.

વેબસાઇટ પર લખ્યું છે કે ડોનાલ્ડ ટ્રમ્પનો ફ્રેન્ચ ફાર્માસ્યુટિકલ કંપની સનોફીને લઈને વ્યક્તિગત ફાયદો છે.  કંપનીમાં ટ્રમ્પના શેર છે. આ કંપની માર્કેટમાં હાઈડ્રોક્સીક્લોરોક્વીન દવાને પ્લાકેનીલ બ્રાન્ડના નામથી બજારમાં વેચે છે.

મેલેરિયા જેવા જોખમી રોગો સામે લડવા માટે હાઇડ્રોક્સિક્લોરોક્વિન એક ખૂબ અસરકારક દવા છે. દર વર્ષે ભારતમાં મોટી સંખ્યામાં લોકો મેલેરિયાનો શિકાર બને છે. તેથી જ ભારતીય ફાર્માસ્યુટિકલ કંપનીઓ તેનું ઉત્પાદન મોટા પાયે કરે છે.

જો કે, આ દવા એન્ટી મેલેરિયા ડ્રગ ક્લોરોક્વિનથી થોડી જુદી છે. આ એક ટેબલે છે. જેનો ઉપયોગ ઓટોઈમ્યૂન રોગો જેવા કે સંધિવાની સારવારમાં કરવામાં આવે છે. જોકે તેનો ઉપયોગ કોરોનાની સારવારમાં કરવાની વાત પણ સામે આવી છે.