પ્રેરણારૂપ / આણંદની શિક્ષિકાએ શરૂ કર્યો અનોખો શિક્ષણયજ્ઞ, ઝૂંપડપટ્ટીનાં બાળકોને વિના મૂલ્યે અપાય છે અક્ષરજ્ઞાન

થોડા સમય અગાઉ આણંદના સરદાર પટેલ રાજમાર્ગ પરથી પસાર થવા દરમિયાન ડો.ઉમાબેન શર્માએ ઝૂંપડપટ્ટીનાં બાળકોને નિહાળ્યાં સમયે તેઓને પોતે ફુટપાથ પર વિષમ સ્થિતિમાં વિતાવેલ બાળપણ યાદ આવી ગયું હતું. આથી પોતાને શિક્ષણ મેળવવામાં પડેલ તકલીફો આ ઝૂંપડપટ્ટીનાં બાળકોને ભોગવવી ન પડે તે માટે કંઇક કરવાનો નિર્ધાર કર્યો.

જેનાં ભાગરૂપે છેલ્લાં ૩ માસથી સરદાર પટેલ રાજમાર્ગ પર ઝૂંપડપટ્ટીમાં વસવાટ કરતા શ્રમજીવી પરિવારોનાં ર૦ બાળકોને પાયામાંથી શિક્ષણ આપવાનો પ્રયાસ ડો.ઉમાબેને આદર્યો છે. જેમાં કક્કો-બારાખડીની સાથે અંગ્રેજી મૂળાક્ષરો શીખવવાનું શરૂ કર્યુ. દરરોજ સાંજે પ વાગ્યાથી ડો. ઉમાબેન ફુટપાથ પર જ બાળકોને શિક્ષણ આપી રહ્યાં છે. નોંધનીય વાત એ છે કે સાંજે સમયસર તમામ બાળકો ભણવાની જગ્યાએ આવીને બેસી જાય છે. ગરીબ બાળકોને તેમના સ્થળે, તેમની રીતે શિક્ષિત બનાવવાની ડો. ઉમાબેનની આહલેક અન્ય શિક્ષિતો માટે પણ પથદર્શકરૂપ છે.

વિદ્યાનગરની નલીની કોલેજમાં પ્રોફેસર તરીકે ફરજ બજાવતા ડો. ઉમાબેન શર્મા (Umaben Sharma) કે જેમનો અગાઉ અમદાવાદમાં તેઓનો પરિવાર ફુટપાથ પર વસતો હોવાંથી બાળપણમાં તેઓએ પણ ફુટપાથ પર જ શિક્ષણ (Education) મેળવ્યું હતું. પિતાજી ફુટપાથ પર ગેરેજમાં કામ કરતા. વિકટ સ્થિતિ છતાંયે ધગશથી શિક્ષિત બનવાની ખેવનાથી આગળ વધતા ગયા. બી.એ.માં ગોલ્ડ મેડલ મેળવ્યાં બાદ નોકરી તો મળી ગઇ પરંતુ સમાજ માટે કંઇ કરવાની ભાવના હતી જેને લઇ ડો. ઉમાબેન શર્મા પોતાની શૈક્ષણિક એટીવીટીનો સમાજનાં ગરીબ, પછાત વર્ગના બાળકોને પણ લાભ મળે તે દિશામાં સતત કાર્યરત રહ્યાં છે.

ગરીબ બાળકો પણ અક્ષરજ્ઞાન મેળવીને સમાજમાં પોતાનું નકકર સ્થાન બનાવી શકે તે માટે પોતાનાથી બનતા તમામ પ્રયાસો કરવાની બાબતને ડો. ઉમાબેને પોતાની રોજનીશીમાં શામેલ કરી દીધી છે. પોતાને શિક્ષક દીન નિમિતે ડો ઉમાબેનનું કહેવું છે કે જો શિક્ષક શિક્ષક બની જાય તો આ સમાજ સુધારકોની જરૂર ના રહે, કેમ કે શિક્ષક જ એક એવો છે જે સમાજનો પાયો નાખે છે, સમાજનું ઘડતર કરે છે, એક સારો નાગરીક તૈયાર કરી શકે છે કે જે શિક્ષકની સૌથી મોટી જવાબદારી છે. આપણાં વડાપ્રધાન નરેન્દ્ર મોદીનું સુત્ર છે કે 'પઢેગા ઇન્ડીયા તો બઢેગા ઇન્ડીયા' આ સૂત્ર ત્યારે સાકાર થશે કે જ્યારે દરેક શિક્ષક પોતાની ફરજ સમજી સમાજ માટે કાર્ય કરશે.