વડનગરમાં ઊંચા વ્યાજની લાલચ આપી કરોડો રૂપિયા ઉઘરાવનાર પેઢીનું ઉઠમણું થયું છે. વડનગર ત્રણ રસ્તા પાસે ચેહર એન્ટર પ્રાઈઝ પ્રાઇવેટ લિમિટેડ નામની પેઢી ખોલી કરોડો રૂપિયા એકઠા કર્યા હતા. બેન્ક કરતા ઊંચું વ્યાજ આપવાની લાલચને કારણે લોકોએ મોટી આ રકમનું આ પેઢીમાં રોકાણ કર્યું હોવાનું બહાર આવ્યું છે.
આ પેઢી મુળ ડીસાનો જીતેન્દ્ર સોની નામનો વ્યક્તિ ચલાવતો હતો. ગત વર્ષે જીતેન્દ્ર સોનીની મહેસાણા પોલીસે ડબ્બા ટ્રેડિંગ કરવા બદલ ધરપકડ કરી હતી. ત્યારબાદ જીતેન્દ્ર સોનીએ મહેસાણામાં પણ ઓફીસ ખોલી એજન્ટ રોકવાનું શરૂ કર્યું હતું. દરમિયાન જીતેન્દ્ર સોની એક ઓડિયો વાઇરલ કરીને ગાયબ થઈ ગયો છે.
આ ઓડિયોમાં તેણે ધમકી સાથે જણાવ્યુ હતું કે મારા પર કેસ કરશો તો કંઇ નહીં આપું, જો ટોર્ચર કરશો તો પૈસા પાછા નહીં આવે તેવી ધમકી આપી છે. ઊંચું વ્યાજ ચૂકવી કંટાળી ગયો હોવાની સાથે ઓડિયોમાં રોકાણકારો પાસે પૈસા પરત ચૂકવવા માટેનો તેણે સમય માંગ્યો છે.
અત્રે ઉલ્લેખનીય છે કે, વડનગરમાં ચેહર એન્ટરપ્રાઇઝના નામે ઓફિસ ખોલીને એકના ડબલ કરોડોના કૌભાંડમાં મહેસાણા પોલીસે ધરપકડ કરી હતી. જે દરમિયાન તેમણે પૂછપરછમાં કબૂલ્યું હતું કે ઓફિસમાં 14 વ્યક્તિઓને શેરબજાર અને ડબ્બા ટ્રેડિંગની ટ્રેનિંગ આપી હતી. ગ્રાહકોના રોકડા નાણાં આવે તો ડબ્બા ટ્રેડિંગમાં અને બેંક દ્વારા જમા કરવામાં આવે તો શેરબજારમાં રોકાણ કરતો હતો.