બનાસકાઠામાં ટેક્સ કન્સલ્ટન્ટના એકાઉન્ટન્ટે પેટ્રોલ પંપ માલિકોને ખોટા ચલણ આપી રૂપિયા 3.46 કરોડ રૂપિયાની ઉચાપત કરી હોવાનું આવ્યું સામે
બનાસકાંઠાના 5 પેટ્રોલ પંપ માલિકો સાથે છેતરપીંડી
રૂ. 3.46 કરોડ રૂપિયાની ઉચાપત
ડીસામાં કાર્યરત એકાઉન્ટન્ટની ધરપકડ
બનાસકાંઠા જિલ્લાના એકસાથે 5 પેટ્રોલ પંપ માલિકોના વેટ અને ઇન્કમટેક્સના નાણાં કચેરીઓમાં જમા ન કરાવી છેતરપીંડીનો કેસ નોંધાયો છે. ટેક્સ કન્સલ્ટન્ટના એકાઉન્ટન્ટે પેટ્રોલ પંપ માલિકોને ખોટા ચલણ આપી રૂપિયા 3.46 કરોડ રૂપિયાની ઉચાપત કરી હોવાનું સામે આવ્યું છે. આ બાબતે પેટ્રોલ પંપના મેનેજરે એકાઉન્ટ સામે ફરિયાદ નોંધાવતા પોલીસે ગણતરીના કલાકોમાં જ આરોપીની અટકાયત કરી વધુ તપાસ હાથ ધરી છે.
ડીસાના કંસારી હાઈ-વે પર આવેલા લાભ પેટ્રોલ પંપના ઇન્કમટેક્ષ, સેલટેક્સ કન્સલ્ટન્ટ તરીકે ડીસાના કમલેશભાઈ હેરુવાલા કન્સલ્ટિંગ કરી રહ્યા છે. જેમની ઓફિસમાં એકાઉન્ટન્ટ તરીકે સાગર હરેશભાઈ બનાવવાળા નામનો યુવક નોકરી કરે છે. જેમાં લાભ પેટ્રોલ પંપ દ્વારા દર મહિને ભરવાની થતી વેટની રકમ અગાઉ સેલ્સટેક્સ ઓફિસના નામનો ચેક આપતા હતા. જેથી સાગર તેઓને ચલણ મોકલી દેતો હતો. જોકે વર્ષ 2016- 17થી ચલણ ઓનલાઇન ભરવાના થતા સાગર ના કહેવાથી પેટ્રોલ પમ્પના મેનેજર દ્વારા ડીસાની SBIમાં ખાતું ખોલાવ્યું હતું. પરંતુ સાગરે તેમને જણાવ્યું કે, એસબીઆઇના એકાઉન્ટમાંથી લોગીન પાસવર્ડ ખુલતા નથી. જેથી તમે દર મહિને મને રોકડા પૈસા મોકલાવી દેજો. હું તમારા વેટ અને ઇન્કમટેક્સના નાણાં ભરી દઈશ. જેથી સાગરની વાતમાં આવી દર મહિનેનાણાં મોકલતા હતા. ત્યારબાદ સાગર પણ ચલણ ભરીને રસીદ મોકલાવી દેતો હતો.
જોકે સેલ ટેક્સ વિભાગ તરફથી લાભ પેટ્રોલ પંપને વર્ષ 2016- 17થી વર્ષ 2020-21ના વેટના નાણાં ભરવાના બાકી હોવાની નોટીસ મોકલવામાં આવતા તેઓએ તપાસ કરતાં સાગરે જણાવ્યું કે, હું એક સપ્તાહમાં તમારા પૈસા ભરી દઇશ. જોકે ત્યારબાદ પણ પૈસા ન ભરાતા પેટ્રોલ પંપનું એકાઉન્ટ સેલ ટેક્સ વિભાગ દ્વારા બંધ કરી દેવાયું હતું. જેથી આ સમગ્ર મામલે છેતરપીંડી થઈ હોવાનો અહેસાસ થતાં સેલટેક્સ કચેરીમાં તપાસ કરતા સાગરે વેટના અને ઇન્કમટેક્સ નાણાં જમા ન કરાવી ખોટા ચલણ બનાવી ખોટા ચલણોનો ખરા તરીકે ઉપયોગ કરી પેટ્રોલપમ્પના માલિકો સાથે છેતરપિંડી આચરી હતી.
આ બાબતે પેટ્રોલ પંપના માલિકે અન્ય લોકોને પણ પૂછતા બનાસકાંઠા લગભગ 5 જેટલા પેટ્રોલપંપના માલિકો સાથે આ જ રીતે કુલ રૂ.3.46 કરોડની છેતરપિંડી સાગર બનાવાલાએ કરી હોવાનું સામે આવ્યું છે. જે અંગે લાભ પેટ્રોલ પંપના મેનેજર કરસનભાઈ વેલાભાઇ ચૌધરીએ એકાઉન્ટન્ટ સાગર હરેશભાઈ બનાવાલા સામે ફરિયાદ નોંધાવતા પોલીસે આરોપી સાગરની તાત્કાલિક અટકાયત કરી છે. અને આ ગુન્હાઓમાં અન્ય કેટલા લોકો સંડોવાયેલા છે. અને કઈ રીતે છેતરપીંડી આચારી છે તે અંગે પણ તપાસ શરૂ કરી છે.