આઈડી અને આધારકાર્ડ જેવા મહત્વપૂર્ણ દસ્તાવેજોની ફોટો કોપી કરાવતી વખતે ધ્યાન નહીં રાખો તો તમારી સાથે થઈ શકે છે ફ્રોડ.
દસ્તાવેજોની ફોટો કોપી કરાવતી વખતે સાવચેતી રાખવી ખૂબ જ જરૂરી છે
આધાર કાર્ડની ઝેરોક્ષ કોપી કરાવતી વખતે રાખો ધ્યાન
જ્યારે પણ આધાર કાર્ડની ફોટો કોપી કરાવો ત્યારે બેદરકારી કરવી નહીં
આઈડી અને આધારકાર્ડ જેવા મહત્વપૂર્ણ દસ્તાવેજોની ફોટો કોપી કરાવતી વખતે સાવચેતી રાખવી ખૂબ જ જરૂરી છે. એવા ઘણાં કિસ્સા સામે આવ્યા છે જેમાં દુકાનદાર આધારકાર્ડની કોપી કરતી વખતે એક કોપી પોતાની પાસે રાખી છેતરપિંડી કરનારાઓને આપી દે છે. તેના કારણે ફ્રોડ કરનારાઓ છેતરપિંડીને અંજામ આપે છે. તેથી જ્યારે પણ આધાર કાર્ડની ફોટો કોપી કરાવો ત્યારે બેદરકારી કરવી નહીં અને દુકાનદાર તરફ ધ્યાન આપો.
પાટનગર પટનામાં પણ એવો જ એક કિસ્સો સામે આવ્યો છે જેમાં ફોટો કોપી કરનારા દુકાનદારની ફ્રોડર્સ છેતરપિંડી કરી રહ્યાં હતા. આ મામલો પટનાના પત્રકારનગર પોલીસ સ્ટેશનથી સંબંધિત છે. વિદ્યાર્થીઓ અને લોકો દુકાનદાર પાસે આધારકાર્ડની ફોટો કોપી કરાવવા જતા હતા અને દુકાનદાર તેની એક કોપી પોતાની પાસે રાખતો હતો. જે પછી તે છેતરપિંડી કરનારાઓને આપી દેતો હતો.
આધારકાર્ડની મદદથી ફ્રોડર્સ અલગ અલગ બેંકોમાં એકાઉન્ટ ખોલાવતા હતા અને આ ખાતાઓમાં છેતરપિંડી કરીને પૈસા રાખતા હતા. ખાતામાં પૈસા ટ્રાન્સફર થવાની જાણકારી મળવા છતાં પોલીસ આરોપી સુધી પહોંચી નહોતી શકતી કારણ કે ખાતું તો અન્ય વ્યક્તિના નામે હતું. પોલીસે આ ગેંગના બે આરોપીઓને પકડી લીધા છે. પૂછપરછ દરમિયાન જાણવા મળ્યું કે તેઓ અન્ય લોકોના આધારકાર્ડ સાથે છેતરપિંડી કરતા હતા.
આ મામલે પોલીસ અધિકારી મનોરંજન ભારતીએ જણાવ્યું કે પોલીસ છેતરપિંડી કરનારાઓના બેંક ખાતાઓની પણ તપાસ કરશે. આ લોકો એકાઉન્ટમાંથી પૈસા ઉપાડ્યા પછી સૌથી પહેલાં નકલી ખાતામાં ટ્રાન્સફર કરતા હતા. આ પછી એટીએમમાંથી પૈસા ઉપાડીને તેના ખાતામાં જમા કરી દેતા હતા.