ઓનલાઈન સ્કેમ / સુરતમાં યુવકને કીડની વેચી 4 કરોડ કમાવવાની લાલચ લાખો રૂપિયાની પડી, જાણો કેવી રીતે છેતરાયો આ સુરતી

• સુરતના યુવાનની લાચારી સામે આવી
• કિડની વેચવાની લોભામણી આવી
• યુવકને 4 કરોડ આપવાનું પ્રલોભન અપાયું

સુરતમાં એક યુવક કીડની વેચવાની લોભામણી જાહેરાતમાં આવી જતાં 14.78 લાખ ગુમાવવાનો વખત આવ્યો છે. 4 કરોડમાં કીડની વેચવાની જાહેરાતમાં ફસાઈ જતા છેતરાયાનો કિસ્સો સામે આવ્યો છે. થોડા દિવસ અગાઉ કિડની વેચવા બદલ 4 કરોડ મળશે તેવી જાહેરાત છપાઈ હતી. અને આ બહાને યુવક પાસેથી 14 લાખ રૂપિયા પડાવી લીધા છે. RBIના ફેક ઈ-મેઈલ ID બનાવીને સમગ્ર છેતરપીંડી કરવામાં આવી છે. 

• RBIના ફેક ઈ-મેઈલ ID બનાવીને આચરાઈ છેતરપિંડી
• અલગ-અલગ ચાર્જ પેટે રૂપિયા ખંખેરી લીધા
• સુરત સાયબર ક્રાઈમની ટીમે બેંગ્લુરુતી વિદેશી આરોપીને ઝડપી પાડ્યો
• આરોપી દક્ષિણ આફ્રિકાનો રહેવાસી
• કુલ 8 બેન્ક અકાઉન્ટ અંગે માહિતી મળી
• 1.31 કરોડના ટ્રાન્જેકશન થયા હોવાની માહિતી
• આરોપી વિદેશી વિદ્યાર્થી તરીકે ઈન્ડિયા આવ્યો હતો
• આરોપીનું નામ ટોડી ગ્રેગોરી હોવાનું સામે આવ્યું

શું હતી સમગ્ર ઘટના

સુરતના નાનપુરામાં રહેતા એક યુવકને 4 કરોડ કમાવવાની જાહેરાતે 14.78 લાખનું નુકસાન પહોંચાડ્યું છે. સમગ્ર કિસ્સામાં સુરતના આ યુવકને છેતરપીંડી કરનારા લોકોએ બેંગ્લુરુની મનીપાલ હોસ્પિટલના ડૉક્ટરની ખોટી ઓળખ આપી હતી. અને જે બાદ વિશ્વાસમાં લઈ એક પછી એક જુદા-જુદા ચાર્જના બહાને લૂંટ મચાવી હતી. યુવકને કીડની વેચી 4 કરોડ કમાવાની આશા હતી. પરંતું સમગ્ર ઈરાદા ઉલટા પડતા અરબાદ સહેબાઝ રાણાને 14 લાખ ગુમાવવાનો વારો આવ્યો છે. 

અરબાઝ નામનો આ યુવક કાર લે-વેચનો ધંધો કરે છે. પરંતુ કોરોનાકાળમાં વ્યવસાયને મોટો ફટકો પડ્યો હતો. આ કારણે યુવક આર્થિક નુકસાનીના કારણે ડિપ્રેશનમાં પણ આવી ગયો હતો. આ જ સમયે યુવકે બહેનના લગ્નમાં પણ દેવું કરીને પરિસ્થિતિ આગળ વધારી હતી. આવી પરિસ્થિતિમાં યુવકે કીડની વેચવાનો વિચાર કર્યો અને ગુગલ પર સેલ ફોર કીડની વિશે માહિતી મેળવી હતી. 

કેવી રીતે ઓનલાઈન ચંગુલમાં ફસાયો યુવક

યુવકે ગુગલ પર કીડની સેલ વિશે અને કીડની વેચવાથી મળતા નાણા અંગે માહિતી મેળવી હતી. જેમાં સૌ પ્રથમ તેને મનીપાલ હોસ્પિટલ જે બેંગ્લુરુમાં છે. તે અંગે જાણકારી મળી હતી. યુવકે ઓનલાઈન મળેલા ફોન નંબર પર કોલ કર્યો તો, કોઈ વ્યક્તિએ ઉપાડીને કાપી નાખ્યોહતો. પરંતુ થોડા સમયમાં સુરતના આ યુવકને વોટ્સઅપ કોલ આવ્યા અને એક મહિલાએ પોતાનું નામ ડૉ.શિલ્પા કુમાર જણાવ્યું હતું. અરબાઝને કીડની વેચવાની પ્રક્રિયા જણાવી તેની ખાનગી માહિતી મેળવી લીધી હતી. સૌ પ્રથમ 9,999 રજિસ્ટ્રેશનના નામે ફી પડાવી હતી.

આ બાદ મહિલાએ કહ્યું કે, 2 કરોડ રૂપિયા કીડની ટ્રાન્સફર થયા પહેલા અને બાકીના 2 કરોડ રૂપિયા કીડની ટ્રાન્ફર થયા બાદ એકાઉન્ટમાં જમા કરાશે. આ પ્રકારની મોટી લાલચ દેખાડી વધુ 35,500 રૂપિયા ઓનલાઈન જમા કરાવ્યા હતા. આ રીતે વિશ્વાસમાં લઈ એક પછી એક 14 લાખની છેતરપીંડી કરવામાં આવી હતી. અને જ્યારે આ યુવકને છેતરપીંડીનો અનુભવ થયો તો, રૂબરૂ બેંગ્લુરુ જઈને મનીપાલ હોસ્પિટલમાં તપાસ કરી હતી. જ્યાં તેને આવી કોઈ પ્રવૃતી થતી ન હોવાની જાણ થઈ હતી. સમગ્ર ઘટના બાદ યુવકે સાઈબર ક્રાઈમમાં પોતાની ફરિયાદ નોંધાવી હતી.