અત્યારે ઓનલાઇન ખરીદીનો ટ્રેન્ડ વધ્યો છે. લોકો સેકન્ડ હેન્ડ વસ્તુઓ પણ ઓનલાઇન વેચી અને ખરીદી રહ્યા છે. ઓનલાઇન છેતરપિંડીના કિસ્સા પણ વધી રહ્યા છે. ખાસ કરીને સેકન્ડ હેન્ડ વસ્તુની ઓનલાઇન ખરીદીમાં છેતરાવાની શક્યતા વધી જાય છે. વસ્ત્રાપુરના એક યુવકને OLX પર એક્ટિવા ખરીદવું મોંઘું પડ્યું છે.
વસ્ત્રાપુર વિસ્તારમાં આવેલ ગુજરાત પ્રજાપતિ હોસ્ટેલમાં રહેતો અને એલજી એન્જિનયર કોલેજની કેમિકલ બ્રાન્ચમાં અભ્યાસ કરતા રોહિત પ્રજાપતિએ સંજય વીરેન્દ્ર સિંઘ નામના યુવક સામે વસ્ત્રાપુર પોલીસ સ્ટેશનમાં છેતરપિંડીની ફરિયાદ કરી છે. રોહિત એક્ટિવા સેકન્ડ હેન્ડ ખરીદવા માટે ઓનલાઇન સર્ચ કરતો હતો. દરમિયાનમાં OLX પર એક્ટિવા પસંદ પડતાં રોહિતે યુવક સાથે મોબાઇલ પર વાતચીત કરી હતી. યુવકે રોહિતને કહ્યું કે હું આર્મીનો જવાન છું અને મારી બદલી થઇ હોવાથી મારે બીજી જગ્યાએ જવાનું છે તેથી એક્ટિવા વેચવાનું છે. તેણે આમ કહેતાં ર૦ હજાર રૂપિયામાં એક્ટિવા લેવાનું નક્કી થયું હતું.
ત્યારબાદ સંજયે પૈસા જમા કરવો તો તમારું એક્ટિવા મારો માણસ તમારા એડ્રેસ પર આપી જશે તેમ કહીને રોહિતને વિશ્વાસમાં લીધો હતો, જેથી રોહિતે એ યુવકના બેન્ક ખાતામાં ટુકડે-ટુકડે રૂ.૩૮,પ૦૦ જમા કરાવ્યા હતા. યુવક હજુ રોહિત પાસે વધુ પૈસાની માગણી કરતો હતો, જેથી રોહિતે વધુ પૈસા આપવાની ના પાડી દીધી હતી અને રોહિતે આપેલા વધુ પૈસા પાછા માગતાં યુવકે પૈસા અને એક્ટિવા નહીં આપું, તમારાથી થાય તે કરી લો તેમ કહીને મોબાઈલ બંધ કરી દીધો હતો.
યુવકનો ફોન બંધ આવતાં રોહિતે વસ્ત્રાપુર પોલીસ સ્ટેશનમાં ફરિયાદ કરી હતી. યુવક સંજયે બોગસ ઓળખના પુરાવા ઊભા કરીને OLX ઉપર ખોટી માહિતી અપલોડ કરી એક્ટિવા વેચવા માટે મૂક્યું હતું, જેથી તે આસાનીથી કોઇ પણ વ્યકિત સાથે છેતરપિંડી કરી શકે. યુવકે તેની ખોટી ઓળખ આપીને યુવક સાથે છેતરપિંડી કરી. હાલ વસ્ત્રાપુર પોલીસે યુવક સામે ગુનો નોંધીને તપાસ શરૂ કરી છે.