વલસાડ જિલ્લાના અંતરિયાળ આદિવાસી વિસ્તાર એવા ધરમપુરમાં મોબાઈલ અને ઈલેક્ટ્રીક બાઈક બુકિંગ નામની લોભામણી સ્કીમ બનાવી એક ભેજાબાજે કરોડો રૂપિયાની ઠગાઇ કરી હોવાની હકીકત બહાર આવી છે.. ધરમપુર પોલીસે આ મામલે ફરિયાદ દાખલ કરી ધરમપુરના ખારવેલ મા ઓફિસ ધરાવતી.. ઇગલ સ્માર્ટ ઇન્ડિયા કોન્ટ્રાક્ટ પ્રાઈવેટ લિમિટેડ નામની કંપનીના સંચાલક જીતેન્દ્ર ઉર્ફે જીતુ સચિન પટેલ ની ધરપકડ કરી સળિયા પાછળ ધકેલી દીધો છે.
પોલીસની પ્રાથમિક તપાસમાં ભેજાબાજ કંપની સંચાલકે ધરમપુર અને આસપાસના વિસ્તારમાં અત્યાર સુધી હજારો સભ્યો બનાવી ઊંચું કમિશન આપવાના બહાને અત્યાર સુધી અંદાજે 6 કરોડથી વધુનું રોકાણ કરાવી લીધું હોવાની હકીકત બહાર આવી રહી છે.. જોકે પોલીસે આરોપીની કંપનીના મોબાઈલ લેપટોપ અને અને અન્ય રજીસ્ટર સહિત બિલો જપ્ત કરી અને કૌભાંડ આ મૂળ સુધી પહોંચવા તપાસ હાથ ધરી છે ..આમ પ્રથમ કપરાડા તાલુકાના નાનાપોંઢા પોલીસ સ્ટેશન વિસ્તારમાં ગરીબ આદિવાસીઓ ને ભોળવી અને એક વર્ષમાં એકના ડબલ કરવાની લાલચ આપી લોકો સાથે ઠગાઇ કરતી ગેંગનો પર્દાફાશ થયો છે.. ત્યારે હવે ફરી એક વખત ધરમપુર પોલીસ સ્ટેશનમાં પણ આ જ પ્રકારનો ગુનો નોંધાતા સમગ્ર પંથકમાં ચકચાર મચી ગઈ છે..
માસ્ટર માઈન્ડ જીતુ સચિન પટેલ પોલીસ જાપ્તામાં
બનાવની વિગત મુજબ છેલ્લા કેટલાક સમયથી વલસાડ જિલ્લાના ધરમપુર અને કપરાડા જેવા અંતરિયાળ આદિવાસી વિસ્તારમાં લોકોની અજ્ઞાનતાનો લાભ લઇ અને કેટલાક ભેજાબાજો ઊંચું કમિશન આપવાની અને એક વર્ષ માં એક ના ડબલ કરાવી આપવાની લાલચ આપી અને લોકો પાસે રોકાણ કરાવી અને તેની ચેન બનાવી અને ઊંચું કમિશન આપવાના બહાને લોકો પાસેથી કરોડો રૂપિયાનું રોકાણ કરાવતાં હતા..અને ત્યાર બાદ લોકો સાથે છેતરપિંડી કરી રહ્યા હોવાની વાતો વહેતી થઈ હતી..આથી આ બાબતે વલસાડ જિલ્લા પોલીસે તપાસ હાથ ધરી હતી.. તપાસના અંતે સૌ પ્રથમ કપરાડા તાલુકાના નાનાપોંઢા પોલીસ સ્ટેશનમાં આવી જ એક ભેજાબાજ ગેંગ સામે ફરિયાદ નોંધી અને પાંચ ભેજાબાજની ધરપકડ કરી તેમના વિરોધ કાયદેસરની કાર્યવાહી હાથ ધરી હતી.. ત્યારે ફરી એક વખત ધરમપુર પોલીસ સ્ટેશનમાં પણ પોલીસે ધરમપુરના ખારવેલ વલસાડ રોડ પર ઓફિસ ધરાવતી ઇગલ સ્માર્ટ ઇન્ડિયા કોન્ટ્રાક્ટ પ્રાઈવેટ લિમિટેડ નામની કંપની માં પણ રેડ કરી હતી. આ રેડ દરમિયાન કંપનીના સંચાલક જીતેન્દ્ર ઉર્ફે જીતુ સચિન પટેલ ઝડપાઈ ગયો હતા.. આથી પોલીસે કંપની સંચાલક ની આગવી ઢબે પૂછપરછ કરતા સંચાલકે વટાણા વેરી નાખ્યા હતા.
રોકાણકાર 1700 રૂપિયા ભરી અને સભ્ય બની શકતો અન્યને સ્કીમમાં લાવવા કમિશન અપાયું
અને તેના જણાવ્યા મુજબ પોલીસની પ્રાથમિક તપાસમાં જે હકીકત બહાર આવી છે.. તે મુજબ આરોપી જીતેન્દ્ર ઉર્ફે જીતુ સચિન પટેલ સ્માર્ટ ઇન્ડિયા કોન્ટ્રાક્ટ પ્રાઈવેટ લિમિટેડ નામની કંપની ખોલી અને આ કંપનીમાં ઈલેક્ટ્રીક બાઈક અને મોબાઇલના બુકિંગ ના નામે વિવિધ આકર્ષક અને લોભામણી સ્કીમો ચલાવતો હતો.. અને રોકાણકારો પાસે આ સ્કીમમાં રોકાણ કરાવી અને તેના બદલામાં ઊંચું કમિશન આપવાની લાલચ આપતો હતો.. આ સ્કીમમાં સભ્ય બનનાર રોકાણકાર 1700 રૂપિયા ભરી અને સભ્ય બની શકતો હતો ..અને ત્યારબાદ નવા બનેલા સભ્યો અન્ય લોકોને પણ સભ્ય બનાવી અને રોકાણ કરાવતા હતા.. આ રીતે રોકાણ કરવાની અને કમીશન આપવાની ચેન ચલાવતા હતા. અને ત્યારબાદ ત્યારબાદ તેમની સાથે છેતરપિંડી કરતા હોવાનું મનાઈ રહ્યું છે.. પોલીસે કંપની સંચાલકની ઓફીસમાંથી 14 લાખ રૂપિયા રોકડા અને બેન્ક એકાઉનટમા 57 લાખ રૂપિયા જમા હોવાથી બેંક એકાઉન્ટ સીલ કરાવી દીધું હતું. સાથે સ્થળ પરથી મોબાઇલ લેપટોપ અન્ય રોકાણના દસ્તાવેજ રજીસ્ટર અને બિલબુક સહિતના મહત્વના દસ્તાવેજો હાથ લાગ્યા છે.
40 હજારથી વધુ લોકો સાથે ઠગાઇ કરી 6 કરોડનો ચૂનો ચોપડયો
અત્યાર સુધી ભેજાબાજે આ વિસ્તારના 40 હજારથી વધુ લોકોને સભ્યો બનાવી અને તેમની પાસેથી ઊંચું કમિશન આપવાની લાલચ આપી અને રોકાણ કરાવ્યું હતું. અત્યાર સુધી જે આંકડો બહાર આવે છે તે મુજબ આ ભેજાબાજે કંપની ખોલી હજારો રોકાણકારો પાસેથી રૂપિયા 6 કરોડથી વધુનું રોકાણ કરાવ્યું હોવાનું બહાર આવ્યું છે. જોકે હજુ પણ પોલીસ કંપની સંચાલક પાસેથી મળેલા મોબાઇલ લેપટોપ અને અન્ય દસ્તાવેજોમાંથી હકીકતમાં કેટલા રોકાણકારોએ કેટલા કરોડનું રોકાણ કરેલું છે ? અને આ ભેજાબાજે અત્યાર સુધી કેટલા લોકો સાથે ઠગાઈ આચરી છે? તે મામલે ઊંડાણપૂર્વક તપાસ હાથ ધરી છે.