જામનગર / એરપોર્ટમાં વાહન રાખવાના કોન્ટ્રાક્ટના નામે છેતરપિંડી, 11 વાહનો સાથે બે ભેજાબાજ પકડાયા, આ રીતે ઉતારતા હતા બાટલીમાં

• જામનગરમાં છેતરપિંડીનો ચોંકાવનારો કિસ્સો
• એરપોર્ટમાં કોન્ટ્રાક્ટ ઉપર વાહન રાખવાની લાલચ  આપી વિશ્વાસઘાત
• ભાડે વાહન મેળવી આરોપીઑ માલિકને ખબર વગર વેંચી મારતા હતા

જામનગર શહેરમાં છેતરપિંડીનો ચોંકાવનારો કિસ્સો સામે આવ્યો છે. જેમાં વાહન માલિકોને પોતાનું વાહન એરપોર્ટમાં કોન્ટ્રાક્ટ ઉપર રખાવી નાણાની લાલચ આપી માલિકને બાટલીમાંઉતારતા હતા. ત્યારબાદ ભેજાબાજ શખ્સો વાહનના મૂળ માલિકની જાણ બહાર વાહન બારોબર વેચી અથવા ગીરવી રાખી નાના ઉપાડી લેતા હતા. આ પ્રકારે  છેતરપિંડી આચરતી ગેંગના બે સભ્યોને 11 વાહન સહીત રૂ. 84 લાખના મુદ્દામાલ સાથે સીટી સી ડિવિઝન સર્વેલન્સ સ્કોડે દબોચી લીધા છે.  

ત્રણ શખ્સોએ છેતરપિંડી કર્યાની રાવ
જામનગર સીટી-સી પોલીસમાં ફરિયાદી દ્વારા તેમના વાહનો એરપોર્ટમાં ભાડે રખાવી સારૂ વળતર આપવાની લાલચ આપી અવેશ ઇકબાલ આરંભડા, સરફરાઝ ઉર્ફે રાજ હૈદરઅલી ખોડ તથા મહમદ હુસેન ઉર્ફે સમીર અકબર ખોડ નામના શખ્સોએ છેતરપિંડી કરી હોવાની અરજી થઇ હતી. જે કેસની ગંભીરતાને ધને  લઈને આ કેસમાં જિલ્લા પોલીસવડા પ્રેમસુખ ડેલુ તથા નાયબ પોલીસ અધિક્ષક જે.એન.ઝાલાના માર્ગદર્શન મુજબ સીટી-સીના પીઆઇ કે.એલ.ગાધેની સુચનાથી સીટી-સી પોલીસે રાજકોટમાં તપાસ હાથ ધરતાં સરફરાઝ ઉર્ફે રાજ હૈદરઅલી ખોડ તથા મહમદ હુસેન ઉર્ફે સમીર અકબર ખોડ નામના બે શખ્સોને ઝડપી લીધાં હતાં.

અનેક ગાડીઑ જપ્ત કરતી પોલીસ 
આરોપીઓ પાસેથી રૂા.4 લાખની કિંમતની જીજે.06.ઇડી.5114 નંબરની આઇ-20 એએસટીએ 1.2 ઇ ફોર મોડલની મોટરકાર, રૂા.6 લાખની કિંમતની જીજે.10.બીઆર.7286 નંબરની હોન્ડા અમેઝ, રૂા.40 લાખની કિંમતની જીજે.09.બીસી.0909 નંબરની બીએમડબ્લ્યુ, રૂા.7 લાખની કિંમતની જીજે.10.ડીઇ.0878 નંબરની રેનોલ્ટ ટ્રાઇબર આરએકસઇ, રૂા.5 લાખની કિંમતની જીજે.10.ડીજે.0639 નંબરની મારૂતી ઇકો, રૂા.5 લાખની કિંમતની જીજે.10.એપી.3889 નંબરની મારૂતી ઇકો, રૂા.6 લાખની કિંમતની જીજે.11.એએસ.8222 નંબરની અરટીગા, રૂા.3 લાખની કિંમતની જીજે.01.કેએચ.2385 નંબરની એસએકસ-4, રૂા.4 લાખની કિંમતની જીજે.03.બીવાય.1901 નંબરની મારૂતી ટૂરએસ, રૂા.1 લાખની કિંમતનું જીજે.25.એન.4997 નંબરનું રોયલ ઇન્ફિલ્ડ બુલેટ તથા રૂા.3 લાખની કિંમતની જીજે.10.એપી.6141 નંબરની સિફટ ડિઝાયર કાર જપ્ત કરી છે. 

કૌભાંડના મૂળ સુધી પહોંચવા પોલીસ તપાસનો ધમધમાટ
પોલીસે કુલ રૂા.84 લાખની કિંમતના 11 વાહનો શક પડતી મિલકત તરીકે કબ્જે કરવામાં આવ્યા હતાં. અને મુળ માલિકને પરત સોંપવા કાયદેસરની કાર્યવાહી હાથ ધરવામાં આવી હતી.મહત્વનું છે કે અમુક માલિકોને આ કૌભાંડ અંગે જાણ થતાં પોતાની ગાડી હોવા છતાં આરોપીએ ગીરવે રાખેલી ગાડીના નાણા ભરીને ગાડી છોડાવી ગયા હોવાની પણ ચર્ચા જાગી છે. જેને લઇને  કૌભાંડના મૂળિયાં કેટલે સુધી પથરાયેલા છે. તે જાણવા પોલીસે ઊંડી તપાસ હાથ ધરી છે.