અમદાવાદમાં ઓનલાઈન એપથી મકાન ભાડે શોધી રહ્યાં છો તો ચેતજો, કેટલીક ફ્રોડ ટોળકી વેબસાઈટો પર ભાડે ફ્લેટ આપવાનું કહીને આચરી રહી છે છેતરપિંડી.
આલિશાન ફ્લેટના ફોટો મુકી લોકો સાથે છેતરપિંડી
ભેજાબાજે Housing.Com વેબસાઈડ પર મુકી હતી એડ
લોકો ફ્લેટ જોવા પહોંચતા ફૂટ્યો ભાંડો
તમે અમદાવાદમાં રહો છો અને ઓનલાઈન વેબસાઈટ પરથી ઘર ભાડે શોધી રહ્યા છો તો તમારે ચેતવાની જરૂર છે. હાલ એક ચોંકાવનારો કિસ્સો સામે આવ્યો છે. જેમાં કેટલીક ફ્રોડ ટોળકી વેબસાઈટો પર ભાડે ફ્લેટ આપવાનું કહીને છેતરપિંડી આચરી રહી છે. ટોળકી અન્ય વ્યક્તિઓના ફ્લેટના ફોટા અને લોકેશન અપલોડ કરી નાણા ખંખેરી રહી છે. ટોળકી ઓછા ભાવે આલિશાન ફ્લેટના ફોટા મૂકી લોકો પાસેથી પૈસા ખંખેરી રહી છે.
CAના મકાનના ફોટા વેબસાઈટ પર અપલોડ કરી છેતરપિંડી
અમદાવાદ શહેરના ખ્યાતનામ CA કરીમ લાખાણીના મકાનના ફોટા વેબસાઈટ પર અપલોડ કરી અનેક લોકો સાથે છેતરપિંડી આચરવામાં આવી છે. અંકિત દેસાઈ નામના ભેજાબાજે Housing.Com વેબસાઈટ પર ફ્લેટ ભાડે આપવાની એડ મૂકીને અનેક લોકો પાસેથી પૈસા ખંખેરી લીધા છે. જ્યારે લોકો CA કરીમ લાખાણીનો ફ્લેટ જોવા પહોંચ્યા ત્યારે સમગ્ર ભાંડો ફૂટ્યો હતો.
વેબસાઈટ પર મૂકી એડ
આ મામલે CA કરીમ લાખાણીએ VTV ન્યૂઝને જણાવ્યું કે, આજથી અઠવાડિયા પહેલા મારા ઘરે એક વ્યક્તિ આવ્યા હતા. તેમણે મને જણાવ્યું હતું કે, તમારું મકાન ભાડે આપવાનું છે. ત્યારે મેં તેમને ઈનકાર કર્યો હતો. જે બાદ તેમણે મને જણાવ્યું હતું કે મેં તમારા ફ્લેટને ભાડે આપવાની એડ Housing.Com વેબસાઈટ પર જોઈ. તેમાં અંકિત દેસાઈ નામના શખ્સે આ એડ મૂકી છે અને ફ્લેટનું ભાડું 8 હજાર લખવામાં આવ્યું છે. અંકિત દેસાઈ નામના શખ્સે મને કહ્યું હતું કે, તમે મકાન જોઈ આવો. તેથી હું જોવા આવ્યો છું.
આ જાણીને હું ચોંકી ગયોઃ CA કરીમ લાખાણી
કરીમ લાખાણીએ જણાવ્યું કે, આ જાણીને હું પોતે ચોંકી ગયો હતો. આ વ્યક્તિએ સમગ્ર હકીકત જણાવ્યા બાદ મેં આ વેબસાઈટ ખોલીને તમામ વિગતો ચેક કરી. આમાં જે ફોટા મૂકવામાં આવ્યા છે તે ગૂગલ પરથી લેવામાં આવ્યા છે તથા આવા ફ્લેટ આ બિલ્ડિંગમાં આવેલા જ નથી. આ એડ મૂકનારને મેં ફોન કર્યો તો તેનો ફોન ક્યારેક લાગે છે તો ક્યારેક લાગતો નથી, લાગે તો પણ તે ઉપાડતો નથી. મને લાગે છે કે અત્યાર સુધીમાં ઘણા લોકોને તેણે છેતર્યા હશે. હું આપના માધ્યમથી લોકોને અપીલ કરું છું કે આવા ઠગોથી બચીને રહો.
મકાનમાલિક સાથે થયો હતો સાયબર ફ્રોડ
આપને જણાવી દઈએ કે, આ પહેલા પણ ફ્લેટ ભાડે ચડાવવાના ચક્કરમાં મકાનમાલિકે 10 લાખ રૂપિયા ગુમાવ્યા હતા. આ મામલે સાયબર ક્રાઈમમાં મકાનમાલિકે ફરિયાદ નોંધાવી હતી. બોડકદેવ ખાતે રહેતા જિતેન્દ્રભાઈ સાયબર છેતરપિંડીનો ભોગ બન્યા હતા. મકાન ભાડે લેવાના બહાને ઠગે તેમના ખાતામાંથી 10 લાખ રૂપિયા ઉપાડી લીધા હતા.