વિશ્વમાં કોરોના વાયરસનો ભરડો સતત વધી રહ્યો છે. કોરોના વાયરસ સામે લડવા માટે અનેક વેક્સિન પર કામ કરવામાં આવી રહ્યું છે અને અનેક દવા પર દાવાઓ પણ કરવામાં આવ્યા છે ત્યારે જે દવા માટે શરૂઆતમાં દેશો પડાપડી કરી રહ્યા હતા તે જ દવા પર હવે પ્રતિબંધ લાગી રહ્યા છે. ખાસ કરીને યુરોપના દેશો Hydroxychloroquine ખૂબ નાખુશ છે.
યુરોપિયન દેશો ફ્રાંસ ઈટાલી અને બેલ્જિયમે આ દવા પર નારાજગી વ્યક્ત કરી
ફ્રાન્સે પણ કોરોના સારવારમાં HCQની મંજૂરી રદ કરી
WHO એ આ દવાના ટ્રાયલ પર રોક લગાવી હતી
કોરોના વાયરસ સામે લડવા માટે એક સમયે જે દવાની દુનિયાભરમાં પ્રશંસા કરવામાં આવી રહી હતી તેના પર વિશ્વ સ્વાસ્થ્ય સંગઠન દ્વારા લેવાયેલ એક નિર્ણય બાદ અનેક દેશો હવે આ દવાને શંકાની નજરે જોઈ રહ્યા છે. યુરોપિયન દેશો ફ્રાંસ ઈટાલી અને બેલ્જિયમે આ દવા પર નારાજગી વ્યક્ત કરી છે.
યુરોપના દેશો થયા નાખુશ
કોરોના સામે લડવામાં HCQ મદદરૂપ થાય છે તેવા દાવાઓ બાદ જે દેશોએ આ દવાથી સારવાર શરુ કરી હતી તે હવે આ દવાના ઉપયોગ પર પ્રતિબંધ મૂકી રહી છે. ફ્રાન્સે કોરોના વાયરસના દર્દીઓની સારવાર માટે તબીબોને આ દવાના ઉપયોગની મંજૂરી આપી હતી તે મંજૂરીને રદ્દ કરી દીધી છે. ઈટલી અને બેલ્જિયમે અધિકારીઓને ક્લિનિકલ ટ્રાયલ માટે આ દવાના ઉપયોગ પર બેન લગાવી દીધો છે.
WHOએ લગાવી હતી રોક
નોંધનીય છે કે WHOએ સુરક્ષાની ચિંતાને ધ્યાનમાં રાખીને આ દવાનું વૈશ્વિક ટ્રાયલ અટકાવી દીધું હતું. ઓક્સફર્ડ યુનિવર્સીટીએ ટ્રાયલ શરુ થયાના એક અઠવાડિયામાં જ અટકાવી દીધું. આટલું જ નહીં એક અહેવાલમાં તો એવો દાવો પણ કરવામાં આવ્યો છે કે HCQ તો મોતના ખતરાને જ વધારી દે છે.
ડોનાલ્ડ ટ્રમ્પ તો પોતે આ દવા લે છે !
નોંધનીય છે કે અમેરિકા અને બ્રાઝિલ તો શરૂઆતથી આ દવાનું સમર્થન કરી રહ્યું છે. અમેરિકન રાષ્ટ્રપતિ અને બ્રાઝિલના રાષ્ટ્રપતિએ પણ દવાના ઉપયોગને પ્રોત્સાહન આપ્યું છે. ડોનાલ્ડ ટ્રમ્પે તો એવું કબૂલ પણ કર્યું હતું કે કોરોના વાયરસથી બચવા માટે તેઓ પોતે આ દવા લઇ રહ્યા છે, જોકે તે બાદ તેમની ખૂબ ટીકા થઇ હતી.