ભારત સહીત દુનિયામાં કોરોના વાયરસના કેસમાં સતત વધારો થઇ રહ્યો છે, અમેરિકામાં જ્યાં એક અઠવાડિયામાં પાંચ લાખ કેસ સામે આવી રહ્યા છે ત્યાં ફ્રાંસમાં તો એક મહિનો લોકડાઉન કરવાનો વારો આવ્યો હોય તેવું લાગી રહ્યું છે.
દુનિયામાં કોરોના સંક્રમિતનો આંકડો ૪.૪૨ કરોડથી વધુ થઇ ગયો
ફ્રાંસ સરકારે એક મહિનાના લોકડાઉનની તૈયારીઓ કરી
રાષ્ટ્રપતિ એમેનુએલ મેક્રોં રાષ્ટ્રને સંબોધિત કરશે
દુનિયામાં કોરોના સંક્રમિતનો આંકડો ૪.૪૨ કરોડથી વધુ થઇ ગયો છે. ૩,૨૪,૧૨,૭૦૩ દર્દીઓ રિકવર થઇ ચૂક્યા છે. અત્યાર સુધી ૧૧.૭૧ લાખથી વધુ લોકો મોતને ભેટ્યા છે. અમેરિકામાં એક અઠવાડિયામાં પાંચ લાખ નવા કેસ સામે આવ્યા છે. આ દરમિયાન ૫૬૦૦ લોકોનાં મોત થયાં હતાં. બીજી તરફ ફ્રાંસ સરકારે એક મહિનાના લોકડાઉનની તૈયારીઓ કરી લીધી છે.
અમેરિકામાં ચૂંટણીઓ નજીકમાં છે, પરંતુ અહીં કોરોનાના કેસ ઝડપથી વધી રહ્યા છે. એક અઠવાડિયામાં પાંચ લાખથી વધુ નવા સંક્રમિત મળી આવ્યા છે. આ દરમિયાન ૫૬૦૦ સંક્રમિત મૃત્યુ પામ્યા છે. કોરોનાથી સૌથી વધુ પ્રભાવિત રાજ્ય ઇલિનોઇસ છે. ૩૧,૦૦૦ કેસ આ રાજ્યમાં સામે આવ્યા છે. પેન્સિલવાનિયા અને વિસ્કોન્સિનમાં પણ પરિસ્થિતિ ઝડપથી બગડી રહી છે. વિસ્કોન્સિનના હેલ્થ ઇન્ચાર્જ આન્દ્રે પોમે કહ્યું કે અમે ઇચ્છીએ છીએ કે ચૂંટણી માટે મતદાન દરમિયાન કોરોના પરેશાની ન બને. આ માટે દરેક વ્યવસ્થા થઇ રહી છે.
ફ્રાંસમાં સંક્રમણની બીજી લહેરને જોતાં સરકાર સતર્ક થઇ ગઇ છે. આવતી કાલ રાતથી સમગ્ર દેશમાં લોકડાઉન લગાવાશે. આજે રાતે રાષ્ટ્રપતિ એમેનુએલ મેક્રોં રાષ્ટ્રને સંબોધિત કરશે. એવું માનવામાં આવી રહ્યું છે કે આ સંબોધન દરમિયાન લોકડાઉનની જાણકારી અપાશે. આ સાથે કેટલાક પ્રતિબંધની જાહેરાત પણ કરાશે. ખાસ વાત એ છે કે પહેલી વાર સરકાર જણાવી શકે છે કે પ્રવાસીઓને લઇ તેમની રણનીતિ શું હશે. મેક્રોંએ ગયા અઠવાડિયે કહ્યું હતું કે દેશમાં પર્યટકોના કારણે સંક્રમણ ફેલાઇ રહ્યું છે.