દુનિયામાં કોરોના વાઇરસથી અત્યાર સુધી ૧,૫૬,૫૧,૬૦૧ લોકો સંક્રમિત મળી આવ્યા છે, તેમાંથી ૯૫,૩૫,૨૦૯ લોકો ઠીક થઇ ચૂક્યા છે. જ્યારે ૬,૩૬,૪૬૪ લોકોનાં મોત થયાં છે. આ આંકડા વર્લ્ડોમીટર મુજબના છે. ફ્રાન્સે મહામારીથી બેરોજગાર યુવાનો માટે ૬.૫ બિલિયન યુરો (લગભગ ૫૬૫૦ હજાર કરોડ રૂપિયા)નું પેકેજ જાહેર કર્યું છે. વડા પ્રધાન જ્યાં કાસ્તેએ જણાવ્યું કે આ એક-બે વર્ષની યોજના છે. તે હેઠળ કંપનીઓ ૨૫ વર્ષથી ઓછી ઉંમરના યુવાનોને નોકરી આપવા માટે સબસિડી આપશે.
સંક્રમણના વધતા કેસ છતાં ઇરાકે ગુરુવારે ઇન્ટરનેશનલ ફ્લાઇટ્સને ફરી વખત શરૂ કરવાની મંજૂરી આપી છે. અહીંના સિવિલ એવિયેશન ડિપાર્ટમેન્ટે કહ્યું કે બગદાદ, બસરા અને નઝફ એરપોર્ટ પર વિદેશ જનારા લોકોની માંગ વધી છે. તેને જોતાં ઇન્ટરનેશનલ ફ્લાઇટ્સ શરૂ કરવાની પરવાનગી આપવામાં આવે છે. દેશમાં છેલ્લા ૨૪ કલાકમાં સંક્રમણના ૨૩૬૧ નવા કેસ સામે આવવાની સાથે અહીં સંક્રમિતોનો આંકડો ૧,૦૨,૨૨૬ થઇ ચૂક્યો છે. બીજી તરફ ૪૧૨૨ મૃત્યુ થયાં છે. અત્યાર સુધી ૬૯,૪૦૫ લોકો સંપૂર્ણ રીતે સ્વસ્થ થયા છે.
ટ્રમ્પે પોતાના પક્ષનો કાર્યક્રમ રદ કર્યો
અમેરિકામાં સંક્રમણના કેસ સતત વધી રહ્યા છે. અહીં સંક્રમિતોનો આંકડો ૪૦ લાખને પાર થઇ ગયો છે. વધતા કેસને જોતાં ટ્રમ્પે ફ્લોરિડામાં યોજાનારી રિપબ્લિક પાર્ટીનો કાર્યક્રમ રદ કરી દીધો છે. થોડા દિવસ પહેલાં સંક્રમણને જોતાં પહેલાંથી નક્કી પોતાની રેલીના બદલે ટેલી રેલી કરવાની જાહેરાત કરી હતી. જોન હોપકિન્સ યુનિવિર્સટીના જણાવ્યા મુજબ અહીં ૪,૨૧,૮૫૭ કેસ સાથે કેલિફોર્નિયા સૌથી પ્રભાવિત રાજ્ય બની ગયું છે.