કોરોના વાયરસના કેસમાં વિશ્વભરમાં તેજી આવી છે ત્યારે ફ્રાંસના પેરિસ સહિતના વિસ્તારોમાં એક મહિનાનું લોકડાઉન કરી દેવામાં આવ્યું છે.
ફ્રાંસમાં ફરી મહામારીનો કહેર
ફ્રાંસના ઘણા શહેરોમાં કોરોનાની ત્રીજી લહેર આવી
પેરિસ સહિત 15 વિસ્તારોમાં એક મહિનાનું લોકડાઉન
દુનિયાના કેટલાય ક્ષેત્રોમાં કોરોના વાયરસની રફતારમાં તેજી જોવા મળી રહી છે. પ્રભાવિત દેશોમાં ફરીથી લોકડાઉન લગાવવામાં આવી રહ્યું છે. હવે ફ્રાંસના પાટનગર પેરિસ અને અન્ય ક્ષેત્રોમાં સીમિત લોકડાઉન લગાવવાનો નિર્ણય લેવામાં આવ્યો છે. આ દરમિયાન સ્કૂલ અને આવશ્યક ચીજવસ્તુઓની દુકાનો ખુલ્લી રહેશે.
પહેલા જેવુ કડક લોકડાઉન નહીં
નોંધનીય છે કે ફ્રાંસમાં કોરોના વાયરસની ત્રીજી લહેર આવી ગઈ છે જે બાદ આ નિર્ણય લેવાની ફરજ પડી છે. પેરિસ સહિત દેશના 15 વિસ્તારોમાં લોકડાઉન લગાવવામાં આવ્યું છે. શુક્રવારે અડધી રાતથી આ નિર્ણય લાગુ પડી જશે. ફ્રાંસના વડાપ્રધાને કહ્યું છે કે આ લોકડાઉન પહેલા જેવુ નથી.
સતત વધી રહ્યા છે નવા કોરોના કેસ
નોંધનીય છે કે ફ્રાંસમાં એક જ દિવસમાં કોરોના વાયરસના 35 હજાર કેસ સામે આવ્યા છે અને વડાપ્રધાન જીન કેસટેક્સે કહ્યું છે કે કોરોના વાયરસની ત્રીજી લહેર તેજીથી દેશમાં ફેલાઈ શકે છે. સ્વાસ્થ્ય મંત્રીએ કહ્યું કે પેરિસમાં પરિસ્થિતિ વધારે ખરાબ છે. બીજી તરફ સરકારની ટીકા થઈ રહી છે કે સરકારે વેક્સિન આપવામાં મોડું કર્યું છે.
ગયા મહિને જ ફ્રાંસમાં ઉત્તર ક્ષેત્રમાં આંશિક લોકડાઉન લગાવવામાં આવ્યું હતું. ફ્રાંસમાં અત્યારે સુધી 91 હજાર લોકોએ કોરોના વાયરસના કારણે જીવ ગુમાવ્યા છે જ્યારે 41 લાખથી વધારે લોકો સંક્રમિત થઈ ચૂક્યા છે.
ભારતના ઘણા શહેરોમાં લાગ્યા પ્રતિબંધો
ભારતમાં પણ કોરોના વાયરસની નવી લહેરે દસ્તક આપી દીધી છે, મહારાષ્ટ્રમાં કોરોના વાયરસના સૌથી વધારે કેસ સામે આવી રહ્યા છે અને અન્ય 8થી 10 રાજ્યોમાં ચિંતા વધી છે. ગુજરાતના ચાર મહાનગરોમાં પણ કોરોના વાયરસના કારણે પ્રતિબંધો લગાવી દેવામાં આવ્યા છે ત્યારે દુનિયાભરની સરકારો હવે કોરોનાની આ લહેર સામે ટેન્શનમાં મુકાઇ હોય તેવું દેખાઈ રહ્યું છે.