દાવો / વુહાનની લેબમાં આ 'ખાસ ઉદ્દેશ'થી કોરોના પેદા કર્યો હોવાનો ઘટસ્ફોટ, ચીને પણ આપ્યો જવાબ

• અમેરિકાની ચેનલ ફોક્સ ન્યૂઝે કર્યો ઘટસ્ફોટ  
• ડોનાલ્ડ ટ્રમ્પે પણ તપાસ કરવાનું કહ્યું હતું 
• ચીને જવાબ આપતાં WHO નો સહારો લીધો 

અમેરિકાની ન્યૂઝચેનલે કર્યો દાવો : 

હવે અમેરિકાની ટીવી ચેનલ ફોક્સ ન્યૂઝે ઘટસ્ફોટ કર્યો છે કે ચીને વુહાનની લેબમાં આ વાયરસ પેદા કર્યો જેથી તે દેખાડી શકે કે તેના વૈજ્ઞાનિક અમેરિકાના વૈજ્ઞાનિકો કરતા આગળ છે. સાથે જા આ તેનો સૌથી મોંઘો ગુપ્ત કાર્યક્રમ હતો. ચેનલે દાવો કરતા કહ્યું કે ચીને વેટ માર્કેટમાંથી વાયરસ ફેલાયો છે તેવી થીયરી જાણી જોઇને ફેલાવી હતી જેથી લેબ પર આરોપ ન આવે, આમ કરીને ઈટાલી અને અમેરિકાને ટાર્ગેટ કરી શકાય. 

કોરોના વાયરસ પર મોટા ખુલાસા 

 ન્યૂઝચેનલમાં દાવો કરવામાં આવ્યો કે આમ કરીને ચીન દુનિયાને બતાવવા માંગતું હતું કે ચીન અમેરિકા કરતા વધુ સારી રીતે આવા વાયરસ સામે લડી શકે છે, આટલું જ નહીં દાવો તો ત્યાં સુધી કરવામાં આવ્યો કે જ્યાંથી આ વાયરસ ફેલાવવાની વાત ચાલી રહી છે ત્યાં તો ચામાચીડિયા વેચતા જ ન હતા. આમ દાવો કરવામાં આવ્યો કે ચીન દુનિયાને બતાવવા માટે જ આ વાયરસ પર સ્ટડી કરી રહ્યું હતું. 

ડોનાલ્ડ ટ્રમ્પનો આક્ષેપ અને ચીનનો જવાબ : 

નોંધનીય છે કે આ પહેલાં અમેરિકાના રાષ્ટ્રપતિએ પણ કહ્યું હતું કે વુહાનની લેબમાંથી આ વાયરસ ફેલાવવામાં આવ્યો છે કે કેમ તે અંગે પણ તપાસ કરીને જ રહીશું. 

અમેરિકાના રાષ્ટ્રપતિના નિવેદન બાદ ચીને જવાબ આપ્યો હતો. ચીનના વિદેશ મંત્રાલયના પ્રવક્તા ઝાઓ લિજિયને કહ્યું કે વર્લ્ડ હેલ્થ ઓર્ગેનાઈઝેશન દ્વારા ઘણીવાર કહેવામાં આવ્યું છે કે કોરોના વાયરસ લેબમાં પેદા થયો છે તેના કોઈ જ પૂરાવા નથી. 

બંને દેશો વચ્ચે તણાવ વધવાના અણસાર 

એક તરફ કોરોના વાયરસના કારણે ચીન અને અમેરિકા સામસામે છે ત્યાં બીજી તરફ અમેરિકાના વિદેશ વિભાગ દ્વારા કહેવામાં આવ્યું છે કે ચીને ગુપ્ત રીતે પરમાણુ પરીક્ષણ કર્યો છે. અમેરિકાની આ શંકા બાદ બંને દેશો વચ્ચે તણાવ વધવાના એંધાણ છે.