ભારતીય સેનાના બહાદુર જવાનો હવે યુદ્ધના મેદાનમાં દુશ્મનો પર રશિયન ફ્યુઝથી સજ્જ 30 એમએમ બીએમપી-2 બોમ્બ (સેલ) વરસાવશે. મધ્યપ્રદેશના જબલપુર સ્થિત ઓર્ડનન્સ ફેક્ટરી ખામરીયા (ઓએફકે)માં આ બોમ્બના ચાર લાખ પીસ બનાવવાની તડામાર તૈયારીઓ ચાલી રહી છે. જો આ યોજના સફળ રહી તો માર્ચ-2020 સુધીમાં ઓએફકેમાં બનેલા આ બોમ્બનું મોટું કન્સાઈન્મેન્ટ ભારતીય સેનાને સોંપવામાં આવશે.
સેનાની ખાસ માંગ પર સંરક્ષમ મંત્રાલયે ઓર્ડનન્સ ફેક્ટરી બોર્ડ (ઓએફબી)ના માધ્યમથી ઓએફકેને ચાર લાખ 30 એમએમના બોમ્બ જલ્દીથી જલ્દી બનાવવાના આદેશ આપ્યા છે. આ અગાઉ ઓએફકેને નાણાકીય વર્ષ 2019-20માં 30 મીમી બોમ્બના 1.5 લાખ પીસ બનાવવાનો લક્ષ્યાંક મળ્યો હતો. ફેક્ટરીના કામદારો હાલમાં આ બોમ્બને ઝડપથી બનાવવામાં વ્યસ્ત છે. તેમ છતાં પણ આ ફેક્ટરીના લગભગ 350 કર્મચારીઓનું ત્રણ વર્ષનું કામ છીનવાઈ ગયું છે કારણ કે ઓએફકે વહીવટીતંત્રએ 30 એમએમ બોમ્બના નવા ઉત્પાદન લક્ષ્યાંકને મેળવવા માટે એક રશિયન કંપની પાસેથી ચાર લાખ ફ્યુઝ ખરીદ્યા છે. હાલમાં ઓએફકેની એક ટીમ રશિયન ફ્યુઝની ગુણવત્તાનું પરીક્ષણ કરી રહી છે.
30 એમએમ બીએમપી-2 બોમ્બ (સેલ)ની લંબાઈ પાંચ ઈંચ અને પહોળાઈ લગભગ અઢી ઈંચ છે. આ બોમ્બના આગળના છેડે લગાવવામાં આવેલો ફ્યુઝ હળવા વિસ્ફોટથી સક્રિય થાય છે અને થોડી સેકંડ બાદ વિસ્ફોટકમાં જોરદાર બ્લાસ્ટ થાય છે. આ બોમ્બ ફક્ત ગનથી ચલાવી શકાય છે.
સેના આ બોમ્બનો ઉપયોગ જમીનથી જમીન, જમીનથી હવા, હવાથી જમીન અને જહાજો પર હુમલો કરવા માટે કરે છે. તે બધા પ્રયોગોમાં શ્રેષ્ઠ પ્રદર્શન કરે છે. સૈન્ય જવાન 30 એમએમ બીએમપી-2 બોમ્બ ફોડીને આસાન અને સુરક્ષિત હુમલો કરી શકે છે.
ઓએફકેએ રશિયાની દારૂગોળો વેચતી કંપની પાસેથી ચાર લાખ ફ્યુઝ ખરીદવા માટે 65 કરોડ રૂપિયા ખર્ચ કર્યા છે. તેમાં 30 એમએમના એક ફ્યુઝની કિંમત 25 અમેરિકન ડૉલર એટલે કે ભારતીય ચલણમાં લગભગ 1700 રૂપિયા છે. જ્યારે ઓએફકેમાં 30 એમએમના એક ફ્યુઝના ઉત્પાદનની કિંમત આશરે 2600 રૂપિયા થઈ જાય છે.