બંગાળ / EDનાં દરોડા બાદ અર્પિતા મુખર્જીનાં ઘરેથી ચાર લકઝરી કાર ગાયબ, રૂપિયાથી છલોછલ હોવાની આશંકા

• શિક્ષક ભરતી કૌભાંડમાં ફસાયેલી અર્પિતા મુખર્જીની મુશ્કેલીઓમાં સતત વધારો
• ડાયમંડ સિટી ફ્લેટ કોમ્પ્લેક્સમાંથી અર્પિતાની ચાર લક્ઝરી કાર ગાયબ 
• ગુમ થયેલી કારોમાં મોટી માત્રામાં રોકડ ભરેલી હોવાની ચર્ચા
• EDના અધિકારીઓએ આ કારોને શોધવા મથામણમાં લાગ્યા 

પશ્ચિમ બંગાળના શિક્ષક ભરતી કૌભાંડમાં ફસાયેલી અર્પિતા મુખર્જીની મુશ્કેલીઓમાં સતત વધારો થઈ રહ્યો છે. અગાઉ તેના ઘરેથી કરોડો રૂપિયા ઝડપાયા બાદ હવે ફરી એકવાર મોટા સમાચાર સામે આવ્યા છે. એક પછી એક દરોડા અને કરોડોની રોકડની રિકવરી બાદ હવે તેની ચાર કાર ગાયબ હોવાનું કહેવાય છે. મીડિયા રિપોર્ટ્સ અનુસાર, ડાયમંડ સિટી ફ્લેટ કોમ્પ્લેક્સમાંથી અર્પિતાની ચાર લક્ઝરી કાર ગાયબ છે. જોકે હવે એવું પણ માનવામાં આવી રહ્યું છે કે, આ કારોમાં મોટી માત્રામાં રોકડ પણ ભરેલી હતી.

EDના અધિકારીઓએ આ કારોને શોધવા મથામણમાં લાગ્યા 

શિક્ષક ભરતી કૌભાંડમાં ફસાયેલી અર્પિતા મુખર્જીના ડાયમંડ સિટી ફ્લેટ કોમ્પ્લેક્સમાંથી અર્પિતાની ચાર લક્ઝરી કાર ગાયબ હોવાનું સામે આવ્યું છે. તેવામાં હવે EDના અધિકારીઓએ આ કારોની શોધ શરૂ કરી છે. આસપાસના સીસીટીવી ફૂટેજની પણ તપાસ કરવામાં આવી રહી છે. કહેવામાં આવી રહ્યું છે કે EDના અધિકારીઓએ એક કાર પણ રિકવર કરી છે. આ સાથે જે બે કાર ગુમ થઈ છે તે અર્પિતાના નામની છે.

અર્પિતા મુખર્જીને મેડિકલ તપાસ માટે હોસ્પિટલમાં લઈ ગયા 

આ તરફ હવે EDના અધિકારીઓ અર્પિતા મુખર્જીને મેડિકલ તપાસ માટે હોસ્પિટલમાં લઈ ગયા છે. કહેવામાં આવી રહ્યું છે કે, આરોપો બાદ અર્પિતા ખૂબ રડી હતી. આ પછી તે પડી ગઈ, ત્યારબાદ EDના અધિકારીઓ તેને હોસ્પિટલ લઈ ગયા. આ સાથે પાર્થ ચેટરજીને પણ હોસ્પિટલમાં લઈ જવામાં આવ્યા હોવાનું સામે આવી રહ્યું છે.